បរទេស៖ ក្លិប Tottenham បានបំពេញការចុះហត្ថលេខាជាមួយនឹងខ្សែការពារស្លាបស្តាំ Djed Spence ពីក្លិប Middlesbrough ក្នុងកិច្ចសន្យារហូតដល់ឆ្នាំ២០២៧។
Spurs នឹងចំណាយលើតម្លៃខ្លួនជាបឋមចំនួន១២,៥លានផោន ប៉ុន្តែ តម្លៃខ្លួននេះ អាចនឹងកើនដល់២០លានផោន (ស្មើ២៤លានដុល្លារអាមេរិក) បើបូកទាំងប្រាក់ឧបត្ថម្ភនានា។ ខ្សែការពារស្លាបអន្តរជាតិអង់គ្លេសអាយុក្រោម២១ឆ្នាំរូបនេះ បានចំណាយពេលកាលពីរដូវកាលមុន ក្នុងនាមជាកីឡាករកម្ចីនៅក្លិប Nottingham Forest និងបានជួយឲ្យក្រុមនេះឈ្នះកៅអីទៅលេងក្នុងក្របខ័ណ្ឌកំពូលតាមរយៈវគ្គ Playoff។ រូបគេបានជាប់ឈ្មោះក្នុងក្រុមខ្លាំងបំផុតប្រចាំឆ្នាំរបស់ក្របខ័ណ្ឌ EFL Championship និងរបស់សមាគមកីឡាករបាល់ទាត់អាជីព។
Spence ដែលបានចូលរួមជាមួយនឹងក្លិប Middlesbrough ពីក្លិប Fulham ក្នុងឆ្នាំ២០១៨ និងបានបង្ហាញខ្លួន៧០លើកសម្រាប់ក្លិបនេះ គឺជាកីឡាករចំណូលថ្មីទី៦របស់ក្លិប Tottenham បន្ទាប់ពី Richarlison, Yves Bissouma, Clément Lenglet, Fraser Forster និង Ivan Perisic។ លោក Antonio Conte ដែលជាអ្នកចាត់ការទូទៅ បានកំណត់ការទិញយក Spence ដោយសារតែរូបលោកជឿជាក់ថា កីឡាកររូបនេះ នឹងពង្រឹងតំបន់ការពារស្លាប ដោយសារតែល្បឿន និងការចូលលេងក្នុងតំបន់ប្រយុទ្ធរបស់គេ៕
ប្រភពព័ត៍មាន៖ The Guardian
