បរទេស៖ ខ្សែប្រយុទ្ធ Gareth Bale បានចូលរួមជាមួយនឹងក្លិប Los Angeles FC ក្នុងកិច្ចសន្យារយៈពេល១២ខែ ក្រោយពីបានចាកចេញពីក្លិប Real Madrid និងបាននិយាយថា រូបគេ «ពិតជាអន្ទះសារក្នុងការចូលលេងណាស់»។
ប្រធានក្រុមនៃក្រុមបាល់ទាត់ជម្រើសជាតិវេលស៍វ័យ៣២ឆ្នាំរូបនេះ បានផ្ទេរដោយគ្មានតម្លៃខ្លួន ក្រោយពីបានចំណាយពេលអស់៩ឆ្នាំ នៅប្រទេសអេស្ប៉ាញ ស្របពេលដែលរូបគេក៏មានជម្រើសក្នុងការបន្តកិច្ចសន្យារហូតដល់ឆ្នាំ២០២៤ផងដែរ។ Bale បានឲ្យដឹងថា៖ «ខ្ញុំពិតជារំភើបណាស់ដែលបានផ្ទេរទៅកាន់ក្លិប LAFC។ នេះគឺជាកន្លែងដ៏ត្រឹមត្រូវសម្រាប់ខ្ញុំ និងក្រុមគ្រួសាររបស់ខ្ញុំ ក៏ដូចជាពេលវេលាដ៏ត្រឹមត្រូវនៃអាជីពរបស់ខ្ញុំ ហើយខ្ញុំពិតជាអន្ទះសារក្នុងការចាប់ផ្តើមធ្វើការជាមួយនឹងក្រុមនេះ និងត្រៀមខ្លួនរួចរាល់ដើម្បីឈ្នះពានបន្ថែមទៀតនៅ Los Angeles»។
ខ្សែប្រយុទ្ធវ័យ២ឆ្នាំរូបនេះ ដែលបានឈ្នះពានក្របខ័ណ្ឌ Champions League ដល់ទៅ៥លើក បានចំណាយពេលអស់៩ឆ្នាំជាមួយនឹងក្លិប Real Madrid។ លោក John Thorrington សហប្រធានក្លិប LAFC និងជាអ្នកចាត់ការទូទៅ បាននិយាយថា៖ «Gareth គឺជាកីឡាករម្នាក់ក្នុងចំណោមកីឡាករដ៏មានថាមពល និងអស្ចារ្យបំផុតក្នុងជំនាន់របស់គេ។ ការបន្ថែមកីឡាករម្នាក់ដែលនឹងនាំយកទេពកោសល្យ និងបទពិសោធក្នុងកម្រិតដ៏ខ្ពស់បំផុត គឺជាឱកាសដ៏អស្ចារ្យដើម្បីធ្វើឲ្យក្លិបរបស់យើងកាន់តែខ្លាំង»៕
ប្រភពព័ត៌មាន៖ BBC
