ក្រុមបាល់ទាត់ជម្រើសជាតិកម្ពុជាអាយុក្រោម១៦ឆ្នាំ មិនអាចប្រើកម្លាំងចិត្ត ដែលកើតចេញពីការយកឈ្នះក្រុមអូស្រ្តាលី ដើម្បីយកឈ្នះក្រុមយុវជនមីយ៉ាន់ម៉ា បាននោះទេ នៅក្នុងការប្រកួតជម្រុះចុងក្រោយប្រចាំពូលC នៃពានរង្វាន់ AFF U16 BOYS CHAMPIONSHIP 2022 នៅប្រទេសឥណ្ឌូនេស៊ី។
បើទោះបីជា ក្រុមយុវជនកម្ពុជា បានចាញ់ក្រុមម៉ាឡេស៊ី ៣-០ នៅក្នុងការប្រកួតបើកឆាក ប៉ុន្តែការយកឈ្នះក្រុមអូស្រ្តាលី ៤-២ នៅក្នុងការប្រកួតលើកទី២ បានក្លាយជាកំណត់ត្រាដ៏ល្អបំផុត ដែលធ្វើអ្នកអ្នកគាំទ្រ មានការកោតសរសើរខ្លាំង ទៅដល់យុវជនតំណាងឱ្យកម្ពុជា ទាំងនេះ ព្រោះការប្រកួតគ្រប់កម្រិតអាយុ គឺកម្ពុជា ធ្លាប់បានចាញ់ក្រុមអូស្រ្តាលី ងើបមុនមិនរួចនោះទេ។
យ៉ាងណាក៏ដោយ ក្រុមយុវជនកម្ពុជា មិនអាចប្រើកម្លាំងចិត្តនេះ ដើម្បីបន្តយកឈ្នះក្រុមមីយ៉ាន់ម៉ា បាននៅទេ ដោយពួកគេ បានចាញ់ ១-០ យ៉ាងសោកស្តាយបំផុត សម្រាប់ការប្រកួត កាលពីល្ងាចថ្ងៃចន្ទ ម្សិលមិញ។
តែទោះបីជាយ៉ាងណា ការចាញ់របស់ក្រុមយុវជនកម្ពុជា បានកើតឡើងដោយសារការបង្កើតកំហុសត្រឹម១បាល់ គឺការរុញខ្សែប្រយុទ្ធឱ្យមីយ៉ាន់ម៉ា ឱ្យដួល នៅក្នុងតំបន់គ្រោះថ្នាក់ នាំឱ្យអាជ្ញាកណ្តាលផ្តល់បាល់ពិន័យ១១ម៉ែត្រទៅឱ្យក្រុមមីយ៉ាន់ម៉ា ហើយប្រធានក្រុម Lin Htet Oo ជាអ្នកស៊ុតបានសម្រេច នៅនាទីទី៤៨។
បន្ថែមទៅលើការចាញ់នេះ ក្រុមយុវជនកម្ពុជា កាន់តែមានការសោកស្តាយខ្លាំង នៅពេលក្រុមខ្លាំង ម៉ាឡេស៊ី បានទៅស្មើ ២-២ ជាមួយក្រុមអូស្រ្តាលី នោះ ព្រោះលទ្ធផលនេះ បានជួយឱ្យក្រុមមីយ៉ាន់ម៉ា ទទួលបានលេខ១ ក្នុងពូល C នេះ ដោយមាន៧ពិន្ទុ និងបានឡើងទៅកាន់ការប្រកួតវគ្គពាក់កណ្តាលផ្តាច់ព្រ័ត្រ។
ចំណែកក្រុមម៉ាឡេស៊ី ដែលឈរនៅលេខ២ មាន៥ពិន្ទុ បានធ្លាក់ចេញពីការប្រកួតនេះ ដូចគ្នា ព្រោះពួកគេ មិនបានជាប់ជាក្រុមលេខ២ល្អនោះទេ គឺក្រុមលេខ២ល្អ បានទៅលើយុវជនវៀតណាម ហេតុនេះ វៀតណាម ត្រូវឡើងទៅជួបក្រុមលេខ១ពូលB ថៃ នៅវគ្គពាក់កណ្តាលផ្តាច់ព្រ័ត្រ ហើយក្រុមមីយ៉ាន់ម៉ា ត្រូវប្រឈមជាមួយក្រុមម្ចាស់ផ្ទះឥណ្ឌូនេស៊ី ដែលទទួលបានលេខ១ ក្នុងពូលA ខណៈការប្រកួតនេះ នឹងត្រូវធ្វើនៅថ្ងៃទី១០ ខែសីហានេះ៕