អគ្គលេខាធិការនៃគណៈកម្មាធិការជាតិប៉ារ៉ាឡាំពិកកម្ពុជា លោក យី វាសនា បានប្រាប់ទៅក្រុមអត្តពលិក គ្រូបង្វឹក គ្រូជំនួយ និងអ្នកបច្ចេកទេស ថា ការដណ្តើមបានមេដាយមាស១គ្រឿង ពីការប្រកួតនៅលើឆាកអន្តរជាតិ របស់អត្តពលិកណាម្នាក់ មានតម្លៃស្មើនឹង ជាតិ សាសនា ព្រះមហាក្សត្រ។
ការលើកឡើងបែបនេះ របស់លោក យី វាសនា ត្រូវបានធ្វើឡើង នៅកិច្ចប្រជុំបច្ចេកទេស និងត្រៀមលក្ខណៈសម្បត្តិ ព្រមទាំងត្រួតពិនិត្យ និងដោះស្រាយរាល់បញ្ហា សម្រាប់ក្រុមអត្តពលិកប៉ារ៉ាកម្ពុជា កាលពីថ្ងៃទី១៨ ខែកក្កដា ដើម្បីជំរុញឱ្យក្រុមប្រតិភូកីឡាជនពិការ ត្រូវចេញទៅប្រកួតកីឡាអាស៊ានប៉ារ៉ាហ្គេម លើកទី១១ ឆ្នាំ២០២២ នៅប្រទេសឥណ្ឌូណេស៊ី ខាងមុខនេះ ត្រូវយកបេះដូង និងឆន្ទៈដ៏ពិតប្រាកដ ដើម្បីប្រជែងរកមេដាយជូនជាតិ ព្រោះការឈ្នះមេដាយ ពីការប្រកួតនេះ វាមានតម្លៃខ្លាំងណាស់។
លោក យី វាសនា បានថ្លែង នៅចំពោះមុខប្រតិភូជនពិការ នៅក្នុងកិច្ចប្រជុំនោះថា ៖«លោកជំទាវ អស់លោក លោកស្រីទាំងអស់ អស់លោកត្រូវស្គាល់តម្លៃខ្លួនឯង។ តម្លៃរបស់អស់លោកថ្លៃជាងមាសពីរដូងទុំទៅទៀត អ៊ីចឹងត្រូវរៀនស្គាល់ពីតម្លៃរបស់ខ្លួនឯង ពេលចេញទៅក្រៅប្រទេស ព្រោះទាំងគ្រូ ទាំងសិស្ស គឺជាតម្លៃ ជាតិ សាសនា ព្រះមហាក្សត្រ»។
លោកបានសង្កត់ធ្ងន់ថា៖ «តើយើងឃើញតម្លៃ ជាតិ សាសនា ព្រះមហាក្សត្រ នៅកន្លែងណា? ពេលបងប្អូនរកបានមេដាយមាស១គ្រឿង អ្វីដែលត្រូវបានលើកឡើងលើ? គឺទង់ជាតិ ដែលជាព្រលឹង ជាតិ សាសនា ព្រះមហាក្សត្រ។ ដូច្នេះ បងប្អូនមានតម្លៃស្មើ ជាតិ សាសនា ព្រះមហាក្សត្រ»។
«មេដាយ១គ្រាប់ តំណាងព្រះរាជាណាចក្រកម្ពុជា ដូច្នេះអត្តពលិក គ្រូបង្វឹករបស់យើង គឺស្មើនឹងទង់ជាតិ ព្រលឹងជាតិ សាសនា ព្រះមហាក្សត្រ ហេតុនេះសូមឱ្យតម្លៃខ្លួនឯងឱ្យខ្ពស់រាល់ពេល ដេក ដើរ ឈរ អង្គុយ គឺត្រូវយល់ថា ខ្លួនយើងមានតម្លៃ»។
គួរបញ្ជាក់ថា សម្រាប់ការចេញទៅប្រកួតកីឡាអាស៊ានប៉ារ៉ាហ្គេម លើកទី១១ ឆ្នាំ២០២២ នៅទីក្រុងសូឡូ ប្រទេសឥណ្ឌូនេស៊ី គណៈកម្មាធិការជាតិប៉ារ៉ាឡាំពិកកម្ពុជា ដែលមានលោកនាយករដ្ឋមន្រ្តី ហ៊ុន សែន ជាប្រធាន គឺបានរៀបចំកីឡាចំនួន១១ប្រភេទ សរុបមាន១៦៦នាក់ ដោយក្នុងនោះ មានអត្តពលិក ១១៥នាក់ និងប្រតិភូកីឡា គ្រូបង្វឹក គ្រូជំនួយចំនួន ៣៩នាក់ មន្ត្រីបច្ចេកទេសចំនួន ៧ នាក់ និងប្រតិភូជាតិចំនួន៥នាក់។
ប្រតិភូកីឡាជនពិការទាំងនេះ គ្រោងនឹងចេញដំណើរនៅថ្ងៃទី២៤ ខែកក្កដា ខាងមុខនេះ ក្រោមការដឹកនាំរបស់លោក ហ៊ុន ម៉ានី ប្រធានគណៈកម្មការទី៧ នៃរដ្ឋសភា និងជាប្រធានសហភាពសហព័ន្ធយុវជនកម្ពុជា។ ជាមួយគ្នានេះ ក្រោមការសម្របសម្រួលរបស់លោក ហ៊ុន សែន គឺក្រុមហ៊ុនអាកាសចរណ៍ Sky Angkor Airlines ជាអ្នកដឹកជញ្ជូន ដោយជើងហោះហើរពិសេស ដោយឥតគិតថ្លៃ សម្រាប់ការចេញដំណើរ ទៅឥណ្ឌូនេស៊ី នៅថ្ងៃទី២៦ ខែកក្កដា និងវិលត្រឡប់មកមាតុភូមិវិញ នាថ្ងៃទី៧ ខែសីហា ឆ្នាំ២០២២៕