គិតត្រឹមព្រឹកថ្ងៃចន្ទនេះ នៅមិនទាន់មានកីឡាករ កីឡាការិនីជម្រើសជាតិកម្ពុជា រូបណា ដណ្តើមបានមេដាយមាសបន្ថែមជូនកម្ពុជា ក្រៅពីកីឡាករឃីកបុកស៊ីង បឺត សង្ឃឹម នោះទេ ខណៈវីរកីឡាការិនីជឺជីតស៊ូ ខាន់ ចេសា ដែលជាក្តីសង្ឃឹមយ៉ាងធំ ក្នុងការរកមេដាយមាសបន្ថែមឱ្យកម្ពុជា មិនត្រូវបានអនុញ្ញាតឱ្យចូលរួមប្រកួតនោះទេ។
តាមរយៈការប្រកួតស៊ីហ្គេម លើកទី៣១ ឆ្នាំ២០២១ ដែលកំពុងដំណើរការ នៅទីក្រុងហាណូយ ប្រទេសវៀតណាមនេះ កីឡាករ ទូច រ៉ាឆាន់ ដែលគេស្គាល់ថា បឺត សង្ឃឹម នោះ បានក្លាយជាអ្នកពលិកតែម្នាក់គត់ ដែលដណ្តើមបានមេដាយមាសដំបូងគេ ឱ្យកម្ពុជា បន្ទាប់ពីរូបគេ បានយកឈ្នះកីឡាករថៃ នៅវគ្គផ្តាច់ព្រ័ត្រ ក្នុងការប្រកួតទម្ងន់៥៧គីឡូក្រាម។
បន្ថែមលើនេះ ក្រុមឃីកបុកស៊ីងកម្ពុជា ក៏ដណ្តើមបានមេដាយប្រាក់៣ និងសំរឹទ្ធ១ ទៀតផងដែរ នៅក្នុងចំនួនមេដាយសរុបចំនួន១៤ (មាស១ ប្រាក់៤ និងសំរឹទ្ធ៩) ដែលក្រុមអត្តពលិកកម្ពុជា ដណ្តើមបាននៅពេលនេះ ខណៈមេដាយប្រាក់១ទៀត រកបានដោយក្រុមប៉េតង់កម្ពុជា រីឯមេដដាយសំរឹទ្ធ ចំនួន៨ទៀត ដណ្តើមបានដោយក្រុមប៉េតង់ ចំនួន៣ ក្រុមកីឡាវ៉ូស៊ូ ចំនួន៨ ខណៈ២ទៀត ជាការប្រជែងបានរបស់ក្រុមអត្តពលិកកីឡាទូករ៉ូអ៊ីង និងជឺជីតស៊ូ។
យ៉ាងក៏ដោយ នៅមុនការឈានទៅដណ្តើមបានមេដាយមាសឱ្យកម្ពុជា ជាលើកដំបូង ក្នុងអាជីពនេះ បឺត សង្ឃឹម បាននិយាយថា៖ «ការប្រកួតនេះ ខ្ញុំមានការលំបាកខ្លាំង ព្រោះគាត់ទាត់ល្អយកពិន្ទុ ហើយនៅទឹកទី៣ ខ្ញុំមានការភ័យខ្លាំងមែនទែន ដោយសារតែខាងកម្ពុជាយើង ឱ្យខ្ញុំចូលវ៉ៃគេវិញ ហើយនាទីក៏ជិតអស់ទៀត»។
បឺត សង្ឃឹម បានបន្ថែមថា៖ «ការឈ្នះបានមេដាយមាសស៊ីហ្គេម ជាលើកដំបូងនេះ ខ្ញុំពិតជាមានអារម្មណ៍រំភើបខ្លាំងណាស់ ព្រោះខ្ញុំមានក្តីស្រម៉ៃ (ចង់ឈ្នះមេដាយមាស) នេះ តាំងពីយូរមក ហើយទៅថ្ងៃមុខ ខ្ញុំសន្យាថា ខ្ញុំនឹងធ្វើឱ្យបានល្អជាងហ្នឹងទៀត។ ចំណែកស៊ីហ្គេម ឆ្នាំ២០២៣ នៅកម្ពុជា ខ្ញុំនឹងខំប្រឹងធ្វើឱ្យបានល្អ ដើម្បីរកមេដាយជូនជាតិរបស់យើងទៀត»។
ផ្ទុយពីនេះ វីរកីឡាការិនីជឺជីតស៊ូ ខាន់ ចេសា ដែលជាក្តីសង្ឃឹមយ៉ាងធំ ក្នុងការរកមេដាយមាសបន្ថែមឱ្យកម្ពុជានោះ បានធ្លាក់ចេញពីការប្រកួតនេះ ត្រឹមពេលថ្លឹងទម្ងន់ ដោយសារ ចេសា លើសទម្ងន់ចំនួន២ខាំ ដូចនេះយោងតាមបទបញ្ជាការប្រកួតរបស់សហព័ន្ធ Juitjutsu អន្តរជាតិ និងបទបញ្ជាបច្ចេកទេសរបស់ SEA Games Technical handbook គឺមិនអនុញ្ញាតឱ្យចូលប្រកួតនោះទេ។
ជាមួយគ្នានោះ ថ្នាក់ដឹកនាំប្រតិភូកម្ពុជា បានធ្វើការស្នើសុំជាផ្លូវការទៅកាន់គណៈកម្មការរៀបចំការប្រកួតភ្លាមៗ បន្ទាប់ពីការថ្លឹងទម្ងន់នោះ ដើម្បីឱ្យម្ចាស់មេដាយកីឡាអាស៊ី ឆ្នាំ២០១៨ ខាន់ ចេសា បានចូលប្រកួតក្នុងប្រភេទទម្ងន់៦២គីឡូក្រាមវិញ ប៉ុន្តែ ការស្នើសុំនេះ ត្រូវបានបដិសេធដដែល។ ហេតុនេះ ចេសា បានត្រឹមបង្ហាញវត្តមាន ក្នុងនាមជាកាន់ទង់ជាតិកម្ពុជា នៅក្នុងពិធីបើកស៊ីហ្គេម ហើយកញ្ញា ក៏បានចូលរួមអបអរ មិត្តរួមក្រុម គឺកីឡាការិនី ម៉ាប់ សុខហួយ ដែលបានឈ្នះមេដាយសំរឹទ្ធ លើប្រភេទកីឡាជឺជីតស៊ូនេះ កាលពីថ្ងៃអាទិត្យ ម្សិលមិញផងដែរ៕
