ក្រុមបាល់បោះជិះរទេះនារីផ្នែកជនពិការរបស់កម្ពុជា បានធ្វើឱ្យគ្រប់គ្នា មើលឃើញយ៉ាងច្បាស់ពីកម្រិតលេងយ៉ាងល្អរបស់ពួកគេ ដើម្បីឈ្នះបានមេដាយទី១ ឱ្យកម្ពុជា នៅក្នុងការប្រកួតកីឡាអាស៊ានប៉ារ៉ាហ្គេម លើកទី១១ ឆ្នាំ២០២២ នៅទីក្រុងសូឡូ ប្រទេសឥណ្ឌូនេស៊ី កាលពីថ្ងៃអាទិត្យ ចំណែកក្រុមវាយកូនឃ្លីលើតុ ដណ្តើមបានមេដាយសំរឹទ្ធ១ ផងដែរ។
តាមរយៈការប្រកួតនេះ ក្រុមបាល់បោះជិះរទេះនារីកម្ពុជា បានឈ្នះគ្រប់ការប្រកួតទាំងអស់ ដើម្បីបង្កើតបាននូវកំណត់ត្រាជាប្រវត្តិសាស្រ្ត សម្រាប់ការចូលរួម ក្នុងការប្រកួតកីឡាអាស៊ានប៉ារ៉ាហ្គេម ជាលើកដំបូងរបស់ពួកគេ គឺការឈ្នះបានមេដាយមាស ចំពោះការប្រភេទកីឡាបាល់បោះជិះរទេះលើវិញ្ញាសា ៣នាក់ទល់៣នាក់នេះ។
តាមរយៈការប្រកួត ដែលពោរពេញដោយឆន្ទៈនេះ ក្រុមបាល់បោះជិះរទេះនារីកម្ពុជា បានយកឈ្នះលើក្រុមនារីឡាវ ដោយលទ្ធផល ១១-៥ សម្រាប់ការប្រកួតបើកឆាក កាលពីថ្ងៃសៅរ៍ ហើយកាលពីថ្ងៃអាទិត្យ ពួកគេបានបន្តយកឈ្នះលើក្រុមនារីជាម្ចាស់មេដាយមាសរបស់ថៃ ៩-៨ និងបន្តឈ្នះក្រុមនារីហ្វីលីពីន ១៨-០ ដើម្បីទទួលបានលេខ១ ក្នុងការប្រកួតវិលជុំ។
ជាមួយការឈ្នះទាំង៣ប្រកួតជាប់ៗគ្នានេះ ក្រុមនារីកម្ពុជា ត្រូវឡើងទៅជួបក្រុមនារីរបស់ថៃ នៅវគ្គផ្តាច់ព្រ័ត្រ ជាថ្មីម្តងទៀត ហើយពួកគេ បានបន្តយកឈ្នះក្រុមអតីតម្ចាស់មេដាយមាសរបស់ថៃ ដោយលទ្ធផល ៧-៥ ដើម្បីទទួលបានមេដាយមាសយ៉ាងមានមោទនភាពបំផុត។
លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា ដែលជាប្រធានដឹកនាំប្រតិភូកីឡាជនពិការកម្ពុជា សម្រាប់ការប្រកួតកីឡាអាស៊ានប៉ារ៉ាហ្គេម នៅប្រទេសឥណ្ឌនេស៊ីនេះ បានស្រែកហ៊ោអបអរអស់ពីចិត្ត ចំពោះការឈ្នះបានមេដាយមាសទី១ របស់ក្រុមបាល់បោះជិះរទេះនារីកម្ពុជានេះ។
ហើយភ្លាមៗ បន្ទាប់ពីការប្រកួតឈ្នះបានមេដាយមាសនោះ លោក ហ៊ុន ម៉ានី បានបង្ហោះសារអបអរបែបនេះថា៖ «អបអរសាទរកម្ពុជា ឈ្នះបានមេដាយមាសដំបូង ក្នុងព្រឹត្តិការណ៍កីឡាអាស៊ានប៉ារ៉ាហ្គេម ឆ្នាំ២០២២ នៅប្រទេសឥណ្ឌូនេស៊ី លើវិញ្ញាសារកីឡាបាល់បោះនារី ដោយទទួលបានជ័យជម្នះលើក្រុមកីឡាការិនីនៃព្រះរាជាណាចក្រថៃ»។
ជាមួយគ្នានេះ លោកនាយករដ្ឋមន្រ្តី ហ៊ុន សែន ជាប្រធានគណៈកម្មាធិការជាតិប៉ារ៉ាឡាំពិក បានបង្ហោះសារអបអរដល់ក្រុមបាល់បោះជិះរទេះនារីកម្ពុជា ផងដែរថា៖«អបអរសាទរកម្ពុជាឈ្នះមេដាយមាសដំបូង នៃការប្រកួតអាស៊ានប៉ារ៉ាហ្គេម ដោយក្រុម បាល់បោះរទេះនារី ដែលទើបយកឈ្នះក្រុមថៃ ដោយលទ្ធផល ៧-៥ពិន្ទុ ក្នុងវគ្គផ្ដាច់ព្រ័ត្រមុននេះបន្ដិច លើវិញ្ញាសា ៣នាក់ទល់៣នាក់ នៅទីក្រុងសូឡូ ប្រទេសឥណ្ឌូនេស៊ី»។
លោកបានបន្ថែមថា៖ «ទម្រាំដណ្ដើមបានមេដាយមាសជូនជាតិនេះ ក្រុមកីឡាការិនីកម្ពុជា បានឆ្លងកាត់៤ប្រកួត និងបានយកឈ្នះគូប្រកួតទាំង៤ប្រកួត ពោលគឺវគ្គសន្សំពិន្ទុវិលជុំ បានយកឈ្នះក្រុមឡាវ ដោយពិន្ទុ ១១-៥ ឈ្នះក្រុមថៃ ៩-៨ និងឈ្នះក្រុមហ្វីលីពីន ដោយពិន្ទុ ១៨-០ មុនប្រកួតវគ្គផ្ដាច់ព្រ័ត្រ ដែលកម្ពុជា បានបន្តយកឈ្នះក្រុមថៃ ដោយពិន្ទុ ៧-៥»។
ផ្ទុយពីនេះ ក្រុមបាល់បោះជិះរទេះបុរសកម្ពុជា បានចាញ់ក្រុមបុរសថៃ ១៦-៤ ឈ្នះក្រុមម្ចាស់ផ្ទះឥណ្ឌូនេស៊ី ៨-៥ និងចាញ់ក្រុមហ្វីលីពីន ២០-៤ ដោយមានឱកាសប្រកួតដណ្តើមយកមេដាយសំរឹទ្ធដែរ ប៉ុន្តែពួកគេ បានចាញ់ក្រុមឥណ្ឌូនេស៊ី ដោយលទ្ធផល ៩-៥ វិញ ហេតុនេះពួកគេ មិនដណ្តើមបានមេដាយទេ។
ដោយឡែក សម្រាប់ការប្រកួតវាយកូនឃ្លីលើតុ លើវិញ្ញាសា២x២ ប្រភេទ TT៣ គឺក្រុមបុរសវាយកូនឃ្លីលើតុកម្ពុជា ដណ្តើមបានមេដាយសំរឹទ្ធចំនួន១ផងដែរ កាលពីថ្ងៃអាទិត្យ ម្សិលមិញនោះ៕