បរទេស៖ ក្លិប Manchester City កាលពីថ្ងៃអង្គារ បានប្រកាសពីការចុះហត្ថលេខាជាមួយនឹងខ្សែការពារស្លាបឆ្វេងអេស្ប៉ាញ Sergio Gomez ពីក្លិប Anderlecht ក្នុងកិច្ចសន្យារយៈពេល៤ឆ្នាំ សម្រាប់តម្លៃខ្លួន១៣លានដុល្លារអាមេរិក។
កីឡាករអាយុក្រោម២១ឆ្នាំរូបនេះ ក្លាយជាកីឡាករចំណូលថ្មីទី៤របស់ក្រុម Man City ដែលជាម្ចាស់ជើងឯកក្របខ័ណ្ឌ Premier League ក្រោយពីការចូលរួមរបស់ Erling Haaland, Kalvin Phillips និង Stefan Ortega Moreno។ ខ្សែការពារវ័យ២១ឆ្នាំរូបនេះ ដែលធ្លាប់ជាកីឡាករយុវជនរបស់ក្លិប Barcelona បាននិយាយថា៖ «Man City គឺជាក្រុមដ៏ខ្លាំងបំផុតនៅអង់គ្លេស ហើយក្រោមការដឹកនាំរបស់លោក Pep Guardiola ខ្ញុំមានឱកាសដើម្បីរៀន និងអភិវឌ្ឍន៍ ក្រោមការដឹកនាំរបស់អ្នកចាត់ការទូទៅដ៏អស្ចារ្យបំផុតក្នុងកីឡាបាល់ទាត់»។
Gomez បានបន្ថែមទៀតថា៖ «ការចូលរួមជាផ្នែកមួយរបស់ក្លិបនេះ គឺជាសុបិនក្លាយជាការពិត»។ លោក Guardiola កាលពីសប្តាហ៍មុន បានបញ្ជាក់ថា ខ្សែការពារ Gomez នឹងជួយពង្រឹងតំបន់ការពាររបស់ Man City ដោយរូបគេនឹងមិនបញ្ជូនឲ្យខ្ចីជើងនៅរដូវកាលនេះឡើយ។
ប្រភពព័ត៌មាន៖ Channel news Asia
