កីឡាករកម្ពុជា ដែលកំពុងផ្ញើខ្លួន នៅស្រុកថៃ សុខ ធី ហៅ កាកា បានរកឃើញជ័យជម្នះយ៉ាងសំខាន់ ដើម្បីបង្ហាញទង់ជាតិកម្ពុជា នៅលើសង្វៀនដ៏ធំរបស់ថៃ U MUAY កាលពីយប់ថ្ងៃចន្ទ ម្សិលមិញ ប៉ុន្តែកីឡាករវ៉ៃក្បាច់ សែន រ៉ាដេត បានទទួលបរាជ័យដ៏គួរឱ្យសោកស្តាយ ហើយបានត្រឹមស្ពាយត្រឡប់មកស្រុកវិញ។
តាមរយៈការប្រកួតចំនួន៥ទឹក កាលពីយប់មិញនេះ សុខ ធី ដែលបានចាកចេញពីប្រទេសកម្ពុជា ទៅហ្វឹកហាត់ និងរស់នៅប្រទេសថៃនោះ ធ្វើបានល្អណាស់ ដើម្បីយកឈ្នះកីឡាករកំពុងឡើងកូដរបស់ថៃ ផេតហ្វូកាស ដោយពិន្ទុ។
បើទោះជាកីឡាករកំពុងឡើងកូដរបស់ថៃ ផេកហ្វូកាស ធ្លាប់ឈ្នះស្ទើរគ្រប់សង្វៀនក្ដី ប៉ុន្តែ សុខ ធី បានបង្ហាញការប្រកួត ដោយភាពជឿជាក់ ជាមួយការវ៉ៃចេញមួយៗ ច្បាស់ៗ! និងមានទម្ងន់ ដែលនាំឱ្យរូបគេ ទទួលបានជ័យជម្នះយ៉ាងរំភើប និងបានប្រាក់រង្វាន់ចូល៦០០០ដុល្លារ វិលទៅផ្ទះវិញ។
ផ្ទុយទៅវិញ កីឡាករជើងខ្លាំង សែន រ៉ាដេត មិនអាចបង្កើតបានកំណត់ឈ្នះ លើអ្នកប្រដាល់ជើងខ្លាំងរបស់ថៃ កោះតៅ ផេតស៊ុមនឹក សម្រាប់ការបង្ហាញខ្លួនជាលើកដំបូង នៅលើសង្វៀនដ៏ធំរបស់ថៃ U MUAY កាលពីយប់មិញនោះទេ ដោយរូបគេ បានចាញ់ពិន្ទុ ទាំងសោកស្តាយ។
យ៉ាងណាក៏ដោយ តាមរយៈការប្រកួត៥ទឹក កាលពីយប់មិញនេះ សែន រ៉ាដេត បានបង្ហាញបច្ចេកទេសប្រកួតយ៉ាងល្អ ដោយបានវ៉ៃប្តូរជាមួយជើងខ្លាំង កោះតៅ ផេតស៊ុមនឹក យ៉ាងប្រុងប្រយ័ត្ន ដើម្បីរក្សាលំនឹងនៃការប្រកួត បានល្អ រហូតដល់ចប់៥ទឹក ហើយជាមួយការប្រកួតដ៏កក្រកើកនោះ អ្នកគាំទ្រកម្ពុជា ភាគច្រើន បានមើលឃើញថា សែន រ៉ាដេត សមតែជាអ្នកឈ្នះ គឺយ៉ាងហោចណាស់ ក៏បានត្រឹមស្មើពិន្ទុដែរ តែលទ្ធផលផ្លូវការ គឺកីឡាករថៃ កោះតៅ ជាអ្នកឈ្នះ នៅក្នុងរាត្រីដ៏រំភើបនេះ។
ជាមួយគ្នានោះ លោក ស៊ន អេលីត ជាគ្រូបង្វឹក និងជាអ្នកដឹកនាំកីឡាករ សែន រ៉ាដេត ទៅប្រកួត នៅប្រទេសថៃ លើកនេះ បានចាត់ទុកការចាញ់ នៅលើសង្វៀន U MUAY នេះ ថាជាបទពិសោធ ដែលយើងបានដឹងខ្លួនឯង កាន់តែច្បាស់ សម្រាប់ការពង្រឹងសមត្ថភាព ឱ្យបានកាន់តែប្រសើរទៀត។
លោក ស៊ន អេលីត បានបង្ហោះសារ បែបនេះ ក្រោយ សែន រ៉ាដេត ចាញ់កីឡាករថៃ នាយប់ ថ្ងៃចន្ទនោះថា៖ «បរាជ័យ លើសង្វៀនធំបំផុតរបស់ថៃ ថ្ងៃនេះ តែយើងទទួលបានបទពិសោធ និងយល់ដឹងពីចំណុចខ្វះខាតខ្លួនឯង។ ត្រឡប់ទៅវិញ តាំងចិត្តពង្រឹងដុសខាត់សមត្ថភាពបន្ថែម។ អ្វីដែលយើងចាប់អារម្មណ៍៨គូ គេរៀបសន្លប់តែ១ប៉ុណ្ណោះ គឺសុទ្ធសឹងជាកីឡាករគុណភាព »៕
