ក្រុមវិសាខា របស់កម្ពុជា បានបង្កើតរឿង ដែលគ្រប់គ្នា គិតស្មានមិនដល់ គឺការលត់ក្រុមម្ចាស់ជើងឯកលីគកំពូលរបស់ឥណ្ឌូនេស៊ី Bali United រហូតដល់ ៥-២ ហើយជ័យជម្នះដ៏ធំនេះ បានធ្វើឱ្យ វិសាខា អាចក្លាយជាក្រុមដំបូងគេ របស់កម្ពុជា ដែលអាចឆ្លងផុត ការប្រកួតវគ្គជម្រុះចែកពូលនៃរង្វាន់ AFC Cup ដើម្បីឡើងទៅកាន់ការប្រកួតវគ្គបន្ត។
ការយកឈ្នះក្រុមម្ចាស់ផ្ទះ Bali United ដោយលទ្ធផល ៥-២ នេះ វាមិនមែនកើតឡើង ដោយភាពចាយដន្យនោះទេ ប៉ុន្តែជ័យជម្នះនេះ បានកើតឡើង ដោយការសហការគ្នាលេងយ៉ាងល្អរបស់វិសាខា ក្រោមការដឹកនាំរបស់គ្រូបង្គោល មាស ចាន់ណា ហើយគ្រប់គ្នា នៅក្នុងក្លិបវិសាខា ជាពិសេសលោកស្រី កែ សួនសុភី ជាប្រធានក្លិប បានបង្ហាញភាពរំភើបរហូតស្រក់ទឹកភ្នែក សម្រាប់ជ័យជម្នះ កាលពីព្រលប់ថ្ងៃចន្ទ ម្សិលមិញនោះ។
តាមរយៈការប្រកួតនេះ វិសាខា បានបង្ហាញការវាយបក ប្រកបដោយប្រសិទ្ធិភាព ដើម្បីលុបបំបាត់ចោលនូវគ្រាប់បាល់នាំមុខរបស់កីឡាករ Irfan Jaya នៃក្រុមម្ចាស់ផ្ទះ Bali United នៅត្រឹមនាទីទី៩ បន្ទាប់ពីខ្សែប្រយុទ្ធប្រេស៊ីល Paulo Victor បានតែតតាមស្មើឱ្យក្រុមវិសាខា វិញ នៅនាទីទី១៧ នោះ។
បន្ថែមលើនេះ ខ្សែការពារ អ៊ុក សុវណ្ណ រកបានគ្រាប់បាល់នាំមុខឱ្យវិសាខា ២-១ តាមរយៈការស៊ុតបាល់ហ្វ្រីឃីកបញ្ចូលទីយ៉ាងស្អាត និងកម្របំផុតរបស់គេ នៅនាទីទី៤៥ នៅមុនពេលខ្សែប្រយុទ្ធលេងបានល្អជាងគេ របស់កូរ៉េខាងត្បូង Lee Jae-jun បានបន្ថែម១គ្រាប់ទៀត នៅនាទីទី៥៥ ហើយក្រោយមក Paulo Victor ក៏អាចមានឱកាសដោះអាវក្រវាត់ចោល ដើម្បីអបអរការរកបានគ្រាប់បាល់ទី២របស់គេ នៅនាទីទី៦៣ ផងដែរ។
យ៉ាងណាក៏ដោយ អតីតខ្សែប្រយុទ្ធរបស់ក្រុមព្រះខ័នរាជស្វាយរៀង Privat បានស៊ុតទម្លុះសំណាញ់ទីក្រុមវិសាខា បានសម្រេច១គ្រាប់វិញ ឱ្យក្រុម Bali United នៅនាទីទី៨៥ ប៉ុន្តែ អ៊ុក សុវណ្ណ បានស៊ុតទម្លុះទីក្រុម Bali United បាន១គ្រាប់វិញ ហើយក៏ជាគ្រាប់បាល់ទី២របស់គេ នាំឱ្យ វិសាខា ឈ្នះ Bali ៥-២ ដ៏គួរឱ្យភ្ញាក់ផ្អើលផងដែរ។
ជាមួយការដណ្តើមបាន៣ពិន្ទុ ពីក្រុមម្ចាស់ផ្ទះ Bali United បានជួយឱ្យក្រុមវិសាខា បានបង្កើតកំណត់ត្រាថ្មីមួយ ក្នុងនាមជាក្រុមដំបូងគេរបស់កម្ពុជា ដែលបានឈ្នះ២ប្រកួតជាប់ៗគ្នា នៅក្នុងការប្រកួតវគ្គចែកពូល ពានរង្វាន់ AFC Cup 2022 នេះ ព្រោះនៅមុនការប្រកួតនេះ វិសាខា បានយកឈ្នះក្រុម Kaya FC-lloilo របស់ហ្វីលីពីន ២-១ កាលពីថ្ងៃបើកឆាកម្តងរួចហើយ។
ជាមួយគ្នានេះ ក្រុមវិសាខា ក៏មានភាគរយខ្ពស់បំផុត ក្នុងការឈានទៅបំបែកកំណត់ត្រាប្រវត្តិសាស្រ្តថ្មី សម្រាប់ក្រុមតំណាងឱ្យកម្ពុជា ក្នុងការបានឡើងទៅលេងនៅវគ្គ Knockout Stage ជាលើកដំបូងផងដែរ គឺមានន័យថា ឱ្យតែ វិសាខា អាចត្រឹមស្មើ ក្រុម Kedah Darul Aman របស់ម៉ាឡេស៊ី សម្រាប់ការប្រកួតជម្រុះចុងក្រោយ នៅថ្ងៃទី៣០ ខែមិថុនា ខាងមុខនេះ ពួកគេ នឹងអាចសម្រេចទិសដៅ ដ៏សំខាន់នេះ ដោយស្វ័យប្រវត្តិនេះហើយ៕
