ក្រុមជម្រើសជាតិកីឡាប៉េតង់កម្ពុជា ត្រូវធ្វើការប្រកួតវិញ្ញាសាទាំង២ចុងក្រោយ នៅថ្ងៃនេះ ហើយវាក៏ជាការបង្ហាញវត្តមានរបស់កីឡាករ និងកីឡាការិនីឆ្នើមៗនៃប្រភេទកីឡានេះផងដែរ ចំណែកកីឡាករ ស៊ិន វង់ និងកីឡាការិនី វង ចន្ថា បានបង្កើតកំណត់ត្រាថ្មី សម្រាប់ខ្លួនឯង តាមរយៈការដណ្តើមបានមេដាយមាស លើវិញ្ញាសាប្រកួតគូចម្រុះ កាលពីថ្ងៃអង្គារ ម្សិលមិញ រួចហើយ។
តាមរយៈការប្រកួតផ្តាច់ព្រ័ត្រ លើវិញ្ញាសាគូចម្រុះ (បុរស១ និងនារី១នាក់) កាលពីល្ងាចថ្ងៃអង្គារ ម្សិលមិញនេះ កីឡាករ ស៊ិន វង់ និងកីឡាការិនី វង់ ចន្ថា បានសហការគ្នាប្រកួតយ៉ាងល្អបំផុត ដើម្បីយកឈ្នះទៅលើក្រុមម្ចាស់ផ្ទះវៀតណាម ដោយពិន្ទុ ១៣-៤ យ៉ាងរំភើបបំផុត។
ជាមួយលទ្ធផលនេះ បានបង្ហាញថា ស៊ិន វង់ និង វង់ ចន្ថា បានឈ្នះស្ទើរគ្រប់ការប្រកួតទាំងអស់ សម្រាប់ការចាប់ដៃគ្នា លេងវិញ្ញាគូចម្រុះនេះ ពោលគឺពួកគេ បានចាញ់តែក្រុមថៃ ដោយពិន្ទុ ១៣-៩ ម្តងគត់ នៅក្នុងវគ្គជម្រុះវិលជុំ ក្រៅពីនោះ ពួកគេឈ្នះទាំងអស់។ ចំណែកក្រុមវៀតណាមនេះ ក៏ធ្លាប់បានចាញ់ក្រុមកម្ពុជា ក្នុងវគ្គជម្រុះវិលជុំ ផងដែរ ប៉ុន្តែ វៀតណាម បានទម្លាក់ក្រុមថៃ ដោយពិន្ទុដាច់ នៅវគ្គពាក់កណ្តាលផ្តាច់ព្រ័ត្រ ដើម្បីឡើងមកជួបកម្ពុជា ដែលបានទម្លាក់ក្រុមម៉ាឡេស៊ី ហើយជាលទ្ធផល កម្ពុជា បានបន្តឈ្នះជាលើកទី២ តែម្តង។
ជាមួយការរកឃើញជ័យជម្នះដ៏សំខាន់ ក្នុងអាជីពនេះ កីឡាការិនី វង ចន្ថា បាននិយាយ ក្រោយការឈ្នះលើក្រុមវៀតណាមថា៖ «ខ្ញុំពិតសប្បាយចិត្តខ្លាំងណាស់ ដែលបានឈ្នះមេដាយមាស ជូនប្រទេសជាតិ! ពួកយើង បានប្រឹងប្រែងហ្វឹកហាត់ខ្លាំងណាស់ ជាមួយគ្រូបង្វឹក នៅកម្ពុជា ដោយ ស៊ិន វង់ គាត់វាយត្រូវ ហើយខ្ញុំចូលបាន ល្អ»។
កីឡាការិនីរូនេះ បានបញ្ជាក់ពីអារម្មណ៍ពិត ពេលជួបក្រុមវៀតណាម នៅវគ្គផ្តាច់ព្រ័ត្រថា៖ «នៅពេលឃើញក្រុមវៀតណាម បានយកឈ្នះក្រុមថៃ នៅវគ្គ១/២ផ្តាច់ព្រ័ត្រ គឺពួកខ្ញុំ ដឹងតែយកមេដាយមាសនេះបាន ព្រោះយើងធ្លាប់បានយកឈ្នះលើក្រុមនេះ ម្តងរួចមកហើយ អ៊ីចឹងយើងមានទំនុកចិត្តតាំងពីមុនការប្រកួតថា យើងនឹងឈ្នះមេដាយមាសនេះតែម្តង»។
ដោយឡែក នៅថ្ងៃពុធនេះ ក្រុមជម្រើសជាតិប៉េតង់កម្ពុជា នឹងធ្វើការប្រកួត២វិញ្ញាសាចុងក្រោយរបស់ខ្លួន គឺវិញ្ញាសាបុរស៣នាក់ ទល់៣នាក់ និង នារី៣នាក់ ទល់៣នាក់។ សម្រាប់ការប្រកួតនេះកីឡាករ ញ៉ែម បូរ៉ា, ហេង ថន, សៀង វណ្ណា និង ឃួន លីហ៊រ (បម្រុងម្នាក់) នឹងចាប់ដៃគ្នាប្រកួតជាក្រុមបុរស ដោយពួកគេ ត្រូវប្រកួតវិលជុំ ជាមួយក្រុមវៀតណាម ថៃ ឡាវ និងម៉ាឡេស៊ី។
ចំណែកកីឡាការិនី អ៊ុន ស្រីយ៉ា, ស៊្រាង សុរ៉ាឃីម, ឃួន យ៉ារី និង ដួង ឌីណា (បម្រុង១នាក់) នឹងត្រូវចាប់ដៃគ្នាប្រកួតវិញ្ញាសាជាក្រុមនារី (៣នាក់ ទល់៣នាក់) ដោយពួកគេ ឈរនៅពូលB ជាមួយក្រុមម្ចាស់ផ្ទះវៀតណាម និងម៉ាឡេស៊ី គឺមានន័យថា បើសិនជា ក្រុមនារីកម្ពុជា ឈ្នះបានត្រឹម១ប្រកួត នឹងបានឡើងទៅវគ្គពាក់កណ្តាលផ្តាច់ ហើយ ហេតុនេះឱកាសនៃការឡើងទៅដណ្តើមមេដាយ ជូនជាតិ គឺមានច្រើន ចំណែកក្រុមបុរស ក៏មានរំពឹងខ្ពស់ផងដែរ ព្រោះបើឈ្នះត្រឹម២ប្រកួត ដឹងតែបានឡើងទៅវគ្គពាក់កណ្តាលផ្តាច់ព្រ័ត្រហើយ៕
