គិតមកដល់ពេលនេះ ប្រធានក្លិបបាល់ទាត់ភ្នំពេញក្រោន លោកឧកញ៉ា ឬទ្ធី សំណាង ទទួលមរតភាព បានចំនួន២០ថ្ងៃហើយ ប៉ុន្តែរាល់អនុស្សាវរីយ៍ទាំងឡាយ ជាពិសេសស្នាដៃសំខាន់ៗ ដែលលោកបានព្យាយាមបង្កើតឱ្យមានឡើង សម្រាប់ក្លិបបាល់ទាត់ដ៏ធំជាងគេ នៅកម្ពុជាមួយនេះ គឺបានស្ថិតនៅក្នុងបេះដូង និងការចងចាំរបស់ក្រុមគ្រួសារបាល់ទាត់ភ្នំពេញក្រោន មិនសាបសូន្យឡើយ។
យ៉ាងណាមិញ នៅក្នុងពិធីលើកពាន ការប្រកួតពានរង្វាន់ខេមបូឌានលីគខាប់ ឆ្នាំ២០២ (Cambodian League Cup) កាលពីយប់ថ្ងៃសៅរ៍ កន្លងមកនេះ គ្រប់គ្នា នៅក្នុងក្លិបភ្នំពេញក្រោន ព្រមទាំងប្រពន្ធ កូន ម្តាយ និងសាច់ញ្ញាតិរបស់លោកឧកញ៉ា ឬទ្ធី សំណាង សុទ្ធតែបានបង្ហាញការគោរព និងនឹកគុណដល់វីរភាពរបស់បុរសវ័យ៤១ឆ្នាំ ដែលទើបទទួលមរភាព ម្នាក់នេះ។
រូបថតរបស់លោកឧកញ៉ា ឬទ្ធី សំណាង ត្រូវបានបង្ហាញយ៉ាងខ្ពស់ត្រដែត នៅក្នុងពិធីលើកពាននេះ ហើយគ្រប់គ្នា នៅក្នុងក្រុមគ្រួសារបាល់ទាត់ភ្នំពេញក្រោន បានឧទ្ទិសការឈ្នះពាននេះ ទៅដល់វិញ្ញានក្ខន្ធប្រធានក្លិបរូបនេះ ដោយក្លិបមួយនេះ បានសរសេរបង្ហោះនៅលើផេចហ្វឹកផ្លូវការរបស់ខ្លួន ក្រោយការឈ្នះពាននេះថា «This one is for you, Boss ដែលមានន័យថា ពានរង្វាន់នេះ សម្រាប់អ្នក, លោកប្រធាន»។
នៅក្រោយការឈ្នះពាននេះ លោក កែវ សុខង៉ន អ្នកចាត់ការទូទៅក្រុមភ្នំពេញក្រោន បានបង្ហោះរូបភាពការកាន់ពាន អមដោយរូបភាពរបស់លោកឧកញ៉ា ឬទ្ធី សំណាង រួចសរសេរថា៖ «គ្រប់ពេលវេលា មិនថា មុនប្រកួត ឬចប់ការប្រកួត មេ តែងតែ call មក ដើម្បីលើកទឹកចិត្តថា មើលក្រុមឱ្យបានល្អ លេងដោយឆន្ទៈ»។
អតីតកីឡាករជម្រើសជាតិកម្ពុជា កែវ សុខង៉ន បានបន្ថែមថា៖«កូនចៅទាំងអស់នឹងខិតខំធ្វើឱ្យអស់ពីកម្លាំងកាយចិត្ត។ នឹកមេ និងសំឡេងមេ BOSS RITHY SAMNANG ។ ជ័យជំនះមួយនេះ សម្រាប់មេ ហើយភ្នំពេញក្រោន គឺយើងនៅជាមួយគ្នា បេះដូងតែមួយ ក្រុមតែមួយ គ្រួសារតែមួយ»។
ជាមួយការឈ្នះពានរង្វាន់ Cambodian League Cup 2022 នេះដែរ លោកជំទាវ សុក ស៊ីដា ដែលជាម្តាយរបស់លោកឧកញ៉ា ឫទ្ធី សំណាង មានថ្លែងថា៖ «អរគុណសម្រាប់អ្នកគាំទ្រ ក្រុមកីឡាករ និងថ្នាក់ដឹកនាំ គ្រូបង្វឹក ទាំងអស់ ដែលបានប្រឹងប្រែងសម្រាប់ពានរង្វាន់មួយនេះ ហើយខ្ញុំជឿជាក់ថា កូនប្រុសខ្ញុំ (លោកឧញ៉ា ឬទ្ធី សំណាង) នឹងរីករាយជាមួយអ្នកទាំងអស់គ្នា»។
គួរបញ្ជាក់ថា ការឈ្នះពានរង្វាន់ខេមបូឌានលីគខាប់ ឆ្នាំ២០២២ នេះ គឺបន្ទាប់ពីភ្នំពេញក្រោន បានយកឈ្នះក្រុមវិសាខា ២-១ ក្នុងការប្រកួតផ្តាច់ព្រ័ត្រ នៅកីឡដ្ឋានស្មាតអអេសអ៊ិន កាលពីយប់ថ្ងៃសៅរ៍ ដោយគ្រាប់បាល់ទាំង២នេះ រកបានដោយខ្សែប្រយុទ្ធ ប្រាក់ ធីវ៉ា នៅទីទី៥០ និងកីឡាករជប៉ុន Yudai Ogawa នៅនាទីទី៨៧ គឺបន្ទាប់ពីខ្សែការពារ Khan Mohammed Faeez របស់ក្រុមវិសាខា បានតែតបញ្ចូលទី១គ្រាប់ តាមស្មើវិញ នៅនាទីទី៨៣៕
