ក្រុមនារីជម្រើសជាតិហុកគីកម្ពុជា ដែលបានចាកចេញពីមាតុប្រទេស កាលពីថ្ងៃទី២ ខែមិថុនា នោះ បានកំពុងនឹងផ្តោតខ្លាំង ទៅលើការប្រកួតវគ្គជម្រុះកីឡាអាស៊ី (Women’s ASIAN Games 2022) នៅទីក្រុងហ្សាកាតា ប្រទេសឥណ្ឌូនេស៊ី ដែលនឹងចាប់ដំណើរការប្រកួត នៅថ្ងៃចន្ទនេះ។
បើទោះបីជាការប្រកួតជម្រុះកីឡាអាស៊ី នៅប្រទេសឥណ្ឌូនេស៊ីនេះ ក្រុមនារីហុកគីកម្ពុជា ត្រូវប្រឈមជាមួយក្រុមខ្លាំងៗ ដូចជាម្ចាស់ផ្ទះ ឥណ្ឌូនេស៊ី អ៊ូបេគីស្ថាន ស្រីលង្កា ហុងកុងឆៃណា កាហ្សាក់ស្ថាន និងប្រទេសសិង្ហបុរី ដើម្បីប្រជែងយកកៅអី ឡើងទៅប្រកួតនៅវគ្គបន្ត នៃការប្រកួត Women’s ASIAN Games 2022 នេះ នៅប្រទេសចិន ប៉ុន្តែថ្នាក់ដឹកនាំរបស់សហព័ន្ធកីឡាហុកគីកម្ពុជា បានដាក់ក្តីសង្ឃឹមខ្ពស់ថា ក្រុមនារីរបស់កម្ពុជា មួយនេះ នឹងអាចជម្នះឧបសគ្គទាំងនេះ ដើម្បីបានឡើងទៅវគ្គបន្ត។
លោក កាំង សុធា អគ្គលេខាធិការសហព័ន្ធកីឡាហុកគីកម្ពុជា ដែលកំពុងដឹកនាំក្រុមនារីហុកគីកម្ពុជា នៅប្រទេសឥណ្ឌូនេស៊ី នោះ បាននិយាយថា៖ «នៅក្នុងចំណោមប្រទេសទាំង៧នេះ គឺគេជម្រុះយក៤ក្រុម ដើម្បីឡើងទៅប្រកួតវគ្គបន្ត ហើយកម្ពុជា បានដាក់ក្តីសង្ឃឹមថា យើងត្រូវការឈ្នះ ដើម្បីបានឡើងទៅលេងនៅវគ្គបន្តកីឡាអាស៊ីនេះ នៅប្រទេសចិន គឺយើងមិនចង់ក្លាយជាក្រុម១ ក្នុងចំណោម៣ក្រុមចុងក្រោយ ដែលត្រូវបានកាត់ចេញនោះទេ»។
យ៉ាងណាមិញ សម្រាប់ការប្រកួតបើកឆាក នៅថ្ងៃចន្ទនេះ ក្រុមនារីហុកគីកម្ពុជា ត្រូវជួបក្រុមនារីហុងកុងឆៃណា នារសៀលម៉ោង៤ ហើយការប្រកួតបើកឆាកនេះ ត្រូវបានគេមើលឃើញថា នឹងមានភាពតានតឹងខ្លាំង សម្រាប់ក្រុមកម្ពុជា។ តែទោះបីជាយ៉ាងណា កម្ពុជា បានតាំងចិត្តលេងដោយទំនុកចិត្ត ដើម្បីស្វែងរកលទ្ធផលឈ្នះ។
លោក កាំង សុធា បានបញ្ជាក់ថា៖ «សម្រាប់ការប្រកួតជាមួយក្រុមហុងកុងឆៃណា នៅថ្ងៃនេះ យើងមិនគិតថា គេមានកម្រិតបច្ចេកទេសលើសយើង ឬយើងលើសគេនោះទេ គឺសំខាន់យើងត្រូវតែគិតថា យើងនឹងអាចឈ្នះគេបាន ឬមានប្រៀបលើគេ ព្រោះវាទាល់តែយើងដាក់ចិត្តបែបនេះ ទើបយើងអាចយកឈ្នះគេបាន និងមានឆន្ទៈខ្ពស់ ក្នុងការប្រកួតប្រជែងជាមួយក្រុមផ្សេងៗទៀតបាន»៕
