បរទេស៖ ក្លិប Manchester City បានយល់ព្រមលើការព្រមព្រៀងគ្នាមួយ ដើម្បីទិញយកខ្សែការពារអន្តរជាតិព័រទុយហ្គាល់ Ruben Dias ពីក្លិប Benfica ក្នុងតម្លៃខ្លួន៦៥លានផោន (ស្មើនឹង៨៣លានដុល្លារអាមេរិក)។
ដោយឡែក ខ្សែការពារអាហ្សង់ទីន Nicolas Otamendi វ័យ៣២ឆ្នាំរបស់ក្លិប Man City នឹងផ្ទេរទៅកាន់ក្លិប Benfica ជំនួសវិញក្នុងតម្លៃខ្លួន១៣,៧លានផោន។ ខ្សែការពារអន្តរជាតិព័រទុយហ្គាល់ Dias បានយល់ព្រមលើកិច្ចសន្យារយៈពេល៥ឆ្នាំ ជាមួយនឹងក្រុមរបស់លោក Pep Guardiola ស្របពេលដែល Otamendi នឹងចូលរួមជាមួយនឹង Benfica ក្នុងកិច្ចសន្យារយៈពេល៣ឆ្នាំ។ តារាឆ្នើមអន្តរជាតិអាហ្សង់ទីនរូបនេះ នឹងចាកចេញពីក្លិប Man City ក្រោយពីបានចំណាយពេល់អស់៥រដូវកាល នៅកីឡដ្ឋាន Etihad។
បច្ចុប្បន្ន Dias នឹងត្រូវធ្វើដំណើរទៅកាន់ទីក្រុង Manchester ដើម្បីទទួលការត្រួតពិនិត្យសុខភាព និងគួរតែបង្ហាញមុខជាផ្លូវការនៅសប្តាហ៍នេះ។ កីឡាករវ័យ២៣ឆ្នាំរូបនេះ គឺជាសមិទ្ធផលចេញពីប្រព័ន្ធយុវជនរបស់ក្លបិ Benfica និងបានបង្ហាញខ្លួនជាអន្តរជាតិ១៩លើក។ Dias បានជាប់ឈ្មោះជាកីឡាករឆ្នើមប្រចាំការប្រកួត ក្នុងពេលក្រុមជម្រើសជាតិព័រទុយហ្គាល់បានយកឈ្នះលើក្រុមហូឡង់ក្នុងការប្រកួតពាន Nations League ឆ្នាំ២០១៩។ លោក Guardiola បានទិញចូលខ្សែការពារ Nathan Aké រួចជាស្រេចនៅរដូវក្តៅនេះ ដើម្បីពង្រឹងតំបន់ការពារ៕
ប្រភពព័ត៌មាន៖ BBC
