បរទេស៖ ក្លិប Arsenal បានបំពេញការចុះហត្ថលេខាជាមួយនឹងខ្សែការពារប្រេស៊ីល Gabriel Magalhaes ពីក្លិប Lille កាលពីថ្ងៃអង្គារ ក្នុងតម្លៃខ្លួន២២លានផោន (ស្មើនឹង៣០លានដុល្លារអាមេរិក)។
កីឡាករវ័យ២២ឆ្នាំរូបនេះ នឹងជួយបន្ថែមជម្រើសក្នុងតំបន់ការពាររបស់លោក Mikel Arteta ខណៈដែលក្រុមកាំភ្លើងធំ សម្លឹងរកការវិលទៅកាន់ក្របខ័ណ្ឌ Champions League នៅរដូវកាលនេះក្រោយពីការអវត្តមានអស់រយៈពេល៤ឆ្នាំ។ Gabriel បានចូលរួមជាមួយនឹងក្លិប Lille ក្នុងឆ្នាំ២០១៧ ហើយក្រោយពីបានចំណាយពេលក្នុងនាមជាកីឡាករកម្ចីនៅក្លិប Troyes និង Dinamo Zagreb រូបគេបានបង្ហាញពីទម្រង់លេងដ៏គួរឲ្យចាប់អារម្មណ៍ ខណៈដែលក្លិប Lille បានបញ្ចប់ក្នុងចំណាត់ថ្នាក់លេខ៤ នៅក្នុងក្របខ័ណ្ឌ Ligue 1 រដូវកាលឆ្នាំ២០១៩-២០២០។ លោក Arteta បានឲ្យដឹងថា៖ «រូបគេមានគុណភាពជាច្រើន ដែលនឹងធ្វើឲ្យយើងកាន់តែរឹងមាំនៅក្នុងតំបន់ការពារ និងក្នុងនាមជាក្រុមមួយ។ រូបគេបានបង្ហាញឲ្យឃើញរួចជាស្រេចជាមួយនឹងក្លិប Lille ថា រូបគេជាខ្សែការពារម្នាក់ ដែលមានកម្រិតសមត្ថភាពដ៏អស្ចារ្យ ហើយយើងកំពុងតែសម្លឹងឆ្ពោះទៅកាន់ការអភិវឌ្ឍរូបគេឲ្យទៅជាកីឡាករម្នាក់របស់ Arsenal»។
Gabriel នឹងធ្វើឲ្យចំនួនកីឡាករប្រេស៊ីលមានកាន់តែច្រើនក្នុងក្រុម Arsenal បើគិតចាប់តាំងពីអតីតខ្សែបម្រើរបស់ក្លិបនេះគឺលោក Edu បានចាកចេញពីតួនាទីរបស់លោកក្នុងនាមជាអ្នកសម្របសម្រួលសម្រាប់ក្រុមជម្រើសជាតិប្រេស៊ីល ដើម្បីក្លាយជាប្រធានបច្ចេកទេស កាលពីឆ្នាំមុន។ Gabriel នឹងចូលរួមជាមួយនឹងកីឡាករប្រេស៊ីលដូចគ្នា David Luiz និង Willian ដែលជាកីឡាករចំណូលថ្មីរបស់ Arsenal អំឡុងពេលនៃការបិទរដូវកាលមកទល់ពេលនេះ៕
ប្រភពព័ត៌មាន៖ Channel News Asia
