បរទេស៖ លោក Diego Forlan ត្រូវបានក្លឹប Penarol ដែលជាក្លឹបមានមូលដ្ឋាននៅស្រុកកំណើតរបស់លោក នាទីក្រុង Montevideo ប្រទេសអ៊ុយរូហ្គាយបានបញ្ចប់តំណែងរបស់ខ្លួនជាផ្លូវការណ៏ ក្រោយពីរូបលោក បានដឹកនាំក្លឹបចំនួន១១ប្រកួតកន្លងមក ហើយទទួលលទ្ធផលមិនបានល្អនោះទេ។ Forlan ត្រូវបានតែងតាំងចូលមកដឹកនាំក្លឹបនៅខែធ្នូ ២០១៩ កន្លងទៅខណៈ ការដឹកនាំរបស់បុរសវ័យ ៤១ឆ្នាំរូបនេះទើបតែជួយក្លឹបឈ្នះបួនប្រកួតក្នុងចំណោមការប្រកួតសរុបទាំង១១លើកដែលគាត់ដឹក នាំ។
ទោះយ៉ាងណា លោក Forlan ធ្លាប់មានស្នាដៃបានជួយក្លឹប Penarol ក្នុងនាមកីឡាករអោយ ឈ្នះពានលីគកំពូលអ៊ុយរូហ្គាយកាលពីរដូវកាល ២០១៥-២០១៦កន្លងមកផងដែរ ។អតីតខ្សែប្រយុទ្ធ Man Utd រូបនេះធ្លាប់បានជួយក្លឹបបិសាចក្រហមឈ្នះពាន Premier League និង FA Cup ក្រោយបង្ហាញខ្លួនៅទឹកដី Old Trafford បាន២ឆ្នាំកន្លះ និងរកបានគ្រាប់បាល់ស៊ុត បញ្ចូលទីបានតែ ១៧ គ្រាប់យ៉ាងណាក្តី ។
អតីតខ្សែប្រយុទ្ធ At Madrid រូបនេះ បានសរសេរនៅលើបណ្តាញ សង្គម Twitter ថា៖ “សូមអរគុណសម្រាប់ឱកាសដែលអ្នកបានផ្តល់ឱ្យខ្ញុំ ។ ចំពោះកីឡាករទំាងអស់សូមអរគុណយ៉ាងខ្លាំងសម្រាប់ការអត់ធ្មត់ គោរពនិងលះបង់ព្រមទាំងបទពិសោធន៏ដែលអ្នករាល់គ្នាផ្តល់អោយ ។ជាចុងក្រោយសូមថ្លែងអំណរគុណដល់អ្នកគាំទ្រចំពោះការស្រលាញ់របស់ពួកគេ។ខ្ញុំមិនមានការតវ៉ាអ្វីឡើយនេះគឺជាបាល់ទាត់។វាពិតជាឃោឃៅណាស់៕”
ប្រភពព័ត៍មាន៖ BBC
