បរទេស៖ Angelino ខ្សែការពារឆ្វង របស់ក្រុម Manchester City ដែលទទួលបានការចាប់អារម្មណ៏ពីសំណាក់ក្លឹប Barcelona បានវិលត្រឡប់ទៅក្លឹប RB Leipzig វិញក្នុងលក្ខខណ្ឌខ្ចីជើងរយៈពេលពេញមួយរដូវកាល២០២០-២០២១បន្ថែមទៀត យោងការប្រកាសនៅលើគេហទំព័រ ផ្លូវការណ៏ របស់ក្លឹប។
Angelino បានចំណាយពេលពាក់កណ្តាលរដូវកាលចុងក្រោយក្នុងការខ្ចីជើងនៅក្រុម RB Leipzig ដែលបានបញ្ចប់ក្នុងចំណាត់ថ្នាក់លេខ ៣ នៅ Bundesliga និងឈានដល់វគ្គពាក់កណ្តាលផ្តាច់ព្រ័ត្រនៃក្របខ័ណ្ឌ Champions League ក្រោយពី បានចូលរួមចំណែកយ៉ាងសំខាន់ជាមួយក្រុមអាល្លឺម៉ង់ដោយបង្ហាញខ្លួនបាន ១៨ លើកគ្រប់ការ ប្រកួតទាំងអស់ក្រោយបង្ហាញខ្លួនអោយក្រុម Man.City បាន១២ប្រកួត មុនពេលផ្លាស់ទៅLeipzig ក្នុងលក្ខណ្ឌខ្ចីជើងកាលពីចុងខែមករា ២០២០កន្លងទៅ។
ខ្សែការពារវ័យ ២៣ ឆ្នាំរូបនេះបានចូលរួមជាមួយ Man.City កាលពីឆ្នាំ ២០១៤ មុនពេល ផ្លាស់ទៅ PSV Eindhoven ក្នុងឆ្នាំ ២០១៨ តែបានត្រឡប់មកកាន់ Man.City នារដូវក្តៅឆ្នាំ ២០១៩ ក្នុងតម្លៃខ្លួន៥.៣ លានផោន៕
