ក្រុមនារីជម្រើសជាតិហុកគីកម្ពុជា នៅតែមិនអាចកែប្រែកំណត់ត្រាចាញ់ នៅពេលពួកគេជួបក្រុមនារីហុងកុង ក្នុងការប្រកួតបើកឆាក នៃវគ្គជម្រុះកីឡាអាស៊ី (Women’s ASIAN Games 2022) នៅទីក្រុងហ្សាកាតា ប្រទេសឥណ្ឌូនេស៊ី កាលពីថ្ងៃចន្ទ ហើយនៅថ្ងៃនេះ ពួកគេ ត្រូវប្រឈមការប្រកួត កាន់តែតានតឹង។
បើទោះបីជាក្រុមនារីហុកគីកម្ពុជា បានតាំងចិត្តប្រកួត ដោយគ្មានការភ័យខ្លាច ប៉ុន្តែក្រុមដែលមានបទពិសោធនៅក្មេងខ្ចីរបស់កម្ពុជាមួយនេះ មិនអាចលុបបំបាត់ភាពជ្រាំដែល ពេលជួបក្រុមនារីហុងកុង បាននោះទេ ដោយពួកគេ បានបន្តចាញ់ ហុងកុង ៥-០។
តែទោះបីជាយ៉ាងណា ការចាញ់ក្រុមហុងកុង ៥-០ វាមិនមែនជាលទ្ធផលដែលអាក្រក់ ដូចពេលពួកគេ ចាញ់ក្រុមនារីហុងកុង ១៤-០ នាជំនួបនាពេលកន្លងមកនោះទេ ហើយនេះជាអ្វី ដែលមន្រ្តីជំនាញរបស់សហព័ន្ធកីឡាហុកគីកម្ពុជា លោក កាំង សុធា មើលឃើញថា ក្រុមនារីហុកគីកម្ពុជា កំពុងមានបច្ចេកទេសកើនឡើង និងមានការអភិវឌ្ឍសមត្ថភាព ដ៏គួរឱ្យកត់សម្គាល់។
អគ្គលេខាធិការសហព័ន្ធកីឡាហុកគីកម្ពុជា លោក កាំង សុធា បានប្រាប់ពីប្រទេសឥណ្ឌូនេស៊ី មកថា៖ «ជាទស្សនៈរបស់សហព័ន្ធកីឡាហុកគីកម្ពុជា គឺយើងអត់ចង់បានលទ្ធផលចាញ់បែបនេះទេ ប៉ុន្តែបើយើងប្រៀបធៀបពីសិទ្ធិផល កន្លងមក ដែលយើងធ្លាប់ចាញ់ដល់ហុងកុង ១៤-០ នោះ គឺយើងសង្កេតឃើញថា បច្ចេកទេស និងការប្រកួតរបស់យើង ល្អ និងអភិវឌ្ឍទៅមុខ គឺសិទ្ធិផលរបស់យើងមានការល្អប្រសើរជាងមុន»។
ជាមួយគ្នានេះ លោក កាំង សុធា បានតម្លាយឱ្យដឹងដែរ ការប្រកួតនេះ ក្រុមនារីហុកគីកម្ពុជា មានជួបការលំបាក ក្នុងការសម្របខ្លួន ទៅនឹងការប្រកួត នៅលើទីលានក្រៅសាល ព្រោះពេលនៅភ្នំពេញ ក្រុមនេះ បានហ្វឹកហាត់ នៅលើវិញ្ញាសា ក្នុងសាល (Indoor) ប៉ុន្តែបែរជា មកប្រកួតនៅលើទីលានហុកគី ទីវាល ដោយមានតារាងធំជាង ក្នុងសាល ទៅវិញ។
យ៉ាងណាក៏ដោយ សម្រាប់ការប្រកួតវិលលើកទី២ នៅរសៀលម៉ោង ២ ថ្ងៃអង្គារនេះ ក្រុមនារីហុកគីកម្ពុជា នឹងត្រូវប្រឈមការប្រកួតកាន់តែតានតឹង ដោយពួកគេត្រូវប៉ះក្រុមស្រីលង្កា មុនពេលពួកគេ បន្តទៅជួបក្រុមអ៊ូបេគីស្ថាន កាហ្សាក់ស្ថាន សិង្ហបូរី និងក្រុមម្ចាស់ផ្ទះឥណ្ឌូនេស៊ី។
សម្រាប់ការប្រកួតនៅថ្ងៃនេះ លោក កាំង សុធា បានបង្ហើបឱ្យដឹងថា៖«ចំពោះក្រុមស្រីលង្កា ដែលយើងត្រូវជួបជាបន្តទៀត នៅថ្ងៃនេះ ក៏ធ្លាប់បានយកឈ្នះលើក្រុមនារីហុកគីរបស់យើង ច្រើនគ្រាប់ដែរ តែការជួបគ្នាលើកនេះ យើងនៅមិនទាន់ដឹងថា លទ្ធផល នឹងទៅជាយ៉ាងណានោះទេ គឺលុះត្រាតែប្រកួតចប់ ទើបដឹង ហើយក្រុមរបស់យើង នៅតែមានឆន្ទៈខ្លាំង ក្នុងការប្រកួតប្រជែង»៕
