ប្រធានប្រធានដឹកនាំក្រុមជម្រើសជាតិចំបាប់កម្ពុជា បានអះអាងដោយភាពជឿជាក់ថា កីឡាកររបស់កម្ពុជា ចំនួន២នាក់ នឹងអាចដណ្តើមបានមេដាយមាស ក្នុងការប្រកួត នៅថ្ងៃព្រហស្បតិ៍នេះ បើទោះបីជាការប្រកួត២ថ្ងៃ កន្លងមកនេះ ក្រុមចំបាប់ ដណ្តើមបានត្រឹមមេដាយសំរឹទ្ធក៏ដោយ។
តាមរយៈការប្រកួត ចំនួន២ថ្ងៃកន្លងមកនេះ កីឡាករ ងួន មករា, យុន ប៊ុនណា, ឌន សៅ, កែវ សុភ័ក្រ្ត និងកីឡាករ អេង សេងលាង សុទ្ធតែបានបញ្ចប់ការប្រកួតចំបាប់ក្រិចកូរ៉ូម៉ាំង ដោយលទ្ធផលចាញ់ និងមិនដណ្តើមបានមេដាយដូចគ្នា កាលពីថ្ងៃអង្គារ។
ចំណែកការប្រកួតរបស់ក្រុមកីឡាការិនីចំបាប់ចំនួន៤នាក់ កាលពីថ្ងៃពុធ ក៏ធ្វើមិនសូវបានល្អប៉ុន្មានដែរ ដោយក្នុងនោះមានតែកីឡាការិនីចំបាប់ទម្ងន់៥៧គីឡូក្រាម ឌិត សំណាង និងកីឡាការិនី ជា កញ្ញា ប្រកួតក្នុងទម្ងន់៦២គីឡូក្រាមប៉ុណ្ណោះ ដែលដណ្តើមបានមេដាយសំរឹទ្ធរៀងៗខ្លួន ទោះលទ្ធផលប្រកួតជម្រុះមានចាញ់ មានឈ្នះ ប៉ុន្តែកីឡាការិនី សឿន នឿន ប្រកួតទម្ងន់៥៧គីឡូក្រាម និង សម្បត្តិ វណ្ណះ ដែលប្រកួតទម្ងន់៥៣គីឡូក្រាម មិនដណ្តើមបានមេដាយនោះទេ។
តាមការប្រកួតជាច្រើនវិញ្ញាសា រយៈពេល២ថ្ងៃមកនេះ ក្រុមអត្តពលិកចំបាប់របស់ម្ចាស់ផ្ទះវៀតណាម ដែលត្រូវបានគេចាត់ទុកថា ជា «បងធំ» ផ្នែកចំបាប់ប្រចាំនៅតំបន់អាស៊ាននេះ បានឈ្នះមេដាយមាស គ្រប់វិញ្ញាសាទាំងអស់។ តែទោះបីជាយ៉ាងណា លោក Casey Barnett បានបង្ហាញការជឿជាក់ថា សម្រាប់ការប្រកួត នៅថ្ងៃនេះ ក្រុមចំបាប់កម្ពុជា នឹងអាចដណ្តើមបានមេដាយមាស ជាមិនខាន។
អនុប្រធានសហព័ន្ធកីឡាចំបាប់កម្ពុជា លោក Casey Barnett ដែលជាប្រធានប្រតិភូដឹកនាំការប្រកួតនេះ បានថ្លែងថា៖ «វៀតណាម បានឈ្នះមេដាយមាសទាំងអស់ ក្នុង រយៈពេល២ថ្ងៃចុងក្រោយនេះ គឺពួកគេខ្លាំង ប៉ុន្តែនៅថ្ងៃនេះ យើងរំពឹងថា នឹងឈ្នះមេដាយមាស២ សម្រាប់ទម្ងន់១២៥គីឡូក្រាម និងទម្ងន់៩៧គីឡូក្រាម»។
ចំពោះបេក្ខភាព ដែលកម្ពុជា រំពឹងបានឈ្នះមេដាយមាស នៅថ្ងៃនេះ គឺកីឡាករកូនកាត់ខ្មែរ-អ៊ីរ៉ង់ ម៉ូ សារី ដែលប្រកួតក្នុងទម្ងន់៩៧គីឡូក្រាម និង ស៊ូ បាលី ដែលប្រកួតក្នុងទម្ងន់១២៥គីឡូក្រាម ហើយកីឡាករទម្ងន់៨៦គីឡូក្រាម ហេង វុទ្ធី កីឡាករទម្ងន់៥៧គីឡូក្រាម សឿន សុភាស់ កីឡាករទម្ងន់៦៥គីឡូក្រាម ជុន ធួន កីឡាករទម្ងន់៧៤គីឡូក្រាម អុល សៅហ៊ាង និងកីឡាការិនីកូនកាត់ខ្មែរ-កូរ៉េ អ៊ំ ជីអ៊ុន មានទម្ងន់៦២គីឡូក្រាម ក៏ប្រកួត នៅថ្ងៃនេះដូចគ្នា៕