ក្រុមប្រតិភូកីឡាប៉េតង់កម្ពុជា រួមមានកីឡាការិនី អ៊ុក ស្រីមុំ និងកីឡាការិនី អ៊ុន ស្រីយ៉ា ក្រោមការដឹកនាំរបស់កញ្ញា គិន សំណាង ជាអគ្គលេខាធិការងសហព័ន្ធកីឡាប៊ូល និងប៉េតង់កម្ពុជា និងលោក ហៀន ថាវរ: មន្រ្តីសហព័ន្ធ រួមទាំងលោក ចាន់ វិចិត្រ ជាមន្រ្តីព័ត៌មាន បានហោះបោះពួយចាកចេញពីអាកាសយានដ្ឋានអន្តរជាតិភ្នំពេញ កាលពីវេលាម៉ោង១២ និង៤០នាទីរំលងអាធ្រាត យប់ថ្ងៃទី៨ ខែកក្កដានេះ ទៅកាន់សហរដ្ឋអាមេរិក ដើម្បីចូលរួមការប្រកួតកីឡាពិភពលោក ឆ្នាំ២០២២នេះ។
បើតាមកញ្ញា គិន សំណាង បានឱ្យដឹងថា ការប្រកួតកីឡាពិភពលោកនេះ មានប្រភេទកីឡាច្រើនចម្រុះ ចំណែកកម្ពុជាបានបញ្ជូនតែផ្នែកប៉េតង់នេះទេ ចូលរួម ដោយកីឡាការិនី អ៊ុក ស្រីមុំ និង អ៊ុន ស្រីយ៉ា របស់យើង នឹងត្រូវប្រកួតលើវិញ្ញាសា២នាក់ទល់២នាក់ និងវិញ្ញាសាវាយកយកពិន្ទុ។
បើទោះបីជា ការប្រកួតនេះ កម្ពុជា បានបញ្ជូនកីឡាការិនីត្រឹម២នាក់ ទៅចូលរួមប្រកួត ប៉ុន្តែអគ្គលេខាធិការង គិន សំណាង បានដាក់ក្តីសង្ឃឹមថា ក្រុមប៉េតង់កម្ពុជា នឹងទទួលបានលទ្ធផលល្អ ព្រោះសហព័ន្ធ មានផែនការច្បាស់លាស់ ក្នុងការសម្រិតសម្រាំងកីឡាការិនី ដែលមានបទពិសោធ និងបច្ចេកទេសខ្ពស់ ដោយធ្លាប់ឆ្លងកាត់ការប្រកួតកម្រិតអន្តរជាតិញឹកញាប់ ព្រមទាំងជាម្ចាស់មេដាយមាសកម្រិតអន្តរជាតិទៀតផង។
គួររំឭកថា សម្រាប់បេក្ខភាពទាំង២នេះ ដែលត្រូវបានបញ្ជូនឱ្យទៅប្រកួតកីឡាពិភពលោក នៅសហរដ្ឋអាមេរិកនេះ សុទ្ធតែជាអ្នកមានថ្វីដៃ និងធ្លាប់ដណ្តើមបានមេដាយមាស ស្ទើគ្រប់កម្រិតទៅហើយ ជាពិសេសវីរកីឡាការិនី អ៊ុក ស្រីមុំ និង អ៊ុន ស្រីយ៉ា ជាដៃគូប្រកួតសហការគ្នាដ៏ល្អ ដែលធ្លាប់ដណ្តើមបានមេដាយមាសស៊ីហ្គេម។ លើសពីនេះ អ៊ុក ស្រីមុំ ក៏ធ្លាប់បានឈ្នះមេដាយមាសពិភពលោក ការប្រកួតជើងឯកពិភពលោក លើវិញ្ញាសាវាយយកពិន្ទុផងដែរ។
ទាក់ទងនឹងការប្រកួតនេះ កីឡាការិនី អ៊ុន ស្រីយ៉ា បានអះអាងថា ត្រៀមខ្លួនយ៉ាងល្អ ដោយធ្វើការហ្វឹកហាត់ និងសមផ្នែកបច្ចេទេសជាមួយកីឡាការិនី អ៊ុក ស្រីមុំ ដើម្បីសហការគ្នាជាក្រុមបានល្អ។ ស្រីយ៉ា បន្តថា៖ «ការប្រកួតមុនៗ គឺលេងវិញ្ញាសា ៣ទល់៣ អារម្មណ៍ គឺ៣ ពីព្រោះត្រូវមានសិទ្ធិខ្លាំងទាំង៣ ប៉ុន្តែលើកនេះ លេង២នាក់ មានអារម្មណ៍ខ្លាំងជាង និងអាចជោគជ័យជាងពេលលេង៣នាក់»។
តែទោះបីជាយ៉ាងណា អ៊ុន ស្រីយ៉ា បានអះអាងថា មានប្រទេសចម្លោះពី៨ ទៅ១០ ជាឧបសគ្គសម្រាប់ក្រុមប៉េតង់កម្ពុជា ដូចជា ថៃ បារាំង ដាណាម៉ាកជាដើម ព្រោះប្រទេសទាំងនោះ តែងតែប្រកួតយ៉ាងស្វិតស្វាញជាមួយក្រុមជម្រើសជាតិកម្ពុជា លើឆាកអន្តរជាតិ ក្នុងព្រឹត្តការណ៍ធំៗ ដូចជាការប្រកួតកីឡាស៊ីហ្គេម កម្រិតអាស៊ី និងជើងឯកពិភពលោក៕