ក្រុមអត្តពលិកតំណាងឱ្យគ្រឹះស្ថានសិក្សា ពុទ្ធិកសាកលវិទ្យាល័យសម្តេចអគ្គមហាសេនាបតី ហ៊ុន សែន, បណ្ឌិតសភាបច្ចេកវិទ្យាឌីជីថលកម្ពុជា និងវិទ្យាស្ថានសិក្សាដើម្បីជោគជ័យ សុទ្ធតែដណ្តើមបានមេដាយមាស ពីការប្រកួតកីឡាវាយកូនឃ្លីលើតុ នៃព្រឹត្តិការណ៍កីឡាឧត្តមសិក្សា និងមធ្យមសិក្សា បច្ចេកទេស ថ្នាក់ជាតិ ប្រចាំឆ្នាំ២០២២ ដែលបានបញ្ចប់ កាលពីថ្ងៃពុធ។
តាមរយៈការប្រកួត ដែលបានចាប់ផ្តើមពីថ្ងៃទី២៥ ខែមិថុនា ហើយបានបញ្ចប់ កាលពីព្រឹកម្សិលមិញនេះ ក្រុមអត្តពលិកពុទ្ធិកសាកលវិទ្យាល័យសម្តេចអគ្គមហាសេនាបតី ហ៊ុន សែន ដណ្តើមបានមេដាយមាសច្រើនជាងគេ និងឈរនៅចំណាត់ថ្នាក់លេខ១ គឺមេដាយមាស២ លើវិញ្ញាសាវាគូបុរស របស់កីឡាករ ហេង ដាវីដ និង ឃី តាយ និងមេដាយមាសលើវិញ្ញាសាឯកត្តជនរបស់កីឡាករ ឃី តាយ ហើយក្រុមនេះ ក៏បានមេដាយប្រាក់ចំនួន២ ទៀតផងដែរ។
ចំណែកក្រុមបណ្ឌិតសភាបច្ចេកវិទ្យាឌីជីថលកម្ពុជា បានឈរនៅចំណាត់ថ្នាក់លេខ២ ដោយដណ្តើមបានមេដាយមាស លើវិញ្ញាសាជាក្រុម និងមេដាយសំរឹទ្ធ១ លើវិញ្ញាសាឯកត្តជនបុរសរបស់កីឡាករ វិជ្ជានន្ទ នរៈពិជិត រីឯអតីតកីឡាការិនីគុនល្បុក្កតោ ខៀវ ចិន្តារ័ត្ន បានយកឈ្នះកីឡាការិនី យិន ចាន់រតនា របស់ពិទ្ធិក នៅវគ្គផ្តាច់ព្រ័ត្រ កាលពីព្រឹកមិញ ដើម្បីដណ្តើមបានមេដាយមាស ឱ្យទៅវិទ្យាស្ថានសិក្សាដើម្បីជោគជ័យ ហើយក្រុមវិទ្យាស្ថានខេមអេដ ឈរនៅលេខ៤ ដោយឈ្នះបានមេដាយប្រាក់១ សំរឹទ្ធ៣ និងក្រុមវិទ្យាស្ថានបច្ចេកវិទ្យាកម្ពុជា បានឈរនៅលេខ៥ ដោយឈ្នះបានមេដាយប្រាក់១។
តាមរបាយការណ៍របស់លោក ស៊ុន សុទ្ធារិទ្ធ ជាអគ្គលេខាធិការសហព័ន្ធកីឡាវាយកូនឃ្លីលើតុកម្ពុជា បានឱ្យថា ការប្រកួតកីឡាវាយកូនឃ្លីលើតុ នៃព្រឹត្តិការណ៍កីឡាឧត្តមសិក្សា និងមធ្យមសិក្សា បច្ចេកទេស ថ្នាក់ជាតិ ប្រចាំឆ្នាំ២០២២នេះ មានគ្រឹស្ថានសិក្សាចំនួន៨ បានចូលរួម ដោយមានកីឡាករ៣៦នាក់ និងកីឡាការិនី៤នាក់ ដោយពួកគេ ត្រូវប្រកួត នៅលើវិញ្ញាសាចំនួន៤ ហើយជាលទ្ធផលនៃការប្រកួតនេះ ត្រូវបានលោក ស៊ុន សុទ្ធារិទ្ធ វាយតម្លៃថា ទទួលបានជោគជ័យ ខណៈពិធីបិទនោះ មានការចូលរួមពីលោក ព្រុំ ប៊ុណ្ណយី ទីប្រឹក្សាក្រសួងអប់រំ យុវជន និងកីឡា។
លោក ស៊ុន សុទ្ធារិទ្ធ បានថ្លែងថា៖ «ឆ្លងតាមការប្រកួតអស់រយៈពេល៥ថ្ងៃ ដោយឈរលើស្មារតីចេះអធ្យាស្រ័យទៅវិញទៅមក មិត្តភាពសាមគ្គីភាព បានប្រកាន់ភ្ជាប់នៅគោលការណ៍បទបញ្ញាតិ និងគោលការណ៍បច្ចេកទេស ក្នុងការប្រកួត ធ្វើឱ្យការប្រកួតទទួលបានជោគជ័យ។
គ្រូបង្វឹកជើងចាស់រូបនេះ បានបន្ថែមថា៖ «ដោយកីឡាករ កីឡាការិនី ប្រតិភូនៃវិទ្យាស្ថាន សាកលវិទ្យាល័យ បានគោរពតាមការប្រកួត ជាលក្ខណៈស្របតាមបទបញ្ញា និងមានចិត្តសប្បាយរីករាយ ក្នុងការប្រកួតរវាងសាកលវិទ្យាល័យ ទៅសាកលវិទ្យាល័យមួយទៀត វិទ្យាស្ថានមួយ ទៅវិទ្យាស្ថានមួយ ក្នុងភាពសាមគ្គីគ្នាបានយ៉ាងល្អប្រសើរ បង្កភាពរលូនក្នុងការប្រកួត រហូតដល់ថ្ងៃបិទកម្មវិធី»៕
