បរទេស៖ ក្លិបញញួរធំ West Ham កំពុងតែស្ថិតយ៉ាងប្រកៀកក្នុងការបំពេញការផ្ទេរខ្សែការពារ Nayef Aguerd ពីក្លិប Rennes ក្នុងតម្លៃខ្លួន៣០លានផោន (ស្មើនឹង៣៧លានដុល្លារអាមេរិក)។ Aguerd វ័យ២៦ឆ្នាំ ត្រូវបានលោក David Moyes ចាត់ទុកថា ជាគោលដៅរបស់លោក ក្នុងការជួយឲ្យ West Ham ប្រជែងរកចំណាត់ថ្នាក់កំពូលទាំង៦។
ខ្សែការពារអន្តរជាតិម៉ារ៉ុករូបនេះ បានបង្ហាញខ្លួន៦៦លើកក្នុងការប្រកួតក្របខ័ណ្ឌលីគ សម្រាប់ក្រុមបារាំង Rennes ក្រោយពីផ្ទេរមកពីក្លិប Dijon ក្នុងឆ្នាំ២០១០។ ក្នុងសារលាគ្នាមួយដែលត្រូវបានបង្ហោះនៅលើបណ្តាញសង្គម Aguerd បាននិយាយថា វាគឺជាការសម្រេចចិត្តដ៏លំបាកមួយក្នុងការចាកចេញពី Rennes ខណៈដែលរូបគេបានជួបពេលវេលាដ៏រីករាយនៅទីនោះ។ Aguerd ដែលបានបង្ហាញខ្លួនជាអន្តរជាតិ២៥លើកសម្រាប់ក្រុមជម្រើសជាតិម៉ារ៉ុក ក៏មានវត្តមានផងដែរ ក្នុងពេលក្រុមជម្រើសជាតិរបស់គេឈានទៅវគ្គ៨ក្រុមចុងក្រោយនៃយុទ្ធនាការ Africa Cup of Nations កាលពីរដូវកាលមុន។
រូបគេក៏បានលេងក្នុងការប្រកួតវគ្គ Playoff ទាំង២ជើងផងដែរ ពេលប្រកួតជាមួយនឹងក្រុមជម្រើសជាតិកុងហ្គោ ខណៈដែលម៉ារ៉ុក បានឈ្នះកៅអី World Cup ក្នុងប្រទេសកាតា។ វាត្រូវបានគេយល់ឃើញថា Aguerd ទំនងដូចជាត្រូវពិនិត្យសុខភាពជាមួយនឹងក្លិប West Ham នៅថ្ងៃចន្ទនេះ៕
ប្រភពព័ត៌មាន៖ BBC
