បរទេស៖ លោក Gareth Southgate បាននិយាយថា ក្រុមបាល់ទាត់ជម្រើសជាតិអាល្លឺម៉ង នៅតែជាគំរូសម្រាប់ក្រុមជម្រើសជាតិអង់គ្លេស ដោយសារតែលទ្ធផលនៃការឈ្នះពានជាច្រើនរបស់ពួកគេ ស្របពេលដែលគ្រូបង្វឹករូបនេះ ត្រៀមរៀបចំក្រុមរបស់លោកសម្រាប់ការប្រកួតក្នុងយុទ្ធនាការ Nations League ក្នុងទីក្រុង Munich នៅរាត្រីនេះ។
អង់គ្លេស នឹងសម្លឹងរកការស្តារមុខមាត់ត្រឡប់មកវិញ ពីការរងបរាជ័យដ៏មិននឹកស្មានដល់របស់ពួកគេ ក្រោមស្នាក្រុមជម្រើសជាតិហុងគ្រី ក្នុងការប្រកួត National League នៅពេលដែលពួកគេត្រូវប៉ះជាមួយនឹងក្រុមម្ចាស់ជើងឯកពិភពលោក៤សម័យកាល អាល្លឺម៉ង់ ក្នុងទីក្រុង Munich។ ក្រុមរបស់លោក Southgate បានផ្តួលអាល្លឺម៉ង់ ដែលជាគូប្រជែងចាស់របស់ខ្លួនក្នុងការប្រកួតវគ្គ១៦ក្រុមចុងក្រោយនៃព្រឹត្តិកាណ៍ Euro ឆ្នាំ២០២០ កាលពីឆ្នាំមុន និងកំពុងតែសង្ឃឹមថា អាចដណ្តើមបានជ័យជម្នះម្តងទៀតនៅរាត្រីនេះ។
ប៉ុន្តែក្រុមជម្រើសជាតិអាល្លឺម៉ង់ បានឈ្នះរាល់ការប្រកួតទាំងអស់ក្រោមការដឹកនាំរបស់គ្រូបង្វឹកថ្មីលោក Hansi Flick ដែលបានចូលកាន់តំណែងជំនួសលោក Joachim Loew បន្ទាប់ពីព្រឹត្តិការណ៍ Euro។ លោក Southgate គ្រូបង្វឹកនៃក្រុមជម្រើសជាតិអង់គ្លេស បានប្រាប់សន្និសីទសារព័ត៌មាននៅមុនពេលការប្រកួតរបស់លោកថា ការប្រកួតនេះ នឹងក្លាយជា «ការល្បងសមត្ថភាពដ៏អស្ចារ្យ» សម្រាប់ក្រុមរបស់លោក ដែលបានរងបរាជ័យក្នុងវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍ World Cup ឆ្នាំ២០១៨ និងបានរងបរាជ័យក្រោមស្នាដៃក្រុមជម្រើសជាតិអុីតាលី ដោយការស៊ុតបាល់ប៉េណាល់ទី ក្នុងការប្រកួត Euro ឆ្នាំ២០២០ វគ្គផ្តាច់ព្រ័ត្រ៕
ប្រភពព័ត៌មាន៖ Channel News Asia