កីឡាការិនីលោតចម្ងាយ វិត ចន្ថា បានបង្កើតកំណត់ត្រាដ៏អស្ចារ្យថ្មីមួយទៀត នៅពេលកីឡាការិនីរបស់កម្ពុជារូបនេះ ដណ្តើមបានមេដាយមាស ជូនជាតិ នៅក្នុងការប្រកួតកីឡាអាស៊ានប៉ារ៉ាហ្គេម លើកទី១១ ឆ្នាំ២០២២ ដែលកំពុងដំណើរការប្រកួត នៅទីក្រុងសូឡូ ប្រទេសឥណ្ឌូនេស៊ី។
ជាអត្តពលិកម្នាក់ ដែលមានពិការភាពជើងស្តាំ តែ វិត ចន្ថា បានបង្ហាញពីការលោតបានយ៉ាងល្អ ដោយនាងធ្វើបានរហូតដល់ ៤.២៩ម៉ែត្រ នៅក្នុងការប្រកួតផ្តាច់ព្រ័ត្រ ដើម្បីទទួលបានមេដាយមាសគួរជាទីមោទនៈ តាមរយៈការប្រកួត លើប្រភេទកីឡាអត្តពលកម្ម កាលពីព្រឹកថ្ងៃចន្ទនេះ។
កីឡាការិនីពិការជើងស្តាំ វិត ចន្ថា បានបង្ហាញភាពសប្បាយរីករាយខ្លាំងបំផុត ដោយនាងបានកាន់ទង់ជាតិរត់ពេញទីលានប្រកួត ដើម្បីបង្ហាញពីភាពមោទនភាព ក្នុងការឈ្នះមេដាយមាសនេះ ព្រោះនេះជាការកសាងបាននូវស្នាដៃជូនប្រទេសជាតិ ជាលើកដំបូងដ៏សំខាន់របស់គាត់ ហើយនេះក៏ជាលើកកំណត់ត្រាលើកដំបូងរបស់ក្រុមកីឡាជនពិការកម្ពុជា ផងដែរ ដែលអាចដណ្តើមបានមេដាយមាស នៅលើវិញ្ញាសាលោតចម្ងាយ នៅក្នុងព្រឹត្តិការណ៍កីឡាអាស៊ានប៉ារ៉ាហ្គេមនេះ។
ជាមួយការរកបានជ័យជម្នះយ៉ាងសំខាន់នេះ កីឡាការិនី វិត ចន្ថា ក៏ទទួលបានការអបអរពីសំណាក់លោកលោកនាយករដ្ឋមន្រ្តី ហ៊ុន សែន ដែលជាប្រធានគណៈកម្មាធិការជាតិប៉ារ៉ាឡាំពិកកម្ពុជា សម្រាប់កីឡាជនពិការនេះផងដែរ។
លោកនាយករដ្ឋមន្រ្តី បានបង្ហោះនៅលើផេចហ្វេសប៊ុករបស់លោក នៅមុននេះបន្តិចថា៖ «សូមអបអរសាទរ កីឡាការិនី វិត ចន្ថា ទទួលបានមេដាយមាស លើវិញ្ញាសាលោតចម្ងាយ ក្នុងព្រឹត្តិការណ៍អាស៊ានប៉ារ៉ាហ្គេម លើកទី១១ នៅទីក្រុងសូឡូ ប្រទេសឥណ្ឌូនេស៊ី នាព្រឹកថ្ងៃទី០១ ខែសីហា ឆ្នាំ២០២២។ជូនពរកីឡាករ កីឡាការិនីយើងបន្ត នូវភាពជោគជ័យជាបន្តបន្ទាប់ទៀត»។
គួរបញ្ជាក់ថា គិតត្រឹមពេលនេះ ក្រុមកីឡាជនពិការកម្ពុជា ដណ្តើមបានមេដាយមាសចំនួន២ហើយ ដែលមេដាយមាសដំបូងគេ រកបានដោយក្រុមកីឡាបាល់បោះជិះរទេះនារី កាលពីថ្ងៃអាទិត្យ លើវិញ្ញាសា៣នាក់ទល់៣នាក់ និងមេដាយមាសទី២ រកបានដោយ វិត ចន្ថា នៅថ្ងៃចន្ទនេះ ហើយកម្ពុជា ក៏ដណ្តើមបានមេដាយសំរឹទ្ធ ១ទៀតផងដែរ ដែលរកបានកីឡាករវាយកូនឃ្លីលើតុ លើវិញ្ញាសា ២x២ ប្រភទ TT3៕