បរទេស៖ លោក Christophe Galtier គ្រូបង្វឹកថ្មីរបស់ Paris Saint-Germain កាលពីថ្ងៃព្រហស្បតិ៍ បានចុះហត្ថលេខាជាមួយនឹងខ្សែបម្រើអន្តរជាតិព័រទុយហ្គាល់ Renato Sanches និងបាននិយាយថា លោកសង្ឃឹមថា នឹងទទួលបានកីឡាករចំណូលថ្មី៣នាក់ទៀត នៅមុនពេលបិទទីផ្សារដោះដូរកីឡាករ។
លោក Galtier ដែលត្រូវបានតែងតាំងកាលពីខែមុន ដើម្បីជំនួសកន្លែងរបស់លោក Mauricio Pochettino នោះ បានដឹងថា ក្រុមម្ចាស់ជើងឯកក្របខ័ណ្ឌ Ligue 1 មួយនេះ បានចុះហត្ថលេខាជាមួយនឹងកីឡាករអន្តរជាតិព័រទុយហ្គាល់ Vitinha ខ្សែការពារសញ្ជាតិបារាំង Nordi Mukiele និងខ្សែប្រយុទ្ធវ័យក្មេង Hugo Ekitike រួចជាស្រេច។ ក្នុងនាមជាកីឡាករចំណូលថ្មីនៅកីឡដ្ឋាន Parc de Princes ខ្សែបម្រើ Sanches នឹងត្រូវធ្វើការក្រោមការដឹកនាំរបស់លោក Galtier ម្តងទៀត ក្រោយពីធ្លាប់បានធ្វើការជាមួយនឹងរូបលោករួចជាស្រេច នៅក្លិប Lille។
សមាជិកឈ្នះពាន Euro ឆ្នាំ២០១៦ វ័យ២៤ឆ្នាំរូបនេះ បានចុះកិច្ចសន្យាមួយដែលមានសុពលភាពរហូតដល់ឆ្នាំ២០២៧។ នេះបើយោងទៅតាមការបញ្ជាក់របស់ក្លិប PSG។ ក្រោយពីជួបភាពត្រដាបត្រដួសក្នុងការបង្កើតការភ្ញាក់ផ្អើលនៅក្លិប Bayern Munich និងបន្ទាប់ពីចំណាយពេលខ្ចីជើងនៅក្លិប Swansea City របស់ក្របខ័ណ្ឌអង់គ្លេស Championship កីឡាកររូបនេះ ដែលបានចាប់ផ្តើមអាជីពនៅ Benfica បានផ្ទេរទៅកាន់ក្លិប Lille ក្នុងឆ្នាំ២០១៩ ដើម្បីសង្គ្រោះអាជីពរបស់គេឡើងវិញ៕
ប្រភពព័ត៌មាន៖ Channel News Asia
