ស្ថាប័នកំពូលៗរបស់កម្ពុជា រួមមានក្រសួងអប់រំ យុវជន និងកីឡា, គណៈកម្មាធិការជាតិអូឡាំពិកកម្ពុជា (NOCC) និងសហព័ន្ធកីឡាប្រដាល់គុនខ្មែរ បានដាក់ក្តីរំពឹង ទៅលើសង្វៀនគុនខ្មែរជើងឯកពិភពលោក ឬ World Fight Tournaments 2022 ថា ព្រឹត្តិការណ៍ដ៏សំខាន់នេះ នឹងជួយផ្សព្វផ្សាយវិសាលភាព «គុនខ្មែរ» ទៅកាន់ពិភពលោក
ស្របពេលជាមួយគ្នានេះ ស្តេចប្រដាល់របស់ថៃ Buakaw Banchamek (ប៊ូខាវ) ក៏បានត្រៀមខ្លួនរួចជាស្រេច និងចង់បង្ហាញភាពខ្លាំងរបស់ខ្លួន សម្រាប់ការប្រកួតជាមួយម្ចាស់ខ្សែក្រវាត់មកពីប្រទេសបេឡារុ Varats Dzmitry នៅលើសង្វៀនគុនខ្មែរជើងឯកពិភពលោក នៅពហុកីឡដ្ឋានជាតិមរតកតេជោ នាថ្ងៃពុធ ស្អែកនេះ បន្ទាប់ពីជើងខ្លាំងដ៏ល្បីល្បាញរូបនេះ បានខកខានប្រកួតអស់រយៈពេលចូល៣ឆ្នាំ។
លោក វ៉ាត់ ចំរើន អគ្គលេខាធិការ NOCC បានថ្លែងថា៖ «ពហុកីឡដ្ឋានជាតិមរតកតេជោ ដែលគ្រប់គ្រងដោយ NOCC ស្វាគមន៍ សង្វៀនគុនខ្មែរជើងឯកពិភពលោក ដើម្បីបង្ហាញពីមោទនភាពជាតិយើង ដែលមានពហុកីឡដ្ឋានដ៏ល្អផង និងបង្ហាញពីព្រឹត្តិការណ៍ ដែលនឹងជួយបំផុសឱ្យគុនខ្មែររបស់យើងក្លាយទៅជាក្បាច់គុនមួយមានប្រជាប្រិយភាព នៅលើឆាកអន្តរជាតិផង»។
ការលើកឡើងរបស់អ្នកជំនាញកីឡា លោក វ៉ាត់ ចំរើន ត្រូវបានធ្វើឡើង នៅក្នុងសន្និសីទកាសែត ស្តីពីការប្រកួត World Fight នេះ កាលពីថ្ងៃទី៣០ ខែមិថុនា ហើយលោក វ៉ាត់ ចំរើន ក៏ចាត់ទុក World Fight ជាព្រឹត្តិការណ៍ ដ៏សំខាន់មួយ ក្នុងការជួយជំរុញ ការគាំទ្រផ្នែកកីឡា ក្នុងដំណើរឆ្ពោះទៅកាន់ការប្រកួតស៊ីហ្គេម លើកទី៣២ ឆ្នាំ២០២៣ នៅកម្ពុជាផងដែរ។ លោកបញ្ជាក់ថា៖ «ព្រឹត្តិការណ៍នេះ នឹងក្លាយជាឱកាសមួយ សម្រាប់កម្ពុជា ក្នុងការជំរុញការគាំទ្រឱ្យទៅដល់ស៊ីហ្គេម ឆ្នាំ ២០២៣ អ៊ីចឹងអ្វីៗទាំងអស់ គឺដើម្បីឆ្ពោះទៅឆ្នាំ ២០២៣ ដែលកម្ពុជាធ្វើជាម្ចាស់ផ្ទះ បន្ទាប់ពីយើងបានរង់ចាំអស់រយៈពេល ៦៤ ឆ្នាំ»។
ជាមួយគ្នានោះ លោក ម៉ិល កាដូ តំណាងឱ្យក្រសួងអប់រំ យុវជន និងកីឡា និងលោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ ក៏បានគាំទ្រ និងបានចាត់ទុក ព្រឹត្តិការណ៍ World Fight ជាព្រឹត្តិការណ៍ដ៏សំខាន់ ក្នុងការជួយលើកកម្ពស់គុនខ្មែរ ទៅកាន់ពិភពលោក និងជួយបំផុសចលនាកីឡានៅកម្ពុជា ក្នុងដំណើរឆ្ពោះទៅធ្វើម្ចាស់ផ្ទះស៊ីហ្គេម ជាលើកដំបូងរបស់កម្ពុជា នៅឆ្នាំ២០២៣ ផងដែរ។
ជាមួយគ្នានេះ លោក TONY ANH ប្រធានរៀបចំព្រឹត្តិការណ៍ World Fight បានថ្លែងថា៖«ការរៀបចំឱ្យមានការប្រកួត World Fight នៅប្រទេសកម្ពុជានេះ យើងមានគោលបំណងលើកស្ទួយវិស័យកីឡាគុនខ្មែរ និងទេសចរណ៍នៅកម្ពុជា អ៊ីចឹងនេះជាព្រឹត្តិការណ៍ប្រចាំឆ្នាំដ៏សំខាន់បំផុត ដែលនឹងធ្វើឱ្យគ្រប់បែបយ៉ាងនៅកម្ពុជា ឬក៏ចរន្តសេដ្ឋកិច្ចទាំងអស់អាចចូលរួមចងក្រងឱ្យក្លាយជាប្រធានបទណាមួយ សម្រាប់ជាមោទនភាពជាតិ ហេតុនេះខ្ញុំពិតជារីករាយ និងអរគុណដល់ដៃគូសហការទាំងអស់ ដែលបានរួមគ្នាបង្កើតឱ្យមានព្រឹត្តិការណ៍ដ៏ល្អនេះឡើងនៅកម្ពុជា»។
ជាមួយគ្នានេះ ប៊ូខាវ បានបង្ហាញពីចេតនា ក្នុងការយកព្រឹត្តិការណ៍ដ៏ធំ នៅលើទឹកដីកម្ពុជានេះ ដើម្បីបង្ហាញពីកម្រិតប្រកួតដ៏ល្អរបស់ខ្លួនឡើងវិញ។ ប៊ូខាវ បាននិយាយ ពេលធ្វើដំណើរ មកដល់ព្រលានយន្តហោះអន្តរជាតិភ្នំពេញ កាលពីថ្ងៃអាទិត្យថា៖ «ដោយសារវិបត្តិជំងឺកូវីដ១៩ បានធ្វើឱ្យខ្ញុំ ខកខានឡើងប្រកួតចូល៣ឆ្នាំមកហើយ។ តែទោះបីជាយ៉ាងណា ពេលនេះ ខ្ញុំបានព្យាយាមហ្វឹកហាត់ រក្សានៅកម្រិតបច្ចេកទេស និងទិចនិកបានល្អបំផុត»។
ស្តេចប្រដាល់របស់ថៃ រូបនេះ បានបន្ថែមថា៖ «ខ្ញុំមិនធ្លាប់ជួបដៃគូម្នាក់នេះ ពីមុនមកទេ តែខ្ញុំបានមើលការប្រកួតរបស់គាត់ហើយ ហើយខ្ញុំគិតថា ការប្រកួតនេះ នឹងមានភាពទាក់ទាញ និងរំភើបសប្បាយរីករាយ សម្រាប់អ្នកទស្សនា។ ខ្ញុំធ្លាប់មកប្រកួត នៅកម្ពុជា ២លើកកន្លងមកហើយ ប៉ុន្តែ World Fight ជាព្រឹត្តិការណ៍ធំ អ៊ីចឹងខ្ញុំត្រូវត្រៀមខ្លួនការប្រកួតនេះ ឱ្យបានពេញទំហឹង និងត្រូវខំប្រឹងឱ្យអស់ពីសមត្ថភាព ដើម្បីកុំឱ្យទស្សនិកជន ដែលរង់ចាំទស្សនា មានការខកបំណង»៕