បរទេស៖ ក្រុមបាល់ទាត់ជម្រើសជាតិស៊ីរី បានចូលរួមជាមួយនឹងក្រុមជម្រើសជាតិជប៉ុន ក្នុងការប្រកួតជុំទី៣នៃជម្រុះ World Cup ក្នុងតំបន់អាស៊ី ក្រោយពីគ្រាប់បាល់បញ្ចូលទី២គ្រាប់របស់កីឡាករ Mardak Mardikian នៅតង់ទី១ បានជួយឲ្យពួកគេផ្តួលក្រុមជម្រើសជាតិហ្គាម ក្នុងលទ្ធផល ៣-០ និងដើម្បីមានសុវត្ថិភាពក្នុងការឡើងឈរលើកំពូលតារាងនៃពូល A កាលពីថ្ងៃចន្ទ។
ការដណ្តើមបានជ័យជម្នះ៧លើកពីការប្រកួតទាំង៧លើករបស់ស៊ីរី បានជួយឲ្យពួកគេស្ថិតក្នុងចំណោមក្រុមខ្លាំងទាំង១២ដែលត្រូវប្រជែងក្នុងជុំបន្ទាប់នៃយុទ្ធនាការជម្រុះ ដើម្បីដណ្តើមយកកៅអីចំនួន៤ពីក្នុងតំប់អាស៊ី សម្រាប់ World Cup នៅឆ្នាំក្រោយ នៅកាតា។ ក្រុមទី៥ពីទ្វីបអាស៊ីនេះ អាចប្រជែងយកកៅអីមួយទៀតតាមរយៈការប្រកួត Playoff អន្តរទ្វីប។ ក្នុងពូល A នេះផងដែរ ក្រុមជម្រើសជាតិចិន បានផ្តួលក្រុមជម្រើសជាតិហ្វីលីពីន ២-០ ដើម្បីកត់ត្រាជ័យជម្នះជាលើកទី៤របស់ពួកគេ ក្នុងចំណោម៦ប្រកួត ប៉ុន្តែ ពួកគេដេញតាមពីក្រោយក្រុមស៊ីរី ដល់ទៅ៨ពិន្ទុ និងត្រឹមតែអាចមានសង្ឃឹមទៅវគ្គបន្តក្នុងនាមជាក្រុមមួយក្នុងចំណោមក្រុមលេខ២ទាំង៤ក្រុមដែលមានពិន្ទុខ្ពស់ជាងគេប៉ុណ្ណោះ។
ក្នុងការប្រកួតពូល C វិញ អ៊ីរ៉ាក់ បានផ្តួលក្រុមជម្រើសជាតិកម្ពុជា ៤-១ ដើម្បីឡើងឈរលើកំពូលតារាង ដោយមាន១៤ពិន្ទុ ពីការប្រកួត៦លើក ស្របពេលដែលអ៊ីរ៉ង់ បានផ្តួលក្រុមជម្រើសជាតិបារ៉ែន ៣-០ ដើម្បីឡើងឈរលេខ២ ដោយដេញតាមពីក្រោយក្រុមលេខ១ ចំនួន២ពិន្ទុ៕
ប្រភពព័ត៌មាន៖ Channel News Asia
