បរទេស៖ ព្រឹត្តិការណ៍ Euro ឆ្នាំ២០២០ នឹងបើកទំព័រប្រវត្តិសាស្ត្រថ្មី នាសប្តាហ៍ក្រោយនេះ នៅពេលដែលការប្រកួតនានាត្រូវបានរៀបចំឡើងក្នុងប្រទេសចំនួន១១ ជាលើកដំបូងក្នុងយុទ្ធនាការកីឡាបាល់ទាត់ប្រចាំទ្វីបអឺរ៉ុបមួយនេះ។
ស្របពេលជាមួយគ្នានេះ មានក្រុមខ្លាំងៗជាច្រើន ដែលត្រូវបានគេរំពឹងទុកថា មានក្តីសង្ឃឹមខ្ពស់ក្នុងការលើកពាន។ ក្រុមជម្រើសជាតិបារាំង បែលហ្ស៊ិក អង់គ្លេស និងព័រទុយហ្គាល់ សុទ្ធសឹងជាក្រុមមានក្តីសង្ឃឹមខ្ពស់ក្នុងការលើកពាន ប៉ុន្តែ ក្រុមផ្សេងទៀត ក៏មិនអាចមើលរំលងបានដែរ ក្នុងនោះ រួមទាំងក្រុមជម្រើសជាតិអ៊ីតាលី និងអាល្លឺម៉ង់ ផងដែរ។ មានពូលដ៏គួរឲ្យចាប់អារម្មណ៍ជាច្រើន ក្នុងព្រឹត្តិការណ៍ Euro ឆ្នាំនេះ ខណៈដែលពូល F ត្រូវបានគេចាត់ទុកថា ជាពូលមរណៈ ដោយសារតែពូលនេះមាន ក្រុមជម្រើសជាតិបារាំង អាល្លឺម៉ង់ និងម្ចាស់ការពារជើងឯកព័រទុយហ្គាល់។
ប៉ុន្តែ ពូល A ក៏ប្រជុំដោយក្រុមខ្លាំងៗផងដែរ ដោយមានអ៊ីតាលី ស្វ៊ីស តួកគី និងវេលស៍ ហើយក្រុមជម្រើសជាតិអ៊ីតាលី ត្រូវបានចាត់ទុកថា ជាក្រុមមានក្តីសង្ឃឹមខ្ពស់ក្នុងការឆ្លងផុតវគ្គចែកពូលរបស់ខ្លួន បើទោះបីក្រុម៣ផ្សេងទៀត អាចនឹងបង្កើតភាពភ្ញាក់ផ្អើលក៏ដោយ៕
