បរទេស៖ Aston Villa បានចុះហត្ថលេខានាំយក Danny Ings ពីក្លិប Southampton ក្នុងកិច្ចសន្យា រយៈពេល ៣ ឆ្នាំក្នុងតម្លៃខ្លួន ២៥ លានផោន។
Ings បច្ចុប្បន្នមានវ័យ ២៩ ឆ្នាំគឺជាសមាជិកថ្មីទី៤របស់ Aston មុនបើករដូវកាលថ្មីនេះ បន្ទាប់ពី Leon Bailey, Emiliano Buendia និង Ashley Young បានចូលរួមជាមួយពួកគេរួចមក។ Ing បានបង្ហាញទម្រង់លេងល្អបំផុតដោយរកបាន ៤៦ គ្រាប់ក្នុងការបង្ហាញខ្លួន ១០០ ប្រកួតឱ្យក្លឹបនៅភាគខាងត្បូងចក្រភពអង់គ្លេសក្រោយចាកចេញពី Liverpool ក្នុងឆ្នាំ ២០១៨ ។ មួយវិញទៀតការមកដល់របស់Ing ខិតកាន់តែកៀកសម្រាប់ប្រធានក្រុម Jack Grealish ក្នុងការផ្ទេរទៅក្រុមគូប្រជែង Man. City ក្នុងតម្លៃកំនត់ត្រា១០០ លានផោន។
អ្នកចាត់ការទូទៅ Dean Smith បានលើកឡើងថា៖ «Ing គឺជាកីឡាករឆ្នើមម្នាក់នៅ Premier League ដែលមានសមត្ថភាពអាចរកគ្រាប់បាល់បានជានិច្ចជាកាល ។ទោះយ៉ាងណារយៈពេលបួនឆ្នាំ នៅ Liverpool រូបគេបានជួបឧបសគ្គដោយសារបញ្ហារបួសជង្គង់ដែលនាំអោយរូបគេត្រូវចំណាយពេលជាងមួយឆ្នាំព្យាបាលរបួស»។
Ing បានស្ថិតក្នុងបញ្ជីប្រើប្រាស់សម្រាប់គ្រូបង្វឹកអង់គ្លេសលោក Gareth Southgate សម្រាប់ការប្រកួតនៅខែកញ្ញានិងខែតុលា ឆ្នាំមុន ប៉ុន្តែ ការបង្ហាញខ្លួននៅព្រឹត្តការណ៏ យូរ៉ូ ២០២០ របស់គេប្រែជាខកខានក្រោយធ្វើតេស្តវិជ្ជមាន Covid-១៩។ លោក Ralph Hasenhuttl គ្រូបង្វឹកក្រុម Southampton និយាយថារូបលោកនិងអាចប្រើប្រាស់ថវិកាដែលទទួលបានពីការលក់ Ings ដើម្បីពង្រឹងក្រុមរបស់ខ្លួនមុនពេលរដូវកាលថ្មីចាប់ផ្តើម៕
ប្រភពព័ត៍មាន៖ BBC
