បរទេស៖ ថ្ងៃមួយ គឺជាថ្ងៃប្រកួតដ៏ធំមួយក្នុងវិស័យកីឡាបាល់ទាត់ដែលលោក Raihan Fauzi វ័យ២៥ឆ្នាំ បានរង់ចាំ។ ក្លិបក្នុងស្រុករបស់លោក Bandung Persib នឹងត្រូវធ្វើការប្រកួត ជាមួយនឹងក្រុម Persebaya នៅថ្ងៃទី១៧ ខែមិថុនា ហើយការប្រកួតនេះ ប្រព្រឹត្តទៅនៅកីឡដ្ឋាន Gelora Bandung Lautan Api ដែលជាទឹកដីរបស់ Persib។
ក្នុងនាមជាអ្នកគាំទ្រដ៏ស្មោះស្ម័គ្ររបស់ Persib លោក Fauzi បានធ្វើដំណើរទៅចូលរួមទស្សនាការប្រកួត រួមជាមួយនឹងអ្នកគាំទ្រម្នាក់ទៀតគឺ Asep Ahmad Solihin វ័យ២៩ឆ្នាំ។ ពួកគេបានទៅដល់កីឡដ្ឋាននៅម៉ោង៦ល្ងាច ពោលគឺ២ម៉ោងនៅមុនពេលការប្រកួតបើករដូវកាលដើម្បីដណ្តើមពាន President Cup។ លោក Fauzi បានបញ្ជាក់ថា៖ «ស្ថានភាព ស្ថិតក្នុងការគ្រប់គ្រងនៅឡើយនៅម៉ោង៦ល្ងាច។ ប៉ុន្តែនៅម៉ោងប្រហែល៦:៣០ ទៅម៉ោង៧ល្ងាច មន្ត្រីបានបិទច្រកទ្វាកីឡដ្ឋាន ដោយសារតែមានអ្នកទស្សនាពេញទីលានហើយ»។
អ្នកគាំទ្រជាច្រើន មិនអាចចូលក្នុងកីឡដ្ឋានបាន បើទោះបីពួកគេបានទិញសំបុត្រទស្សនាពីប៉ុស្តិ៍ មន្ត្រីរៀបចំការប្រកួតក៏ដោយ។ អ្នកគាំទ្រជាច្រើនបានផ្ទុះកំហឹង ខណៈដែលពួកគេបានព្យាយាមរុញគ្នាចុះឡើង ដើម្បីចូលក្នុងកីឡដ្ឋាន។ លោក Fauzi បានឲ្យដឹងថា៖ «ខ្ញុំមិនអាចដកដង្ហើមបានឡើយ។ មនុស្សជាច្រើនបានរុញខ្ញុំ ហើយខ្ញុំមិនអាចទៅណាបានឡើយ។ ខ្ញុំបានគិតថា ខ្ញុំត្រូវប្រគល់ជីវិតឲ្យព្រះហើយ»។ រាត្រីនោះ បានបញ្ចប់ទាំងភាពជ្រួលច្របល់។ មនុស្ស២នាក់បានស្លាប់ ក្នុងនោះរាប់បញ្ចូលទាំងលោក Ahmad ដែលជាសាច់ញាតរបស់ Fauzi ផងដែរ និងអ្នកគាំទ្រម្នាក់ទៀតរបស់ Persib។ ជនរងគ្រោះទាំងនោះស្ថិតក្នុងចំណោមមនុស្ស៧៨នាក់ដែលបានស្លាប់ក្នុងហេតុការណ៍ទាក់ទងនឹងបាល់ទាត់នៅឥណ្ឌូនេស៊ី ក្នុងរយៈពេល២៨ឆ្នាំចុងក្រោយនេះ។ នេះបើយោងទៅតាមបេសកជនពិសេសរបស់រដ្ឋមន្ត្រីនៃក្រសួងយុវជន និងកីឡា។ ហេតុការណ៍នេះ បានធ្វើឲ្យសុវត្ថិភាពអ្នកគាំទ្របាល់ទាត់ ក្នុងប្រទេសឥណ្ឌូនេស៊ី ស្ថិតក្រោមការចាប់អារម្មណ៍ខ្លាំង៕
ប្រភពព័ត៌មាន៖ Channel News Asia
