ក្រុមសិង្ហក្រហម ភ្នំពេញក្រោន នឹងបើកទ្វារកីឡដ្ឋានស្មាតអអេសអ៊ិន ស្វាគមន៍ក្រុមវិសាខា នៅល្ងាចម៉ោង ៦:៣០ ថ្ងៃសៅរ៍នេះ ហើយនេះជាការប្រកួតផ្តាច់ព្រ័ត្រ ដណ្តើមពានរង្វាន់ខេមបូឌានលីគខាប់ ឆ្នាំ២០២២ បន្ទាប់ពីក្រុមទាំង២នេះ បានឈ្នះគ្រប់ការប្រកួតទាំង៥លើកជាប់ៗគ្នា កន្លងមកនេះ។
នៅក្នុងការប្រកួតនេះ ក្រុមម្ចាស់ផ្ទះ ភ្នំពេញក្រោន ពិតជាត្រូវការឈ្នះខ្លាំង ព្រោះពួកគេ ចង់បានពាននេះ ដើម្បីជាការឧទ្ទិសទៅដល់វិញ្ញានក្ខន្ធប្រធានក្លិបរបស់ពួកគេ គឺលោកឧញ៉ា ឬទ្ធី សំណាង ដែលទើបទទួលមរណភាព កាលពីពេលថ្មីៗនេះ ចំណែកក្រុមវិសាខា ក៏ចង់បានពាននេះ ដើម្បីស្រោចស្រង់ពីការដណ្តើមមិនបានពានអ្វីមួយសោះ របស់ពួកគេ នៅក្នុងរដូវកាល នេះ ផងដែរ។
យ៉ាងណាក៏ដោយ សម្រាប់ការប្រកួតដ៏សំខាន់នេះ ខ្សែប្រយុទ្ធវ័យក្មេងជម្រើស១១នាក់ដំបូងរបស់ភ្នំពេញក្រោន គឺ លឹម ពិសុទ្ធ នឹងមុនអាចចូលរួមជួយក្រុមនេះ បាននោះទេ បន្ទាប់ពីរូបគេ មានបញ្ហារបួសសសៃពួរកជើងខាងឆ្វេង ក្រោយពីមានការប៉ះទង្គិចគ្នា ក្នុងការប្រកួតវគ្គពាក់កណ្តាលផ្តាច់ព្រ័ត្រ ពានរង្វាន់ខេមបូឌានលីគខាប់ ជាមួយក្រុមណាហ្គាវើលដ៍ នាពេលកន្លងទៅថ្មីៗនេះ ហើយបើតាមការប្រកាសរបស់ក្លិបភ្នំពេញក្រោន បានឱ្យដឹងទៀតថា ជាមួយបញ្ហារបួសនេះ លឹម ពិសុទ្ធ នឹងត្រូវសម្រាក ព្យាបាលរយៈពេលពី៥ ទៅ៦សប្តាហ៍។
តែទោះបីជាយ៉ាងណា ភ្នំពេញក្រោន នៅមានកីឡាករល្អៗជាច្រើនទៀត ដើម្បីបំពេញទីតាំង លឹម ពិសុទ្ធ ហើយជាមួយគ្នានេះ លោក មាស ចាន់ណា ដែលទើបបានផ្លាស់ប្តូរតួនាទី ពីអ្នកចាត់ការទូទៅ មកកាន់តំណែងជាគ្រូង្គោល នៅក្នុងក្លិបវិសាខា ជំនួសគ្រូបង្វឹកកូរ៉េខាងត្បូង លោក Lee Tae Hoon នោះ បានទទួលស្គាល់ថា ការប្រកួតនេះ នឹងមានភាពតានតឹងខ្លាំង ព្រោះវាជំនួបរបស់ក្រុមខ្លាំង ដែលមិនទាន់ស្គាល់ការចាញ់សោះដូចគ្នា នៅក្នុងព្រឹត្តិការណ៍មួយនេះ។
យ៉ាងណាក៏ដោយ អតីតគ្រូបង្គោលក្រុមណាហ្គាវើលដ៍ លោក មាស ចាន់ណា បានបញ្ជាក់ ដោយភាពជឿជាក់ថា៖ «យើងត្រៀមខ្លួន បានរួចរាល់អស់ហើយ ហើយយើងបានតាំងចិត្តថា នឹងយកពានមួយនេះ មកកាន់ក្លិបរបស់យើងឱ្យបាន អ៊ីចឹងហើយទាំងក្រុមកីឡាករ ថ្នាក់ដឹកនាំ និងក្រុមគ្រូបង្វឹក បានតាំងចិត្ត ដោយម្នាក់ៗ ត្រូវខំប្រឹងព្យាយាមយកពានមួយនេះឱ្យបាន»។
គួរបញ្ជាក់ថា នៅក្នុងការប្រកួតពានរង្វាន់មួយនេះ ក្រុមវិសាខា បានយកឈ្នះក្រុមអង្គរថាយហ្គឺរ ព្រៃវែងអេហ្វស៊ី និងក្រុមណិចស្តិប ដើម្បីទទួលបានចំណាត់ថ្នាក់លេខ១ ប្រចាំពូលD ហើយក្រុមនេះ បានបន្តទម្លាក់ក្រុមលេខ២ពូលC បឹងកេត ដោយការយកឈ្នះ ២-០ ក្នុងវគ្គខ្វែង៨ក្រុមចុងក្រោយ ហើយអ្វីដែលកាន់តែពិសេសនោះ គឺ វិសាខា បានយកឈ្នះក្រុមខ្លាំងមិនស្គាល់ការចាញ់ នៅលីគកំពូលកម្ពុជា ព្រះខ័នរាជស្វាយរៀង ២-០ ដ៏គួរឱ្យភ្ញាក់ផ្អើល នៅវគ្គពាក់កណ្តាលផ្តាច់ព្រ័ត្រ។
ចំណែកភ្នំពេញក្រោន ក៏ធ្វើបានល្អដូចគ្នា ដោយពួកគេ បានយកឈ្នះក្រុមបឹងកេត ក្រុមនគរបាលជាតិ និងឈ្នះក្រុមយុវជនបាល់ទាត់ជាតិបាទី សម្រាប់ការប្រកួតជម្រុះ ក្នុងពូលC រួចបន្តទៅទម្លាក់ក្រុមព្រៃវែងអេហ្វស៊ី ៤-១ ក្នុងវគ្គខ្វែង៨ក្រុមចុងក្រោយ និងបន្តឈ្នះណាហ្គាវើលដ៍ ៣-០ នៅវគ្គពាក់កណ្តាលផ្តាច់ព្រ័ត្រ ហើយតាមលទ្ធផលនេះ វាបានបង្ហាញរួចទៅហើយ ការប្រកួតផ្តាច់ព្រ័ត្ររវាងក្រុមទាំង២នេះ ពិតជាមានភាពតានតឹង និងស្វាញខ្លាំង ដែលមិនអាចកំណត់ពីលទ្ធផល ទុកមុន បាននោះទេ៕
