បរទេស៖ ក្លិប Aston Villa បានឈានដល់ការព្រមព្រៀងមួយដើម្បីចុះហត្ថលេខាជាមួយនឹងខ្សែការពារ Diego Carlos ពីក្លិប Sevilla។ ខ្សែការពារកណ្តាលសញ្ជាតិប្រេស៊ីលវ័យ២៩ឆ្នាំរូបនេះ បច្ចុប្បន្ន នឹងត្រូវធ្វើដំណើរទៅកាន់ប្រទេសអង់គ្លេស ដើម្បីពិនិត្យសុខភាព និងបំពេញលក្ខខណ្ឌផ្ទាល់ខ្លួន ក្នុងតម្លៃ២៦លានផោន (ស្មើនឹង៣៣លានដុល្លារអាមេរិក)។
Carlos ដែលបានលេងការប្រកួត១៣៦លើកសម្រាប់ក្រុម Sevilla និងបានជួយឲ្យពួកគេឈ្នះពាន Europa League ឆ្នាំ២០២០ ក៏បានពិភាក្សាជាមួយនឹងក្លិប Newcastle ផងដែរ ក្នុងពេលបើកទីផ្សារដោះដូរកីឡាករកាលពីខែមករា ប៉ុន្តែ ការផ្ទេរនេះ មិនបានកើតឡើងឡើយ។ Aston Villa បានឲ្យដឹងក្នុងសេចក្តីថ្លែងការណ៍មួយថា៖ «ក្លិប Aston Villa អាចប្រកាសបានថា ក្លិបបានឈានដល់កិច្ចព្រមព្រៀងគ្នាជាមួយនឹងក្លិប Sevilla FC សម្រាប់ការផ្ទេរ Diego Carlos ក្នុងតម្លៃខ្លួនបិទជិតមួយ។
កីឡាកររូបនេះ នឹងធ្វើដំណើរទៅកាន់អង់គ្លេស ក្នុងរយៈពេលឆាប់នេះ ដើម្បីបំពេញការពិនិត្យសុខភាព និងបំពេញលក្ខខណ្ឌផ្ទាល់ខ្លួន»។ Carlos បានចូលរួមជាមួយនឹងក្លិប Sevilla កាលពីឆ្នាំ២០១៩ ពីក្លិបបារាំង Nantes និងជាសមាជិកក្រុមជម្រើសជាតិប្រេស៊ីល ដែលបានឈ្នះមេដាយមាសអូឡាំពិកទីក្រុងតូក្យូ៕
ប្រភពព័ត៌មាន៖ The Guardian