ក្រុមបាល់បោះជិះរទេះរបស់ថៃ បាននឹងកំពុងឈានទៅរកការឈ្នះបានមេដាយមាសលើវិញ្ញាសា៥នាក់ទល់៥នាក់ ទាំងផ្នែកបុរស និងនារី ខណៈពួកគេ ត្រូវប្រកួតផ្តាច់ព្រ័ត្រ ជាមួយក្រុមនារីកម្ពុជា និងក្រុមបុរសហ្វីលីន នៅថ្ងៃសុក្រនេះ ក្នុងព្រឹត្តិការណ៍អាស៊ានប៉ារ៉ាហ្គេម នៅប្រទេសឥណ្ឌូនេស៊ី។
វាមិនមែនជាលើកទី១នោះទេ ដែលក្រុមបុរស និងក្រុមនារីរបស់ថៃ បានឡើងមកដល់វគ្គផ្តាច់ព្រ័ត្រ នៃការប្រកួតកីឡាបាល់បោះជិះរទេះនេះ ព្រោះការប្រកួតលើវិញ្ញាសា៣នាក់ទល់៣នាក់កន្លងមកនេះ ក៏ក្រុមថៃ បានឡើងដល់វគ្គផ្តាច់ព្រ័ត្រ ទាំង២ក្រុមផងដែរ ប៉ុន្តែសម្រាប់ក្រុមនារី គឺថៃ បានចាញ់ក្រុមនារីកម្ពុជា ៧-៥ តែក្រុមបុរសរបស់ប្រទេសនេះ បានឈ្នះក្រុមបុរសហ្វីលីពីន ២១-១២ ដើម្បីឈ្នះបានមេដាយមាស១ និងប្រាក់១។
តែទោះបីជាយ៉ាងណា សម្រាប់ការប្រកួតវិញ្ញាសា៥នាក់ទល់៥នាក់នេះ ទាំងក្រុមនារី និងក្រុមបុរសរបស់ថៃ សុទ្ធតែមានកម្រិតលេងខ្លាំង និងបានឈ្នះគ្រាប់ការប្រកួតដូចគ្នា នៅក្នុងវគ្គជម្រុះសន្សំពិន្ទុ មុននឹងឈានឡើងមកដល់វគ្គផ្តាច់ព្រ័ត្រ នៅថ្ងៃសុក្រនេះ ដោយក្រុមនោះ ក្រុមនារីថៃ ជួបក្រុមនារីកម្ពុជា នៅម៉ោង១១ព្រឹក ហើយក្រុមបុរស ត្រូវប៉ះក្រុមហ្វីលីពីន នៅរសៀលម៉ោង១។
សម្រាប់ការប្រកួតផ្តាច់ព្រ័ត្រនេះ ត្រូវបានគេមើលឃើញថា ក្រុមថៃ ទាំងបុរស និងនារី គឺមានភាគរយខ្ពស់ដូចគ្នា ក្នុងការឈ្នះបានមេដាយមាស នៅលើវិញ្ញាសា៥នាក់ទល់៥នាក់នេះ ព្រោះនៅមុនការឡើងដល់វគ្គផ្តាច់ព្រ័ត្រ នៅថ្ងៃសុក្រនេះ ក្រុមនារីថៃ បានឈ្នះក្រុមនារីកម្ពុជា ដោយលទ្ធផល ៤៧-២៩ នៅវគ្គជម្រុះម្តងហើយ ហើយក្រុមបុរសថៃ ក៏បានឈ្នះក្រុមបុរសហ្វីលីពីន ៩២-៣៩ ផងដែរ។
តាមរយៈលទ្ធផលនេះ វាស្ទើបានបង្ហាញរួចទៅហើយថា ក្រុមបុរសថៃ នឹងអាចឈ្នះក្រុមហ្វីលីពីន ជាថ្មីម្តងទៀត ដើម្បីទទួលបានមេដាយមាស លើវិញ្ញាសា៥នាក់ទល់៥នាក់នេះ បន្ថែមទៅលើវិញ្ញាសា៣នាក់ទល់៣នាក់ ដែលពេលដែលពួកគេយកឈ្នះលើវិញ្ញាសា៣នាក់ទល់៣នាក់ដែរ ប៉ុន្តែក្រុមនារីកម្ពុជា អាចនឹងនៅមានឱកាសខ្លះ ក្នុងការប្រជែងជាមួយក្រុមនារីថៃ ព្រោះពួកគេ ក៏ចង់ឈ្នះមេដាយមាស ជាលើកទី២ ជូនកម្ពុជាដូចគ្នា ដើម្បីក្លាយជាក្រុមខ្លាំងជាងគេ នៅអាស៊ាន លើប្រភេទកីឡាបាល់បោះជិះរទេះផ្នែកនារីនេះ។
គួរបញ្ជាក់ថា គិតត្រឹមព្រឹកថ្ងៃសុក្រនេះ ក្រុមអត្តពលិកជនពិការកម្ពុជា ដណ្តើមបានមេដាយសរុបជាបណ្តោះអាសន្នចំនួន២៣ហើយ ក្នុងនោះមានមេដាយមាស៦ ប្រាក់៨ និងមេដាយសំរឹទ្ធ៩៕
