នៅទីបំផុត ក្រុមសម្បូរបទពិសោធលេងនៅលើទីលានហ្វុតសាល ឪម៉ាល់អេហ្វស៊ី នៅតែអាចមានសមត្ថភាព យកឈ្នះលើក្រុមខ្មែរនគរអេហ្វស៊ី ជាថ្មីម្តងទៀត ដើម្បីឡើងទៅកាន់ការប្រកួតវគ្គពាក់កណ្តាលផ្តាច់ព្រ័ត្រនៃពានរង្វាន់បាល់ទាត់ក្នុងសាល ថ្នាក់ជាតិ ឆ្នាំ២០២១ ដោយពួកគេ ត្រូវជម្នះបញ្ជីចាស់ជាមួយក្រុម Tai Chi FT។
សម្រាប់យកឈ្នះលើក្រុមខ្មែរនគរអេហ្វស៊ី ៩-៤ សម្រាប់ការប្រកួតខ្វែងរវាងក្រុមលេខ៣ និងក្រុមលេខ៤ កាលពីថ្ងៃអាទិត្យ ម្សិលមិញនេះ វាមិនមានអ្វីប្លែកនោះទេ សម្រាប់ក្រុមឪម៉ាល់ ព្រោះពួកគេ ធ្លាប់បានយកឈ្នះក្រុមខ្មែរនគរ ដោយលទ្ធផល ៧-១ ម្តងហើយ សម្រាប់ការជួបគ្នា នៅវគ្គដំណាក់កាលទី២។
តែទោះបីជាយ៉ាងណា ការប្រកួតគ្នា កាលពីម្សិលមិញនេះ ក្រុមខ្មែរនគរ ក៏បានផ្តល់ភាពក្តីបារម្ភ ដល់ក្រុមឪម៉ាល់ ផងដែរ ខណៈពួកគេ អាចវាយបករកបានគ្រាប់បាល់នាំមុន ក្រុមឪម៉ាល់ ៤-២ វិញ នៅក្នុងតង់ទី២នោះ ប៉ុន្តែឈានចូលតង់ទី២ ក្រុមឪម៉ាល់ បានផ្លាស់ប្តូរបច្ចេកទេសលេង ដោយទម្លាក់មកលេងនៅតំបន់កណ្តាលភាគច្រើន រួចវាយបកលឿនៗ នៅពេលបានបាល់ ហើយតាក់ទិចមួយនេះ អាចធ្វើឱ្យពួកគេ រកបាន៧គ្រាប់វិញ ដើម្បីយកឈ្នះក្រុមខ្មែរនគរ ៩-៤ យ៉ាងរំភើបបំផុត។
ទាក់ទងទៅនឹងបច្ចេកទេសនៃការលេងវាយបក យកឈ្នះក្រុមខ្មែរនគរ ៩-៤ នេះ កីឡាករឆ្នើម ឡាក់ ភីរុណ ដែលរកបាន៤គ្រាប់តែម្នាក់ឯងនោះ បាននិយាយ ក្រោយការប្រកួតថា៖ «សម្រាប់តង់ទី១ យើងធ្វើអត់សូវបានល្អទេ ហើយវាស្របពេលក្រុមខ្មែរនគរ នៅកម្លាំងពេញដូចគ្នា អ៊ីចឹងយើងបានកែចំណុចខ្វះខាត នៅតង់ទី១នេះ ហើយនៅតង់ទី២ យើងធ្វើបានល្អ ខណៈខ្មែរនគរ រាងថយកម្លាំងខ្លះដែរ»។
យ៉ាងណាក៏ដោយ បន្ទាប់ពីទម្លាក់ក្រុមខ្មែរនគរ នេះហើយ ក្រុមឪម៉ាល់ នឹងត្រូវប្រឈមការប្រកួតកាន់តែតានតឹង ដោយពួកគេ ត្រូវឡើងទៅជួបក្រុម Tai Chi FT ដែលពួកគេ ធ្លាប់ចាញ់ ២-១ នៅវគ្គពាក់កណ្តាលផ្តាច់ព្រ័ត្រ ដោយក្រុមទាំង២នេះ នឹងត្រូវប្រកួតគ្នា នៅថ្ងៃទី១៩ ខែមិថុនា ហើយក្រុមឈ្នះ ត្រូវឡើងទៅប្រកួតផ្តាច់ព្រ័ត្រ ជាមួយក្រុម The Blue Warriors FC នៅថ្ងៃទី២៦ ខែមិថុនា ឆ្នាំ២០២២។
សម្រាប់ការឡើងទៅជួបក្រុម Tai Chi FT នៅវគ្គពាក់កណ្តាលផ្តាច់ព្រ័ត្រនេះ កីឡាករ ឡាក់ ភីរុណ បានបញ្ជាក់ថា៖ «តាមប្រវត្តិ យើងធ្លាប់ជួបក្រុម Tai Chi FT រាល់ឆ្នាំ ដោយក្នុង១ឆ្នាំៗ យើងអាចជួបគ្នា ពី២ទៅ៣ប្រកួត ចំណែកលទ្ធផល មានឈ្នះ មានចាញ់ ប៉ុន្តែតិចៗគ្រាប់ទេ ដោយសារក្រុមទាំង២នេះ មានសមត្ថភាពប្រហាក់ប្រហែលគ្នា»។
ម្ចាស់អាវលេខ៦ ឡាក់ ភីរុណ បានបន្ថែមថា៖ «តែទោះបីជាយ៉ាងណា ក្រុមឪម៉ាល់ តែងតែមានឆន្ទៈថា នឹងបានឡើងទៅដល់វគ្គផ្តាច់ព្រ័ត្រ ហើយឆ្នាំនេះ យើងជឿថា នឹងបានឡើងទៅដល់វគ្គផ្តាច់ព្រ័ត្រទៀត ហេតុនេះ យើងនឹងយកចំណុចខ្វះខាត ពេលប្រកួតជាមួយក្រុមខ្មែរនគរ នេះ ទៅកែប្រែបន្ថែម ដើម្បីទៅលេងជាមួយក្រុម Tai Chi នៅវគ្គពាក់កណ្តាលផ្តាច់ព្រ័ត្រ»៕