កីឡាករ ធន់ អៀងឡៃ បានអះអាងថា ការប្រកួតផ្តាច់ព្រ័ត្រ ដណ្តើមពានមាស ជាមួយគូសត្រូវចាស់ អេលីត ចំរើន នៅលើសង្វៀនថោន នាថ្ងៃអាទិត្យនេះ រូបគេមិនខ្វល់ថា ចំរើន វាយបែបដកថយ ដូចជំនួបលើកមុន ឬយ៉ាងណានោះទេ ប៉ុន្តែអ្វីដែលសំខាន់នោះ អៀងឡៃ បានប្តេជ្ញាដណ្តើមយកពានមាសនេះ និងប្រាក់រង្វាន់ ឱ្យបាន ដើម្បីធ្វើជាកាដូ ជូនប្រពន្ធរបស់ខ្លួន។
កីឡាករនិយមវាយសម្រុកគ្រប់ក្បាច់ ធន់ អៀងឡៃ បាននិយាយថា៖ «ការជួបគ្នាលើកនេះ ខ្ញុំអត់ខ្វល់នោះទេ ទោះបីជាគាត់ចូលក៏បាន ថយក៏បាន គឺអត់បញ្ហា ព្រោះខ្ញុំបានត្រៀមចិត្ត ត្រៀមកាយ និងត្រៀមស្នៀត ទប់ទល់ជាមួយគាត់ រួចរាល់អស់ហើយ ហើយខ្ញុំបានប្តេជ្ញាថា នឹងខំប្រឹងយកពានមួយនេះ ឱ្យបាន ព្រោះវាសំខាន់ សម្រាប់ខ្ញុំ»។
ការនិយាបែបចម្អកទៅដល់ការប្រកួតរបស់ អេលីត ចំរើន នេះ ក៏ព្រោះតែ ធន់ អៀងឡៃ ធ្លាប់បានចាញ់អ្នកលេងស្នៀតជើងរូបនេះ ចំនួន២លើកមកហើយ ហើយការចាញ់ពិន្ទុលើកចុងក្រោយ ក្នុងការប្រកួតជម្រុះតាមពូល ក្នុងការដណ្តើមពានមាសនេះ ធន់ អៀអឡៃ ក៏បានវាយកែង បណ្តាលឱ្យ អេលីត ចំរើន បែក នៅលើក្តោងច្រមុះ ផងដែរ ប៉ុន្តែរូបគេ នៅតែគេចមិនផុត ពីការចាញ់ ដោយមិនអស់ចិត្ត ជាមួយការវាយបែបដកថយ មិនហ៊ានវាយដោយប្រឈមគ្នារបស់ អេលីត ចំរើន។
ធន់ អៀងឡៃ បានបន្ថែមថា៖ «ខ្ញុំចង់បានប្រាក់រង្វាន់ពីការប្រកួតពាននេះ យកទៅផ្គត់ផ្គង់គ្រួសារ ព្រោះយើងទើបតែមានគ្រួសារដែរ អ៊ីចឹងខ្ញុំប្តេជ្ញាយកពានមាសនេះឱ្យពាន សម្រាប់ធ្វើជាកាដូ ជូនប្រពន្ធរបស់ខ្ញុំ ហើយខ្ញុំសូមផ្តាំផ្ញើទៅបងប្អូនអ្នកគាំទ្រថា ការប្រកួតនេះ ធានាថា នឹងល្អមើល ដោយខ្ញុំត្រូវការជ័យជម្នះខ្លាំងបំផុត»។
ចំណែក អេលីត ចំរើន នៅតែប្រកាន់ជំហរ វ៉ៃទៅតាមបច្ចេកទេសរបស់ខ្លួន គឺនឹងមិនវ៉ៃបុកគ្នា តាមការចង់បានរបស់អ្នកគាំទ្រ នោះទេ ដោយរូបគេ បាននិយាយថា៖ «ខ្ញុំធ្លាប់ឈ្នះ ធន់ អៀងឡៃ ២ដងមកហើយ ប៉ុន្តែ ការជួបគាត់ គឺមានភាពតានតឹងខ្លាំងជាងគេ។ យ៉ាងណាក៏ដោយ ការជួបគ្នាលើកនេះ ខ្ញុំបានត្រៀមល្អដែរ ហើយសម្រាប់ខ្ញុំ ការប្រកួត មានវ៉ៃបុក និងថយ គឺពេលណាវ៉ៃថយ ខ្ញុំនឹងអាចឈ្នះ ខ្ញុំនឹងវាយថយ»។
កីឡាករល្អទាត់ អេលីត ចំរើន បានបន្ថែមថា៖ «សម្រាប់ការប្រកួតលើកនេះ ខ្ញុំប្តេជ្ញាថា បើឡើងទៅ គាត់ថយ ខ្ញុំនឹងវាយបុក តែបើគាត់វាយបុក ខ្ញុំមានតែថយ ព្រោះកីឡាករមានចេញ មានចូល អ៊ីចឹងខ្ញុំសូមផ្តាំផ្ញើរទៅបងប្អូនភាគច្រើន ដែលមិនសូវពេញចិត្តការប្រកួតរបស់ខ្ញុំ ដែលថា ខ្ញុំវ៉ៃថយៗ ប៉ុន្តែខ្ញុំមានស្នៀត និងបច្ចេកទេស ព្រោះពេលខ្ញុំថយ ក៏ខ្ញុំមើលដែរ។ បើកីឡាករបុកមក ហើយខ្ញុំបុកទៅវិញ វាពិបាក អ៊ីចឹងខ្ញុំមានតែថយទាត់ ធាក់ និងម៉ាត់ ទៅតាមធម្មតា និងតាមបច្ចេកទេស ហើយប្រកួតនេះ ខ្ញុំសង្ឃឹមត្រឹម៦០ភាគរយ»៕
