នៅទីបំផុត ការប្រកួតពានរង្វាន់ខេមបូឌានលីគខាប់ ឆ្នាំ២០២២ (Cambodian League Cup) បានរកឃើញក្រុមខ្លាំងទាំង២ ឡើងទៅប្រកួតផ្តាច់ព្រ័ត្រ ជាផ្លូវការហើយ នោះគឺក្រុមវិសាខា និងភ្នំពេញក្រោន បន្ទាប់ពីក្រុមទាំង២នេះ បានទទួលជ័យជម្នះរៀងៗខ្លួន នៅក្នុងវគ្គពាក់កណ្តាលផ្តាច់ព្រ័ត្រ ដែលទើបបានបញ្ចប់ កាលពីថ្ងៃអង្គារ ម្សិលមិញ។
តាមរយៈការប្រកួតនេះ ក្រុមវិសាខា ក្រោមការដឹកនាំផ្ទាល់ ដោយលោកគ្រូ មាស ចាន់ណា បានទទួលជ័យជម្នះគ្រប់ការប្រកួតទាំងអស់ គឺពួកគេ បានយកឈ្នះក្រុមអង្គរថាយហ្គឺរ ព្រៃវែងអេហ្វស៊ី និងក្រុមណិចស្តិប ដើម្បីទទួលបានចំណាត់ថ្នាក់លេខ១ ប្រចាំពូលD ហើយក្រុមនេះ បានបន្តទម្លាក់ក្រុមលេខ២ពូលC បឹងកេត ដោយការយកឈ្នះ ២-០ នៅក្នុងវគ្គខ្វែង៨ក្រុមចុងក្រោយ។
យ៉ាងណាមិញ សម្រាប់ការឡើងមកជួបក្រុមលេខ១ពូលB ព្រះខ័នរាជស្វាយរៀង នៅវគ្គពាក់កណ្តាលផ្តាច់ព្រ័ត្រ ដែលបានទម្លាក់ក្រុមគិរីវង់សុខសែនជ័យ ២-០ នៅវគ្គខ្វែងដែរនោះ ក្រុមវិសាខា បានយកឈ្នះក្រុមខ្លាំងមិនស្គាល់ការចាញ់ នៅលីគកំពូលកម្ពុជា ស្វាយរៀង ២-០ ដ៏គួរឱ្យភ្ញាក់ផ្អើល។
ជាមួយជ័យជម្នះ ក្រុមវិសាខា នឹងត្រូវឡើងទៅជួបក្រុមភ្នំពេញក្រោន នៅវគ្គផ្តាច់ព្រ័ត្រ ដែលការប្រកួតនេះ ត្រូវបានគេមើលឃើញថា នឹងមានភាពតានតឹងខ្លាំង ព្រោះក្រុមលេខ១ពូលC ភ្នំពេញក្រោន បានឈ្នះគ្រប់ការប្រកួតដូចគ្នា នៅមុនឡើង មកដល់វគ្គផ្តាច់ព្រ័ត្រ ដណ្តើមយកពាននេះ។
នៅក្នុងវគ្គជម្រុះតាមពូល ភ្នំពេញក្រោន បានយកឈ្នះក្រុមបឹងកេត ក្រុមនគរបាលជាតិ និងឈ្នះក្រុមយុវជនបាល់ទាត់ជាតិបាទី ដើម្បីទទួលបានលេខ១ប្រចាំពូលCនេះ ហើយបន្ទាប់មក ពួកគេ បានបន្តទៅទម្លាក់ក្រុមព្រៃវែងអេហ្វស៊ី ៤-១ ក្នុងវគ្គខ្វែង៨ក្រុមចុងក្រោយ និងបន្តឈ្នះក្រុមណាហ្គាវើលដ៍ ៣-០ នៅវគ្គពាក់កណ្តាលផ្តាច់ព្រ័ត្រ។
ជាមួយលទ្ធផលដ៏ល្អរបស់ក្រុមទាំង២នេះ ត្រូវបានគេគិតថា ការជួបគ្នារបស់ក្រុមវិសាខា និងភ្នំពេញក្រោន នៅវគ្គផ្តាច់ព្រ័ត្រនេះ នឹងមានភាពស្វិតស្វាញខ្លាំង ព្រោះក្រុមរបស់លោក មាស ចាន់ណា ត្រូវការឈ្នះខ្លាំង ដើម្បីបង្ហាញពីភាពប្រសើរឡើងវិញ របស់ក្រុមនេះ បន្ទាប់ពី វិសាខា បានបញ្ចប់កុងត្រាមុនពេលកំណត់ជាមួយគ្រូបង្វឹកកូរ៉េខាងត្បូង លោក Lee Tae Hoon ចំណែកក្រុមភ្នំពេញក្រោន កាន់តែមានមហិច្ឆតាខ្ពស់ ក្នុងការយកពាននេះ ដើម្បីឧទ្ទិសទៅដល់វិញ្ញានក្ខន្ធប្រធានក្លិបរបស់ពួកគេ គឺលោកឧញ៉ា ឬទ្ធី សំណាង ដែលទើបទទួលមរណភាព កាលពីពេលថ្មីៗនេះ៕
