បរទេស៖ លោក Jose Mourinho បាននិយាយកាលពីថ្ងៃអង្គារថា បទពិសោធន៍នៃការឈ្នះពានក្របខ័ណ្ឌអឺរ៉ុបរបស់លោក នឹងមិនជួយអ្វីដល់លោកឡើយ ខណៈដែលក្រុម Roma នៅសល់ត្រឹមតែមួយជំហានមួយទៀតប៉ុណ្ណោះ ក្នុងការឈ្នះពានប្រចាំទ្វីបជាលើកដំបូងរបស់ពួកគេ។
លោក Mourinho ធ្លាប់បានឈ្នះពានក្របខ័ណ្ឌ Champions League ២លើក ពាន UEFA Cup និង Europa League ប៉ុន្តែ បាននិយាយថា លោកមានអារម្មណ៍ថា បានរងនូវសម្ពាធដូចគ្នា នៅមុនពេលការប្រកួតជាមួយនឹងក្រុម Feyenoord ក្នុងក្របខ័ណ្ឌ Conference League ក្នុងទីក្រុង Tirana នៅរាត្រីនេះ។ លោក Mourinho បានប្រាប់អ្នកយកព័ត៌មានថា៖ «ខ្ញុំនឹងមិនគិតអ្វីផ្សេងឡើយ លុះត្រាតែបន្ទាប់ពីការប្រកួតនៅថ្ងៃស្អែក (ថ្ងៃនេះ)។ បទពិសោធកាលពីមុនរបស់ខ្ញុំ មិនបានជួយដល់ខ្ញុំឡើយ។ ខ្ញុំបានគិតថា វានឹងជួយ ប៉ុន្តែ មិនបានជួយឡើយ។
ខ្ញុំជាមនុស្សដូចមុន ពោលគឺដូចពេលដែលខ្ញុំបានដឹកនាំការប្រកួតវគ្គផ្តាច់ព្រ័ត្រជាលើកដំបូងរបស់ខ្ញុំអ៊ីចឹង»។ លោក Mourinho វ័យ៥៩ឆ្នាំ បានធ្វើឲ្យខ្លួនលោកផ្ទាល់មានប្រជាប្រិយភាពក្នុងចំណោមអ្នកគាំទ្រ ក្រោយពីបានជួបភាពជោគជ័យក្នុងរដូវកាលទី១របស់លោក ក្នុងប្រទេសអ៊ីតាលី ខណៈដែលលោកបានដឹកនាំឲ្យ Roma ឈ្នះកៅអីទៅលេងក្នុងក្របខ័ណ្ឌ Europa League និងឈានទៅប្រកួតក្របខ័ណ្ឌអឺរ៉ុបវគ្គផ្តាច់ព្រ័ត្រ ជាលើកដំបូង ក្នុងរយៈពេល៣ទសវត្សរ៍៕
ប្រភពព័ត៌មាន៖ Channel News Asia