ក្រុមជម្រើសជាតិចំបាប់នារីកម្ពុជា នឹងត្រូវធ្វើការប្រកួតប្រជែង ដើម្បីស្វែងរកមេដាយ ទៅតាមប្រភេទទម្ងន់របស់ពួកគេ នៅថ្ងៃនេះ ហើយប្រធានប្រតិភូដឹកនាំការប្រកួត លោក Casey Barnett មានការជឿជាក់ថា ពួកគេ នឹងអាចដណ្តើមបានមេដាយ នៅក្នុងកម្រិតណាមួយ បន្ទាប់ពីកីឡាករចំបាប់ ចំនួន៥នាក់ បានបញ្ចប់ការប្រកួតវិញ្ញាសាក្រិចកូរ៉ូម៉ាំង ដោយគ្មានមេដាយសោះនោះ។
សម្រាប់ការប្រកួត នៅថ្ងៃពុធនេះ កីឡាការិនីចំបាប់កម្ពុជា ចំនួន៤នាក់ នឹងត្រូវប្រកួតនៅលើវិញ្ញាសាចំបាប់សេរី ទៅតាមប្រភេទទម្ងន់រៀងៗខ្លួនរបស់ពួកគេ ដោយក្នុងនោះកីឡាការិនី ជា កញ្ញា ត្រូវប្រកួតក្នុងទម្ងន់៦២គីឡូក្រាម រីឯ សឿន នឿន ប្រកួតទម្ងន់៥៧គីឡូក្រាម ហើយ សម្បត្តិ វណ្ណះប្រកួតទម្ងន់៥៣គីឡូក្រាម ចំណែកកីឡាការិនី ឌិត សំណាង ត្រូវប្រកួត ក្នុងទម្ងន់៥៧គីឡូក្រាម។
ជាមួយវត្តមានរបស់កីឡាការិនីទាំង៤នាក់នេះ អនុប្រធានសហព័ន្ធកីឡាចំបាប់កម្ពុជា លោក Casey Barnett ដែលជាប្រធានប្រតិភូដឹកនាំក្រុមជម្រើសជាតិចំបាប់កម្ពុជា ទៅប្រកួតស៊ីហ្គេម នៅប្រទេសវៀតណាមនេះ បានថ្លែង ដោយភាពជឿជាក់ថា៖ «យើងទន្ទឹងរង់ចាំ ការប្រកួតចំបាប់នារី នៅថ្ងៃពុធនេះ ហើយយើងរំពឹងថា នឹងឈ្នះបានមេដាយចំនួន២»។
ការដាក់ក្តីសង្ឃឹមរបស់នាយកវិទ្យាស្ថានខេមអេដ លោក Casey Barnett ត្រូវបានធ្វើឡើង បន្ទាប់ពីលោកបានជួបការខកចិត្ត ទៅលើការប្រកួតចំបាប់ក្រិចកូរ៉ូម៉ាំងទាំង៥ប្រភេទទម្ងន់របស់កីឡាករជើងចាស់ ឌន សៅ ព្រមទាំង កែវ សុភ័ក្រ្ត, អេង សេងលាង, ងួន មករា និង យុន ប៊ុនណា ដែលបានបញ្ចប់ការប្រកួត កាលពីម្សិលមិញ ដោយរកមិនបានមេដាយសោះ។ ផ្ទុយពីនេះ កីឡាកររបស់ម្ចាស់ផ្ទះវៀតណាម បានឈ្នះមេដាយមាស ទាំង៦ប្រភេទទម្ងន់ ដែលត្រូវបានដាក់ឱ្យប្រកួត កាលពីថ្ងៃអង្គារនោះ។
សម្រាប់ការប្រកួតទាំង៥ប្រភេទរបស់កីឡាករកម្ពុជា កាលពីថ្ងៃអង្គារនោះ អតីតម្ចាស់មេដាយមាស ៣សម័យកាល ឌន សៅ ទទួលបានលេខ៤ ក្រោយគេ ក្នុងការប្រកួតទម្ងន់៩៧គីឡូក្រាម រីឯ យុន ប៊ុនណា បានលេខ៤ ក្នុងចំណោម៥នាក់ នៃការប្រកួតទម្ងន់៦០គីឡូក្រាម។
ចំណែកកីឡាករ អេង ផានិត បានលេខ៤ក្រោយគេ ក្នុងទម្ងន់៦៧គីឡូក្រាម ហើយ កីឡាករទម្ងន់៧៧គីឡូក្រាម ងួន មករា បានលេខ៤ ក្នុងចំណោមបេក្ខភាពចូលរួមប្រកួតទាំង៦នាក់ ហើយកីឡាករ កែវ សុភ័ក្រ្ត បានលេខ៤ ក្រោយគេផងដែរ ក្នុងការប្រកួតទម្ងន់៨៧គីឡូក្រាម៕
