បរទេស៖ ក្រុមម្ចាស់ការពារជើងឯក Bayern Munich កំពុងតែចាំយ៉ាងអន្ទះសារទៅលើភាពរឹងមាំរបស់ប្រធានក្រុម Manuel Neuer និងខ្សែបម្រើស្លាប Kingsley Coman សម្រាប់ការប្រកួតក្របខ័ណ្ឌ Champions League វគ្គ១៦ក្រុមចុងក្រោយរបស់ពួកគេជាមួយនឹងក្រុម Lazio នៅរាត្រីនេះ។ ក្រុម Bayern កំពុងតែនាំមុខ ៤-១ ពីការប្រកួតកាលពីជើងទី១ នៅមុនពេលការប្រកួតជើងទី២នៅកីឡដ្ឋាន Allianz Arena។
ក្នុងសន្និសីទសារព័ត៌មានកាលពីថ្ងៃអង្គារ លោក Hansi Flick ដែលជាគ្រូបង្វឹក បានឲ្យដឹងថា៖ «Kingsley មានបញ្ហាដាច់ដុំ ហើយ Neuer មានជំងឺផ្តាសាយ ហេតុនេះ យើងបានយកពួកគេចេញពីក្រុមដែលហ្វឹកហាត់នៅថ្ងៃនេះ»។ អ្នកចាំទីអន្តរជាតិអាល្លឺម៉ង់ Neuer មិនបានចូលរួមក្នុងវគ្គហ្វឹកហាត់ឡើយ ស្របពេលដែល Coman បានរត់តែម្នាក់ឯងក្នុងរយៈពេលដ៏ខ្លី។ លោក Flick បានបញ្ជាក់បន្ថែមថា៖ «យើងត្រូវតែរង់ចាំ ប៉ុន្តែ សង្ឃឹមថា ពួកគេមិនមានអីឡើយ»។
ប្រសិនបើ Neuer មិនចូលលេង អ្នកចាំទីបម្រុ Alexander Nuebel អាចនឹងបង្ហាញខ្លួនក្នុងជម្រើសដំបូងជាលើកទី៣របស់គេនៅរដូវកាលនេះ។ កីឡាករវ័យ២៤ឆ្នាំរូបនេះ មិនសប្បាយចិត្តឡើយចំពោះការមិនសូវមានឱកាសក្នុងការចូលលេងនៅ Bayern ចាប់តាំងពីផ្ទេរមកពីក្លិប Schalke កាលពីឆ្នាំមុន និងត្រូវបានទាក់ទងឲ្យលេងជាកីឡាករកម្ចីនៅ Monaco របស់ក្របខ័ណ្ឌ Ligue 1៕
ប្រភពព័ត៌មាន៖ Channel News Asia
