ក្រុមជម្រើសជាតិបាល់ទាត់នារីកម្ពុជា បានបង្ហាញវត្តមាន ជាលើកដំបូង ក្នុងព្រឹត្តិការណ៍ស៊ីហ្គេម នៅទីក្រុងហាណូយ ប្រទេសវៀតណាម កាលពីយប់មិញ ប៉ុន្តែវាក៏ជាពេលដែលពួកគេ ទទួលបានភាពជូរចត់ ក្រោមស្នាដៃក្រុមខ្លាំងចម្រុះដោយកីឡាការិនីកូនកាត់របស់ហ្វីលីពីន ផងដែរ។
តាមរយៈការប្រកួតបើកឆាក កាលពីយប់ថ្ងៃចន្ទនោះ ក្រុមនារីជម្រើសជាតិកម្ពុជា បានប្រឹងប្រែងយ៉ាងខ្លាំង ដើម្បីបង្ហាញពីអ្វីដែលពួកគេមាន ប៉ុន្តែក្រុមដ៏កម្សត់ ដែលមានបទពិសោធក្មេងខ្ចីមួយនេះ មិនអាចទប់ក្រុមហ្វលីពីន ដែលមានកៅអី បានទៅលេង នៅព្រឹត្តិការណ៍បាល់ទាត់នារីពិភពលោក បាននោះទេ។
បើទោះបីជាក្រុមនារីកម្ពុជា បានប្រើថាមពលដំបូងទី និងខំសហការគ្នា ដោយឆន្ទៈ នៅលើទីលាន ដើម្បីទប់ និងកាត់បន្ថយឱកាសរកគ្រាប់បាល់របស់ក្រុមហ្វីលីពីន មកសល់ត្រឹម១គ្រាប់ ប៉ុន្តែការធ្លាក់ចុះនូវគុណភាពកម្លាំងរបស់ពួកគេ មិនអាចទប់មហិច្ឆតា បង្កើតការវាយលុករបស់ហ្វីលីពីន បានទៀតនោះទេ ដោយក្រុមខ្លាំង ហ្វីលីពីន អាចរកបានគ្រាប់បាល់ជាបន្តបន្ទាប់ ចំនួន៤គ្រាប់ទៀត ដើម្បីបញ្ចប់ការប្រកួតបើកឆាករបស់ពួកគេ ជាមួយភាពរីករាយយ៉ាងខ្លាំង ដោយការយកឈ្នះក្រុមកម្ពុជា ៥-០។
ជាមួយលទ្ធផលនេះ បានបង្ហាញស្ទើរ១០០ភាគរយទៅហើយថា ក្រុមនារីហ្វីលីពីន នឹងអាចបន្តដំណើរឡើងទៅកាន់វគ្គពាក់កណ្តាលផ្តាច់ព្រ័ត្រ ដោយគ្មានអ្វីត្រូវសង្ស័យនោះទេ ព្រោះក្រុមនារីកម្ពុជា ដែលត្រូវប្រកួតលើកទី២ ចុងក្រោយជាមួយក្រុមនារីម្ចាស់ផ្ទះវៀតណាម នោះ គឺគេចមិនផុតពីការចាញ់ ម្តងទៀតនោះទេ ដ្បិតអី ក្រុមនារីវៀតណាម មានកម្រិតលេង ល្អជាងក្រុមហ្វីលីពីន ទៅទៀត។
យ៉ាងណាក៏ដោយ ការព្យាយាមលេងរបស់ក្រុមនារីកម្ពុជា បានធ្វើឱ្យអ្នកគាំទ្រភាគច្រើន បានមើលឃើញពីការខិតខំរបស់ពួកគេ សម្រាប់ការបង្ហាញខ្លួនជាលើកដំបូង ក្នុងព្រឹត្តិការណ៍ស៊ីហ្គេមនេះ ហើយជាមួយគ្នានេះ ក្រុមនារីកម្ពុជា ក៏ទទួលបានសារលើកទឹកចិត្តច្រើនជាងសារបំបាក់ទឹកចិត្ត ពីអ្នកគាំទ្រជាជនរួមជាតិផងដែរ ព្រោះអ្នកស្នេហាវិស័យកីឡាបាល់ទាត់ភាគច្រើន បានដឹងច្បាស់ពីកម្រិតលេងរបស់ក្រុមនារីកម្ពុជា ហើយការចូលរួមស៊ីហ្គេម លើកនេះ គឺផ្តោតខ្លាំង លើការទទួលបានបទពិសោធថ្មីៗបន្ថែម ដើម្បីឈានទៅកាន់ការប្រកួតស៊ីហ្គេម លើកទី៣២ ឆ្នាំ២០២៣ ដែលកម្ពុជា ត្រូវធ្វើជាម្ចាស់ផ្ទះ ជាប្រវត្តិសាស្រ្ត លើកដំបូង៕