ថ្នាក់ដឹកនាំគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) ក្រោមការដឹកនាំផ្ទាល់ ក្រោមការដឹកនាំផ្ទាល់ដោយលោកឧបនាយករដ្ឋមន្រ្តី រដ្ឋមន្រ្តីក្រសួងការពារ ទៀ បាញ់ ជាប្រធាន CAMSOC បានទទួលទង់ស៊ីហ្គេម ជាផ្លូវការ នៅក្នុងពិធីបិទ ការប្រកួតស៊ីហ្គេម លើកទី៣១ ឆ្នាំ២០២១ នៅទីក្រុងហាណូយ ប្រទេសវៀតណាម កាលពីយប់ម្សិលមិញ។
នៅក្នុងពិធីបិទនោះ លោកបណ្ឌិត ថោង ខុន ជាប្រធានគណៈកម្មាធិការជាតិអូឡាំពិកកម្ពុជា (NOCC) និងអនុប្រធានអចិន្រ្តៃយ៍ CAMSOC បានទៅទទួលទង់ស៊ីហ្គេម ផ្ទាល់ពីភាគីវៀតណាម ជាមួយលោក វ៉ាត់ ចំរើន ដែលជាអគ្គលេខា ហើយនៅក្នុងពិធីនោះ ក្រុមសិល្បៈប្រពៃណីខ្មែរ និងក្រុមល្បុក្កតោកម្ពុជា ក៏បានបង្ហាញវត្តមានជាមួយការសម្តែង និងច្រើន នៅក្នុងពេលនោះដែរ។
ជាមួយគ្នានេះ ប្រតិភូកីឡាកម្ពុជា ព្រមទាំងក្រុមអត្តពលិក ដែលដណ្តើមបានមេដាយមាស ក្នុងការប្រកួតស៊ីហ្គេម នៅប្រទេសវៀតណាម លើកនេះ នឹងធ្វើដំណើរអម ការដង្ហែរទង់ស៊ីហ្គេមនេះ មកដល់កាន់ព្រលានយន្តអន្តរជាតិភ្នំពេញ នារសៀលម៉ោង៥ ថ្ងៃអង្គារនេះ ក្រោមការដឹកនាំរបស់លោកឧបនាយករដ្ឋមន្រ្តី រដ្ឋមន្រ្តីក្រសួងការពារ ទៀ បាញ់ ផ្ទាល់តែម្តង។
នៅក្រោយការមកដល់មាតុប្រទេសវិញ នៅរសៀលថ្ងៃអង្គារនេះ ប្រតិភូកីឡាករកម្ពុជា នឹងធ្វើការដង្ហែរទង់ស៊ីហ្គេមនេះ ចេញពីព្រលានយន្តហោះអន្តរជាតិភ្នំពេញ នៅម៉ោង ៥:៣០ ដោយក្បួនដង្ហែរទង់ស៊ីហ្គេម តាមរថយន្តនេះ នឹងចាកចេញពីអាកាសយានដ្ឋានអន្តរជាតិភ្នំពេញ តាមផ្លូវសហព័ន្ធរុស្ស៊ី ឆ្ពោះទៅកាន់វិមានឯករាជ្យ មុននឹងដង្ហែរត្រឡប់ទៅកាន់ទីស្នាក់ការ NOCC វិញ។
ជាមួយការបង្ហែទង់ស៊ីហ្គេម នៅថ្ងៃអង្គារនេះ លោក វ៉ាត់ ចំរើន ជាអគ្គលេខាធិការ NOCC និង CAMSOC និងនាយបេសកកម្មស៊ីហ្គេមនេះ បានធ្វើការអំពាវនាវដល់ប្រជាពលរដ្ឋកម្ពុជា បែបនេះថា៖ «ប្រតិភូកីឡារបស់យើង ដឹកនាំដោយសម្តេចពិជ័យសេនា ទៀ បាញ់ នឹងទៅដល់ព្រលានយន្តហោះអន្តរជាតិភ្នំពេញ ហើយយើងនឹងធ្វើពិធីដង្ហែរពីព្រលានយន្តហោះ នូវទង់ ស៊ីហ្គេម ដែលបានមកដល់ព្រះរាជណាចក្រកម្ពុជានេះ ដើម្បីធ្វើជាម្ចាស់ផ្ទះហ្នឹង អ៊ីចឹងខ្ញុំសូមផ្ញើសារនេះ ទៅដល់ប្រជាពលរដ្ឋទាំងអស់ នឹងអ្នកស្នេហាវិស័យកីឡាទាំងអស់ ក៏ដូចជាយុវជនរបស់យើងទាំងអស់គ្នា សូមចូលរួមអបអរសាទរការដង្ហែរទង់ស៊ីហ្គេមនេះ និងលើកទឹកចិត្តដល់កីឡាករ កីឡាការិនី ជាម្ចាស់ជយលាភីស៊ីហ្គេមរបស់យើង ដែលបានទៅពីស៊ីហ្គេម នៅប្រទេសវៀតណាមនេះ ផងដែរ»៕
