ក្រុម Tai Chi FT មិនអាចរក្សាកំណត់ត្រាឈ្នះលើក្រុមឪម៉ាល់ ដើម្បីបានឡើងទៅកាន់វគ្គផ្តាច់ព្រ័ត្រ ក្នុងការប្រកួតពានរង្វាន់បាល់ទាត់ក្នុងសាល ថ្នាក់ជាតិ ឆ្នាំ២០២១ ជាលើកដំបូង បាននោះទេ។ ផ្ទុយទៅវិញ ក្រុមមួយនេះ បានចាញ់ ៣-២ និងត្រូវធ្លាក់ចេញពីការប្រកួតនេះ ត្រឹមវគ្គពាក់កណ្តាលផ្តាច់ព្រ័ត្រ ដ៏គួរសោកស្តាយបំផុត។
តាមរយៈការប្រកួត កាលពីថ្ងៃអាទិត្យ ម្សិលមិញនេះ កីឡាករឆ្នើម ឡាក់ ភីរុណ រកបានគ្រាប់បាល់នាំមុខឱ្យក្រុមឪម៉ាល់ បានមុន នៅនាទីទី៩ តែត្រូវបាន ព្រំ ឌីយ៉ាម៉ង់ ស៊ុតតាមស្មើឱ្យក្រុម Tai Chi វិញ នៅចុងតង់ទី១នេះ។ តែទោះបីជាយ៉ាងណា នៅតង់ទី២ ក្រុមឪម៉ាល់ រកបាន២គ្រាប់ជាប់ៗគ្នា នៅក្នុងនាទីទី២៦ ដោយកីឡាករ ញឹក ថាលីដា និងកីឡាករពាក់លេខ៧ នៅមុនពេលខ្សែប្រយុទ្ធ កែវ ចាន់ពិសិដ្ឋ វាយបកបានគ្រាប់បាល់ទី២ឱ្យក្រុម Tai Chi នៅនាទីទី៣៦។
ចំពោះការចាញ់ក្រុមឪម៉ាល់ ៣-២ វិញ ដែលពួកគេធ្លាប់ឈ្នះ ២-១ ក្នុងវគ្គដំណាក់កាលទី២នោះ បានធ្វើឱ្យគ្រូបង្វឹកក្រុម Tai Chi លោក បាន សុភ័ក្របញ្ញា មិនសប្បាយចិត្តនោះទេ ដោយលោកបានទម្លាក់ការចាញ់ទាំងប្រផិតប្រផើយ ៣-២ ដ៏គួរឱ្យសោកស្តាយបំផុតនេះ វាជាការរួមចំណែកពីការកាត់សេចក្តី មិនច្បាស់លាស់របស់លោកអាជ្ញាកណ្តាល ប្រាក់ ព្រហស្បតិ៍វិសាល។
លោក បាន សុភ័ក្របញ្ញា បាននិយាយរិះគន់ដល់អាជ្ញាកណ្តាល ក្រោយការប្រកួតថា៖ «ក្រុមទាំង២នេះ លេងដោយ Fair Play ប៉ុន្តែខ្ញុំមានអារម្មណ៍មួយ ទាក់ទងនឹងអាជ្ញាកណ្តាល គឺមិនមែនគាត់លម្អៀងនោះទេ គ្រាន់តែថា ខ្ញុំចង់ឱ្យគាត់កាត់សេចក្តីការប្រកួតជាបន្តទៀត ក្នុងពានរបស់សហព័ន្ធនេះ ឱ្យច្បាស់លាស់បន្តិច»។
គ្រូបង្គោលរូបនេះ បានបន្តថា៖ «ដូចជាគ្រាប់បាល់ទី៣ គឺគ្រាប់ហ្នឹង គាត់ (អាជ្ញាកណ្តាល) ឱ្យបាល់ទៅខាង Tai Chi បន្ទាប់មកកីឡាករ Tai Chi ឡើងទៅលើហើយ ប៉ុន្តែគាត់ប្តូរទៅឱ្យខាងក្រុមឪម៉ាល់លេងវិញ អ៊ីចឹងចង់សួរថា ខាងខ្ញុំមានកម្លាំងពីណា មកចុះទប់ទាន់ពេល»។
លោក បាន សុភ័ក្របញ្ញា បានបញ្ជាក់ថា៖ «គ្រាប់ទី១ និងទី២ ខ្ញុំឯកភាពថា ជាកំហុសបច្ចេកទេសរបស់កីឡាករខ្ញុំ ប៉ុន្តែគ្រាប់បាល់ទី៣ ខ្ញុំសឹងតែឈប់ប្រកួត ប៉ុន្តែខ្ញុំនៅតែទ្រាំបន្តទៀត ព្រោះហ្គេមនេះ គឺជាហ្គេមមួយ ដែលយើងឱ្យមហាជន ទាំងអ្នកចូលរួមផ្ទាល់ និងទស្សនាការផ្សាយផ្ទាល់ ឱ្យឃើញថា ល្អទាំងអស់។ ហេតុនេះខ្ញុំសំណូមពរហើយ សំណូមពរទៀត គឺសូមឱ្យគាត់ មានការកាត់សេចក្តីឱ្យបានច្បាស់លាស់ ព្រោះ១គ្រាប់ៗរបស់ក្រុមមួយៗ ចំណាយច្រើនណាស់ ហើយការរិះគន់របស់ខ្ញុំនេះ គឺដើម្បីស្ថាបនាទៅមុខទៀត តែប៉ុណ្ណោះ»។
ផ្ទុយពីនេះក្រុមឪម៉ាល់អេហ្វស៊ី មានការរីករាយយ៉ាងខ្លាំង ដែលពួកគេ បានរួមគ្នាទម្លាក់ក្រុម Tai Chi FT ដូចការគ្រោងទុកនោះ ហើយជ័យជម្នះដ៏សំខាន់នេះ បានជួយឱ្យក្រុមចាស់វស្សាមួយនេះ ឡើងទៅកាន់វគ្គផ្តាច់ព្រ័ត្រ ជាលើកទី៤ នៅថ្ងទី២៦ ខែមិថុនា ខាងមុខនេះ ដោយ ឪម៉ាល់ ត្រូវជួបក្រុម The Blue Warriors FC ដែលពួកគេ ធ្លាប់ឈ្នះ ៥-០ នាជំនួបក្នុងវគ្គដំណាក់កាលទី២ កន្លងមកនេះ៕