បរទេស៖ អ្នកចាត់ការទូទៅក្រុម AS Roma លោក Jose Mourinho មានបំណងចង់នាំយកអតីតកូនក្រុម Gareth Bale មករួមការងារសាជាថ្មីជាមួយក្លឹប ដែល មានមូលដ្ឋាននៅរដ្ឋធានីប្រទេសអ៊ីតាលី បន្ទាប់ពីកីឡាករសញ្ជាតិវេលស៍រូបនេះនិងចាកចេញពី ក្រុម Real Madrid ដោយគ្មានតម្លៃខ្លួន (Free Transfer) ។
គួរបញ្ជាក់ថាកិច្ចសន្យារបស់ខ្សែប្រយុទ្ធស្លាបវ័យ៣២ឆ្នាំរូបនេះជាមួយក្រុមជើងឯក Champions League នឹងផុតកំណត់នៅចុងខែមិថុនានេះ ហើយក្រោយចំណាយពេល៩ឆ្នាំនៅទឹកដី Santiago Bernabeu ទោះយ៉ាងណា Bale បានរក្សាពីគោលជំហរក្នុងការស្វែងរកក្លឹបថ្មី ក្រោយពីមានក្លឹបជាច្រើន បានបង្ហាញពីការចាប់អារម្មណ៍ចង់បាន។
កន្លងមកRoma បានក្លាយជាក្លឹបដែលផ្ទេរយកកីឡាករអង់គ្លេសមករួមក្រុមមានដូចជា Chris Smalling, Tammy Abraham និង Ainsley Maitland-Niles ដើម្បីស្តារអាជីពរបស់ពួកគេក្រោយមិនអាចជាប់ជម្រើសដំបូងទៀងទាត់សម្រាប់ក្រុមឈុតធំ។ ដូច្នេះ Bale អាចនឹងក្លាយជាសមាជិកបន្ទាប់ ក្រោយពីមានទំនាក់ទំនងជិតស្និទ្ធជាមួយអ្នកចាត់ការទូទៅលោក Mourinho កំលុងពេលលេងខ្ចីជើង ចុងក្រោយជាមួយក្រុមមាន់ខ្នាយមាស Tottenham Hotspur កាលពីឆ្នាំមុន៕
ប្រភពព័ត៍មាន: Sportskeeda
