បរទេស៖ សហព័ន្ធកីឡាបាល់ទាត់អន្តរជាតិហៅកាត់ថា FIFA បានសម្រេចជាផ្លូវការក្នុងការរៀបចំការប្រកួត World Cup នៅឆ្នាំនេះ ក្នុងរយៈពេល១ថ្ងៃមុនការគ្រោងទុក គឺនៅថ្ងៃទី២០ ខែវិច្ឆិកា ដែលនេះជាការផ្លាស់ប្តូរកាលបរិច្ឆេទដ៏កម្រមួយ ដើម្បីអាចឲ្យក្រុមម្ចាស់ផ្ទះកាតា ចាប់ផ្តើមការប្រកួតមុនគេ។
ការិយាល័យផ្នែកអនុវត្តន៍ច្បាប់របស់អង្គភាពគ្រប់គ្រងកីឡាបាល់ទាត់មួយនេះ បានអនុម័តជារួមលើសេចក្តីសម្រេចនេះ ស្របពេលដែលកាតា បានបញ្ជាក់ថា ខ្លួននឹងផ្តល់ជំនួយដោយឥតលក្ខខណ្ឌចំពោះអ្នកគាំទ្រដែលរងនូវផលប៉ះពាល់ដោយសារតែការផ្លាស់ប្តូរនេះ។ នេះបើយោងទៅតាមការបញ្ជាក់របស់ FIFA ក្នុងសេចក្តីថ្លែងការណ៍មួយ។ ក្នុងកម្មវិធីប្រកួតចាស់ ការប្រកួតរវាងក្រុមជម្រើសជាតិកាតា និងអេក្វាទ័រ ត្រូវបានគ្រោងរៀបចំឡើងនៅថ្ងៃទី២១ ខែវិច្ឆិកា ប៉ុន្តែ ជំនួបរវាងក្រុមជម្រើសជាតិសេណេហ្គាល់ និងហូឡង់ នឹងក្លាយជាការប្រកួតបើកឆាកនៅថ្ងៃដដែលនោះ។
ការប្រកួតរវាងក្រុមជម្រើសជាតិអង់គ្លេស និងអ៊ីរ៉ង់ នឹងក្លាយជាការប្រកួតទី២។ FIFA បានបញ្ជាក់ថា៖ «ក្រុមម្ចាស់ផ្ទះកាតា ពេលនេះ នឹងត្រូវប្រកួតជាមួយនឹងអេក្វាទ័រ នៅថ្ងៃទី២០ ខែវិច្ឆិកា ក្នុងការប្រកួតដាច់ដោយឡែកតែឯងនៃព្រឹត្តិការណ៍នេះ»។ FIFA បានបន្ថែមទៀតថា៖ «ការប្រកួតបើកឆាក និងការសម្ពោធព្រឹត្តិការណ៍នៅឆ្នាំនេះ នៅកីឡដ្ឋាន Al Bayt ត្រូវបានសម្រេចរៀបចំមុន១ថ្ងៃ បន្ទាប់ពីសេចក្តីសម្រេចជាឯកច្ឆន្ទ ដែលត្រូវបានធ្វើឡើងដោយការិយាល័យក្រុមប្រឹក្សា FIFA នៅថ្ងៃនេះ»៕
ប្រភពព័ត៌មាន៖ Channel News Asia