បរទេស៖ ខ្សែការពារចំណូលថ្មី Conor Coady របស់ក្លិប Everton បានសន្យាថា «នឹងជួយឲ្យក្លិបនេះ ធ្វើដំណើរឆ្ពោះទៅមុខ» ក្រោយពីបានបំពេញការខ្ចីជើងពេញ១រដូវកាល ពីក្លិប Wolves។ លោក Bruno Lage បានយល់ព្រមឲ្យប្រធានក្រុមរបស់លោកចាកចេញជាបណ្តោះអាសន្នដើម្បីឲ្យរូបគេអាចលេងបានជាទៀងទាត់ ដើម្បីត្រៀមសម្រាប់ព្រឹត្តិការណ៍ World Cup។
Everton នឹងមានជម្រើសក្នុងការទិញយកខ្សែការពារកណ្តាលអន្តរជាតិអង់គ្លេសរូបនេះ នៅចុងរដូវកាលនេះ។ ស្របពេលជាមួយគ្នានេះ ក្លិប Wolves បានធ្វើឲ្យខ្សែប្រយុទ្ធ Gonçalo Guedes របស់ក្លិប Valencia ក្លាយជាកីឡាករចំណូលថ្មីទី២របស់ពួកគេ នៅរដូវក្តៅនេះ ក្នុងតម្លៃខ្លួន២៧,៥លានផោន (ស្មើនឹង៣៣លានដុល្លារអាមេរិក)។ Coady ដែលអភិវឌ្ឍចេញពីក្រុមយុវជនរបស់ Liverpool នឹងពង្រឹងតំបន់ការពាររបស់ Everton ក្រោយពី Ben Godfrey បានជួបបញ្ហាបាក់ជើង ក្នុងពេលក្រុមខ្លួនរងបរាជ័យក្នុងលទ្ធផល ១-០ ក្រោមស្នាដៃក្រុម Chelsea កាលពីថ្ងៃសៅរ៍។
Coady បានចូលលេងរាល់ការប្រកួតក្របខ័ណ្ឌ Premier League ទាំងអស់សម្រាប់ក្រុម Wolves កាលពីរដូវកាលមុន ប៉ុន្តែ បានស្ថិតជាកីឡាករបម្រុង ក្នុងពេលក្រុម Wolves បានរងបរាជ័យក្រោមស្នាដៃក្រុម Leeds កាលពីចុងសប្តាហ៍ថ្មីៗនេះ៕
ប្រភពព័ត៌មាន៖ The Guardian