ក្រុមជម្រើសជាតិបាល់ទាត់នារីកម្ពុជា ដែលបានជួបការបរាជ័យយ៉ាងធ្ងន់ធ្ងរ សម្រាប់ការបង្ហាញខ្លួន ជាលើកដំបូង ក្នុងព្រឹត្តិការណ៍ ស៊ីហ្គេម នៅប្រទេសវៀតណាម កាលពីពេលថ្មីៗនេះ បាននឹងកំពុងធ្វើការប្រមូលផ្តុំ សារជាថ្មី នៅមជ្ឈមណ្ឌល និងសាលាកីឡាបាល់ទាត់ជាតិបាទី ដើម្បីត្រៀមខ្លួនចូលប្រកួតពានរង្វាន់បាល់ទាត់នារីប្រចាំតំបន់អាស៊ីអាគ្នេយ៍ (AFF Women’s Championship) នៅប្រទេសហ្វីលីពីន នាខែដើមកក្កដា ខាងមុខនេះ។
សម្រាប់ការប្រកួតពាន AFF Women’s Championship នេះ គ្រូបង្គោលក្រុមនារីកម្ពុជា លោក ប្រាក់ វុទ្ធី មានការជឿជាក់ថា ក្រុមរបស់លោក នឹងអាចរកឃើញជ័យជម្នះ ទៅលើក្រុមឡាវ និងទីម័រខាងកើត ហើយក៏នឹងធ្វើឱ្យបានល្អ ពេលជួបក្រុមខ្លាំងៗផងដែរ បើទោះបីជា ស៊ីហ្គេម នៅប្រទេសវៀតណាម កន្លងមកនេះ ក្រុមនារីកម្ពុជា បានចាញ់ក្រុមជម្រើសជាតិហ្វីលីពីន ៥-០ និងបន្តចាញ់ក្រុមម្ចាស់ផ្ទះ វៀតណាម រហូតដល់ ៧-០ សម្រាប់ការប្រកួតជម្រុះ ក្នុងពូលA ក៏ដោយ។
លោក ប្រាក់ វុទ្ធី បានប្រាប់ប្រព័ន្ធផ្សព្វផ្សាយថា៖ «ដោយសារក្រុមកម្ពុជាយើង ស្ថិតនៅក្នុងពូល B ជាមួយក្រុមវៀតណាម, មីយ៉ាន់ម៉ា, ឡាវ, ទីម័រខាងកើត អ៊ីចឹងក្ដីរំពឹងក៏ដូចជាឆន្ទៈរបស់យើង គឺយើងដាក់គោលដៅ ដើម្បីយកឈ្នះឡាវ និងទីម័រ ហើយបន្តធ្វើឱ្យមានលទ្ធផលល្អ ជាមួយក្រុមវៀតណាម និងមីយ៉ាន់ម៉ា ជាបន្តទៀត»។
ជាមួយគ្នានេះ លោក ប្រាក់ វុទ្ធី បានអះអាងថា តាមរយៈការប្រមូលផ្តុំ តាំងពីថ្ងៃទី១៧ ខែមិថុនា រហូតមកដល់ពេលនេះ កីឡាការិនីទាំង២៥នាក់ ដែលត្រូវបានកោះហៅ ឱ្យប្រមូលផ្តុំហ្វឹកហាត់លើកនេះ គឺពួកគេ មានស្មារតី និងឆន្ទៈ ប្រឹងប្រែងហ្វឹកហាត់ ហើយលោក បានចាត់ទុក ការចូលរួមប្រកួតក្នុងពានរង្វាន់ AFF នេះ ថា ជាការរៀបចំផែនការដំណាក់កាលទី២ ដើម្បីត្រៀមឆ្ពោះទៅ ស៊ីហ្គេម ឆ្នាំ២០២៣ ដែលកម្ពុជា ធ្វើជាម្ចាស់ផ្ទះ។
គ្រូបង្វឹកវ័យ ៥១ឆ្នាំ លោក ប្រាក់ វុទ្ធី បានបញ្ជាក់ថា៖ «អ្វីៗ សុទ្ធតែជាគោលដៅ សម្រាប់ស៊ីហ្គេម ឆ្នាំ២០២៣។ យើងបានរៀបចំគោលដៅ នៃការហ្វឹកហាត់ គោលការណ៍នៃការហ្វឹកហាត់ ទៅតាមដំណាក់កាល ដោយក្នុងនោះ ដំណាក់កាលទី១ គឺការចូលរួមប្រកួតស៊ីហ្គេម នៅវៀតណាម ដែលគិតថា យើងធ្វើបានល្អ ចំពោះការការពារ»។
អតីតគ្រូបង្គោលក្លិបបឹងកេត រូបនេះ បានបន្ថែមថា៖«ចំណែកលើកនេះ យើងនឹងរៀបចំដំណាក់កាលទី២ គឺការការពារ បូកនឹងការវាយបក និងការប្រយុទ្ធបន្ថែមទៀត ហើយជាមួយមួយគ្នានេះ យើងនឹងមានការអភិវឌ្ឍជាបណ្ដើរៗ ទៅលើគុណផលកីឡាការិនីម្នាក់ៗ។ អ៊ីចឹងគ្រប់ការប្រកួតអន្តរជាតិទាំងអស់ ដែលជម្រើសជាតិបាល់ទាត់នារីរៀបចំ គឺសុទ្ធសឹងជាគោលដៅ សម្រាប់ឆ្នាំ២០២៣ ទាំងអស់»៕
