ក្រុមកីឡាករ កីឡាការិនីជម្រើសជាតិបាល់ទាត់កម្ពុជា ទាំងឈុតអាយុលក្រោម១៦ អាយុក្រោម១៨ឆ្នាំ និងក្រុមអាយុក្រោម១៩ឆ្នាំ សុទ្ធតែមានភារកិច្ច ត្រូវចេញទៅប្រកួតប្រជែង ក្នុងពានរង្វាន់ AFF ដែលរៀបចំឡើងដោយសហព័ន្ធកីឡាបាល់ទាត់អាស៊ីអាគ្នេយ៍ (AFF) ខណៈការប្រកួតទាំង៣កម្រិតនេះ នឹងត្រូវធ្វើឡើង នៅប្រទេសឥណ្ឌូនេស៊ី ទាំងអស់។
តាមរយៈការប្រកួតនេះ ក្រុមជម្រើសជាតិបាល់ទាត់កម្ពុជា អាយុក្រោម១៩ឆ្នាំ នឹងត្រូវចេញដំណើរទៅ កាន់ការប្រកួតពានរង្វាន់ AFF U19 BOYS CHAMPIONSHIP 2022 នៅប្រទេសឥណ្ឌូនេស៊ី។ បើទោះបីជា ពេលនេះ កម្ពុជា បាននឹងកំពុងធ្វើតេស្តជ្រើសរើសយកកីឡាករ ដែលមានសមត្ថភាព និងទេពកោសល្យ សម្រាប់ត្រៀមចូលរួមការប្រកួតនេះ ប៉ុន្តែពានរង្វាន់ AFF U19 នេះ បានកំណត់ពេលវេលាប្រកួតរួចរាល់ហើយ គឺត្រូវចាប់ផ្តើមពីថ្ងៃទី២ ដល់ថ្ងៃទី១៥ ខែកក្កដា ឆ្នាំ២០២២។
ជាមួយគ្នានេះ ការចាប់ឆ្នោតបែងចែកពូល ក៏ត្រូវបានធ្វើរួចរាល់ កាលពីថ្ងៃព្រហស្បតិ៍ម្សិលមិញនេះ ដោយក្នុងនោះ មាន២ពូល ហើយក្រុមU19កម្ពុជា បានឈរនៅពូលB ជាមួយក្រុមម៉ាឡេស៊ី ទីម័រខាងកើត ឡាវ និង សិង្ហបុរី។
ចំណែកក្រុមកីឡាការិនីជម្រើសជាតិកម្ពុជាអាយុក្រោម១៨ឆ្នាំ នឹងត្រូវធ្វើដំណើរ ទៅកាន់ប្រទេសឥណ្ឌូនេស៊ីផងដែរ ដើម្បីចូលរួមការប្រកួតពានរង្វាន់ AFF U18 WOMEN’S CHAMPIONSHIP 2022 ដែលនឹងប្រព្រឹត្តទៅចាប់ពីថ្ងៃទី ២២ ខែកក្កដា ដល់ថ្ងៃទី៤ ខែសីហា ឆ្នាំ២០២២ ហើយតាមការចាប់ឆ្នោត កាលពីម្សិលមិញ គឺក្រុមនារីកម្ពុជា បានឈរពូល A ជាមួយក្រុមវៀតណាម ថៃ ឥណ្ឌូនេស៊ី និងសិង្ហបុរី។
យ៉ាងណាមិញ ក្រុមយុវជនថ្នាលរបស់កម្ពុជា នឹងត្រូវធ្វើដំណើរទៅកាន់ប្រទេសឥណ្ឌូនេស៊ី ក្រោយគេ ដើម្បីចូលរួមប្រកួតប្រជែង ពានរង្វាន់ AFF U16 BOYS CHAMPIONSHIP 2022 ដែលនឹងប្រព្រឹត្តទៅ ចាប់ពីថ្ងៃទី៣១ ខែកក្កដា ដល់ថ្ងៃទី១៣ ខែសីហា ឆ្នាំ២០២២ ហើយក្រុមU16កម្ពុជា ឈរនៅពូលC ជាមួយអូស្រ្តាលី ម៉ាឡេស៊ី និងមីយ៉ាន់ម៉ា៕
