លោកឧត្តមឧត្តមសេនីយ៍ឯក លី កុសល ប្រធានសហព័ន្ធកីឡាវាយសីកម្ពុជា បានជំរុញឱ្យគ្រប់ភាគីពាក់ព័ន្ធ នៃមហាគ្រួសារកីឡាវាយសីកម្ពុជា ត្រូវខិតខំប្រឹងប្រែងរួមគ្នា ដើម្បីឈានទៅបង្កើតបាននូវប្រវត្តិសាស្រ្ត គឺការដណ្តើមបានមេដាយមាស នៅស៊ីហ្គេម លើកទី៣២ ឆ្នាំ២០២៣ ទៅតាមការដាក់សម្ទុះមេដាយរបស់ CAMSOC និងក្រសួងអប់រំ យុវជន និងកីឡា។
នៅក្នុងពិធីបិទ ការប្រកួតកីឡាវាយសី ជ្រើសរើសជើងឯកថ្នាក់ជាតិ ឆ្នាំ២០២១ នៅពហុកីឡដ្ឋានជាតិអូឡាំពិក កាលពីនៅថ្ងៃទី៤ ខែកក្កដា ឆ្នាំ២០២២ គឺលោក លី កុសល បានកោតសរសើរ និងវាយតម្លៃខ្ពស់ ចំពោះកិច្ចសហការយ៉ាងល្អពីប្រតិភូ គ្រូបង្វឹក ពិសេសកីឡាករ កីឡាការិនី ដែលបានខិតខំបញ្ចេញអស់ពីសមត្ថភាព គោរពវិន័យ និងបទបញ្ជាការប្រកួតបានត្រឹមត្រូវ។ រីឯអាជ្ញាកណ្ដាល ចៅក្រម បានអនុវត្តតួនាទី ដោយប្រកាន់ភ្ជាប់នូវភាពយុត្តិធម៌ មិនលំអៀង ជំរុញឱ្យការប្រកួតនេះ មានដំណើរការដោយរលូន និងទទួលបានជោគជ័យ។
តែទោះបីជាយ៉ាងណា ប្រធានសហព័ន្ធរូបនេះ បានជំរុញឱ្យគ្រប់ភាគី ត្រូវបន្តខំប្រឹងប្រែងទៅមុខទៀត កុំបង្អង់។ «ខ្ញុំសូមផ្ដាំផ្ញើដល់ក្មួយៗកីឡាករជ័យលាភី និងអ្នកមិនទាន់ដណ្ដើមបានមេដាយក្ដី សូមកុំបង្អង់ ត្រូវដាក់ចិត្តហ្វឹកហាត់ឲ្យបានទៀងទាត់ជាប្រចាំ ដើម្បីអភិវឌ្ឍ ខ្លួនឱ្យក្លាយជាកីឡាករមានសិទ្ធផលខ្ពស់ ទាំងកីឡាករ គ្រូបង្វឹក និងចៅក្រម អាជ្ញាកណ្ដាល ដើម្បីមានលទ្ធភាព សមត្ថភាពគ្រប់គ្រាន់ធ្វើជាម្ចាស់ផ្ទះ ស្មើមុខមាត់លើឆាកអន្ដរជាតិ»។
លោកឧត្តមឧត្តមសេនីយ៍ឯក លី កុសល បានសង្កត់ធ្ងន់ថា៖ «ទាំងអស់គ្នា ត្រូវប្រឹងប្រែងឱ្យអស់ពីកម្លាំងកាយចិត្ត ដើម្បីមានលក្ខណៈសម្បត្តិគ្រប់គ្រាន់ ក្នុងនាមជាម្ចាស់ផ្ទះ និងជាម្ចាស់ជំនាញកីឡាវាយសី ក្នុងព្រឹត្តិការណ៍កីឡាស៊ីហ្គេមនេះ ដោយត្រូវរួមគ្នាជាធ្លុងមួយចូលរួមកសាងស្នាដៃជាប្រវត្តិសាស្ដ្រ តាមរយៈការដណ្ដើមេដាយជូនជាតិ ក្នុងព្រឹត្តិការណ៍នេះ (ស៊ីហ្គេម)»។
ប្រធានសហព័ន្ធរូបនេះ បានបន្ថែមថា៖ «ជ័យជម្នះ នៅលើឆាកអន្តរជាតិ គឺជាការលើកតម្កើងមុខមាត់ប្រទេសជាតិ ដែលកីឡាករ កីឡាការិនីគ្រប់រូបអាចធ្វើបាន មិនមែនទាល់តែជាមនុស្សអស្ចារ្យពីខាងណាទេ មិនចាំបាច់ត្រូវបំពាក់អាវុធ ដូចកងកម្លាំង ទើបអាចធ្វើបាននោះទេ ដូច្នេះការហ្វឹកហាត់ គោរពវិន័យ ស្តាប់ការណែនាំរបស់គ្រូ មានអត្តចរិកថ្លៃថ្នូរ មានការតាំងចិត្តខ្ពស់ គឺសំខាន់ខ្លាំងណាស់»។
យោងតាមរបាយការណ៍ របស់គណៈកម្មការរៀបចំការប្រកួតកីឡាវាយសី ជើងឯកថ្នាក់ជាតិ ឆ្នាំ២០២១នេះ បានឱ្យដឹងថា ការប្រកួតនេះ មានប្រតិភូ និងកីឡាករ កីឡាការិនីចូលរួមសរុប១៦៤នាក់ (កីឡាករ៨៨នាក់ កីឡាការិនី២៨នាក់ និងថ្នាក់ដឹកនាំកីឡាករ៤៨នាក់) មកពី១៦សមាគម/ក្លិប ដែលធ្វើការប្រកួតលើ៧វិញ្ញាសា។
ជាលទ្ធផលបច្ចេកទេស នៃការប្រកួតប្រជែងយ៉ាងស្វិតស្វាញ ចំនួន៣ថ្ងៃ គឺក្រុមកីឡាវាយសីក្រសួងមហាផ្ទៃ ដណ្ដើមបានមេដាយច្រើនជាងគេ រួមមានមេដាយមាស ២ និងប្រាក់ ៣ ហើយក្លិបក្រសួងសេដ្ឋកិច្ច និងហិរញ្ញវត្ថុ ឈរលេខ២ ដោយដណ្ដើមបានមេដាយមាស ២ និងសំរឹទ្ធ ៣ រីឯសម្ព័ន្ធកីឡាវាយសីខេត្តបាត់ដំបង និងខេត្តកំពង់ចាម ក៏ដណ្ដើមបានមេដាយមាស ១គ្រឿង ដូចគ្នាផងដែរ៕
