ក្រុមហ៊ុនខេមបូឌានព្រីមៀរលីគ បានបញ្ជាក់យ៉ាងលម្អិតពីលក្ខខណ្ឌ ផ្តល់សិទ្ធិដល់ក្លិបពីជម្រើសជើងឯកកម្ពុជាលីគ២ (SCL) ឆ្នាំ២០២២ ឡើងទៅកាន់ជម្រើសរើសជើងឯកខេមបូឌានលីគ (លីគកំពូល) ឆ្នាំ២០២៣-២០២៤ ដើម្បីស្រាយនៅចម្ងល់ និងមន្ទិលមួយចំនួនរបស់អ្នកគាំទ្រ។
តាមបទបញ្ជា និងលក្ខខណ្ឌនៃការប្រកួត បានកំណត់កន្លងមក គឺក្រុមទទួលបានចំណាត់ថ្នាក់លេខ១ និងលេខ២ នៃលីគ២ នឹងត្រូវឡើងទៅលេខនៅលីគកំពូលកម្ពុជា ដោយស្វ័យប្រវត្តិ ចំណែកក្រុមលេខ៣ នៃលីគ២ ត្រូវប្រកួតជម្រុះជាមួយក្រុមលេខ៨ ចុងក្រោយគេ នៃលីគកំពូលកម្ពុជា ហើយក្រុមឈ្នះ ត្រូវឡើងទៅលេង នៅលីគកំពូល គឺមានន័យថា ការប្រកួតលីគកំពូល រដូវកាលឆ្នាំ២០២៣-២០២៤ ត្រូវកើនដល់១០ក្លិបវិញ។
ប៉ុន្តែតាមលក្ខខណ្ឌផ្តល់សិទ្ធិដល់ក្លិបលេងនៅលីគ២ ឡើងទៅលេង នៅលីគកំពូល ដែលក្រុមហ៊ុនខេមបូឌានព្រីមៀរលីគ បានកំណត់លើកនេះ គឺបានផ្តោតខ្លាំងទៅលើក្លិប ដែលបានបំពេញអាជ្ញាបណ្ណក្លិបពេញលេញ មានន័យថា ក្លិបដែលមិនបានបំពេញអាជ្ញាបណ្ណក្លិប នឹងមិនបានលេង នៅលីគកំពូលកម្ពុជា នោះទេ បើទោះបីជាក្លិបនោះ ទទួលបានលេខ១ ឬលេខ២ នៅលីគ២ ក៏ដោយ។
ជាមួយគ្នានេះ ក្លិបលេងនៅលីគ២ ដែលជាបុត្រសម្ព័ន្ធ ឬមានម្ចាស់ និងអ្នកគ្រប់គ្រងជាមួយគ្នាក្លិបណាមួយ នៅលីគកំពូល ក៏មិនត្រូវបានអនុញ្ញាត ឬដាក់ឱ្យទាំង២ក្លិប នៅលីគកំពូលកម្ពុជា ជាមួយគ្នានោះដែរ គឺត្រូវមានមួយ លេងនៅលីគកំពូល និង១ទៀត ធ្លាក់មកលេង នៅលីគ២ ហើយរាល់ការបែងចែកនេះ ត្រូវបានបញ្ជាក់យ៉ាងលម្អិត នៅក្នុងសេចក្តីជូនដំណឹងរបស់ក្រុមហ៊ុនខេមបូឌានព្រីមៀរលីគ៕
