ក្រុមជម្រើសជាតិកម្ពុជា នឹងត្រូវបើកទ្វារពហុកីឡដ្ឋានជាតិមរតកតេជោ ដើម្បីស្វាគមន៍ក្រុមជម្រើសជាតិទីម័រខាងកើត សម្រាប់ការប្រកួតមិត្តភាពអន្តរជាតិ នាព្រលប់ម៉ោង៧ ថ្ងៃព្រហស្បតិ៍នេះ ខណៈការវិលមកជួបគ្នាជាថ្មីនេះ គ្រូបង្គោល និងអ្នកដឹកនាំរបស់ក្រុមទាំង២ មានផ្តោតទៅលើទិសដីខុសគ្នា។
បើទោះបីជា ក្រុមទីម័រខាងកើត ធ្លាប់បានឈ្នះក្រុមម្ចាស់ផ្ទះកម្ពុជា ១-០ សម្រាប់ការប្រកួតពានរង្វាន់ AFF U23 Championship 2022 នៅពហុកីឡដ្ឋានជាតិនេះ កាលពីខែកុម្ភៈ ប៉ុន្តែគ្រូបង្គោលក្រុមទីម័រ លោក Fábio Joaquim Maciel da Silva បានមើលឃើញថា ការវិលមកជួបគ្នាជាថ្មីនេះ វានឹងក្លាយជាការប្រកួតដ៏តានតឹង ជាមិនខានឡើយ។
គ្រូបង្វឹកក្រុមជម្រើសជាតិទីម័រខាងកើត រូបនេះ បាននិយាយ ក្នុងសន្និសីទកាសែត កាលពីថ្ងៃពុធថា៖ «ខ្ញុំសប្បាយចិត្ត ដែលបានមកកម្ពុជាម្តងទៀត ហើយសម្រាប់ការប្រកួតនេះ ខ្ញុំគិតថា នឹងមានភាពស្វិតស្វាញ ព្រោះកម្រិតលេងរបស់ក្រុមទាំង២នេះ មិនលើសខ្វះគ្នាប៉ុន្មានទេ អ៊ីចឹងវានឹងបង្កើតឱ្យមានភាពទាក់ទាញ សម្រាប់អ្នកគាំទ្រ ឱ្យចូលរួមទស្សនាផ្ទាល់ពេញកីឡដ្ឋាន ជាមិនខានឡើយ ហើយទស្សនីយភាពល្អៗជាច្រើន នឹងកើតមានឡើង សម្រាប់ការប្រកួតនេះ»។
ជាមួយគ្នានេះ លោក Fábio Joaquim Maciel da Silva បានគិតទុករួចទៅហើយថា កូនក្រុមរបស់លោក នឹងទទួលបានផលចំណេញ ពីការប្រកួត ដែលមានអ្នកគាំទ្រ ចូលរួមច្រើន នៅថ្ងៃនេះ។ «ទីម័រ មិនមានការប្រកួតជម្រុះអ្វីទៀតនោះទេ អ៊ីចឹងការប្រកួតនេះ វាជាបានក្លាយជាឱកាសដ៏ល្អ សម្រាប់កីឡាករវ័យក្មេងរបស់យើង បានដកស្រងបច្ចេកទេស និងពង្រឹងសមត្ថភាពបន្ថែម»។
លោកបានបញ្ជាក់ថា៖«ការជួបគ្នាលើកនេះ វាក៏នឹងជួយពង្រឹងស្មារតីដល់កីឡាករវ័យក្មេងរបស់យើងផងដែរ ព្រោះទាំងការប្រកួតក្នុងស្រុក និងការទៅនៅប្រទេសផ្សេងៗ គឺមិនមានអ្នកគាំទ្រច្រើន ដូចនៅកម្ពុជានោះទេ អ៊ីចឹងការមកប្រកួត នៅកម្ពុជានេះ វានឹងជួយឱ្យកីឡាកររបស់យើង អាចសម្របខ្លួន ទៅនឹងការប្រកួតធំៗ នៅលើឆាកអន្តរជាតិបានកាន់តែល្អ នាពេលខាងមុខនេះ»។
ចំណែកលោក Keisuke Honda អ្នកចាត់ការទូទៅក្រុមជម្រើសជាតិកម្ពុជា បានអះអាងថា ក្រុមគោព្រៃកម្ពុជា ត្រូវយកឈ្នះការប្រកួតឱ្យបាន ដើម្បីលុបលាងការបរាជ័យ នាជំនួបក្នុងពាន AFF U23 Championship ឆ្នាំ២០២២ ប៉ុន្តែលោកបានគិតទុករួចទៅហើយថា ការចង់សម្រេចបំណងនេះ វាមិនមែនជារឿងងាយស្រួលនោះទេ។
លោក Honda បាននិយាយ នៅក្នុងសន្និសីទកាសែត កាលពីថ្ងៃពុធនោះដែរថា៖ «យើងមានការប្រកួត AFC Asian Cup ដ៏សំខាន់ នៅឥណ្ឌា អ៊ីចឹងការជួបក្រុមទីម័រ លើកនេះ ជាការប្រកួតត្រៀមខ្លួនដ៏ល្អមួយ ហើយការប្រកួតនេះ យើងត្រូវការឈ្នះ ព្រោះយើងបានដឹងហើយថា កាលពីប្រកួតពាន AFF U23 Championship យើងបានចាញ់ក្រុមទីម័រ»។
វីរបុរសបាល់ទាត់របស់ជប៉ុនរូបនេះ បានបន្ថែមថា៖«ការជួប ទីម័រ មិនមែនជាការប្រកួតដ៏ងាយស្រួលមួយនោះទេ ព្រោះ ទីម័រ ជាក្រុម ដែលមានកីឡាករ មានទេពកោសល្យច្រើន។ បើទោះបីជាកាយសម្បទារបស់ពួកគាត់ មិនសូវខ្ពស់ និងធំ ប៉ុន្តែជាក្រុមមួយ ដែលមានកីឡាករ មានបច្ចេកទេសខ្ពស់ អ៊ីចឹងយើងត្រូវមានការប្រុងប្រយ័ត្ន ហើយយើងក៏ត្រូវការតេស្តសមត្ថភាពកីឡាកររបស់យើងដូចគ្នា ដើម្បីត្រៀមការប្រកួត នៅឥណ្ឌា ផងដែរ»៕