ប្រទេសអេស្ប៉ាញ៖ ក្លិប Espanyol បានអំពាវនាវឲ្យក្របខ័ណ្ឌ La Liga លុបចោលការកាត់ចេញរបស់ខ្លួន កាលពីថ្ងៃចន្ទ ខណៈដែលកីឡាបាល់ទាត់នៅអេស្ប៉ាញ បន្តជួបភាពរង្គោះរង្គើ នៅចុងរដូវកាលនេះ ក្រោយពីការកើនឡើងករណីឆ្លងវីរុសកូរ៉ូណា។
បើទោះបីបញ្ចប់នៅបាតតារាងក៏ដោយ ក្រុម Espanyol បានឲ្យដឹងក្នុងសេចក្តីថ្លែងការណ៍មួយថា បញ្ហាកំពុងតែបន្តនេះបានធ្វើឲ្យ «មានភាពមិនយុត្តិធម៌យ៉ាងច្បាស់ ក្នុងកីឡា ដោយសារតែក្នុងដំណាក់ចុងក្រោយនៃក្របខ័ណ្ឌលីកនេះ មិនបានបញ្ចប់ដូចគ្នា ក្នុងលក្ខខណ្ឌស្មើគ្នាឡើយ នៅមុនពេលការព្យួរ»។ ការឡើងទៅក្របខ័ណ្ឌកំពូល និងការកាត់ចេញ រវាងក្របខ័ណ្ឌលីកទាំង២របស់អេស្ប៉ាញ បានក្លាយជាបញ្ហាចាក់ស្រេះមួយ ក្រោយពីការប្រកួតរវាងក្រុម Fuenlabrada និង Deportivo La Coruna ក្នុងក្របខ័ណ្ឌ Seguda នៅថ្ងៃចុងក្រោយ មិនបានដំណើរការតាមការគ្រោងទុកឡើយ ដោយសារតែកីឡាករជាច្រើនរបស់ក្រុម Fuenlabrada បានតេស្តឃើញជាវិជ្ជមានទៅលើវីរុសកូរ៉ូណា។
ការដណ្តើមបានជ័យជម្នះសម្រាប់ក្រុម Fuenlabrada នឹងធ្វើឲ្យពួកគេឈានទៅប្រកួតក្នុងវគ្គ Playoff ស្របពេលដែល Deportivo អាចគេចផុតពីការកាត់ចេញ ប្រសិនបើពួកគេឈ្នះ ហើយលទ្ធផលពីកាប្រកួតផ្សេងទៀត ផ្តល់ការមានប្រៀបដល់ពួកគេ។ ក្លិបដដែលបានឲ្យដឹងក្នុងសេចក្តីថ្លែងការណ៍បន្តថា៖ «ផ្អែកទៅលើស្ថានភាពទាំងអស់ដែលបានកើតឡើត ចាប់តាំងពីវិលទៅប្រកួតវិញ និងករណីដែលបានកើតឡើងនាពេលថ្មីៗនេះ ក្លិប RCD Espanyol សូមទាមទារឲ្យលុបចោលការកាត់ចេញនៅរដូវកាលនេះ ក្នុងយុទ្ធនាការផ្សេងៗដែលស្ថិតក្រោមការគ្រប់គ្រងរបស់ La Liga»៕
ប្រភពព័ត៌មាន៖ Channel News Asia